أعلى 10 أفلام تحقيقا للايرادات في 2017
على الرغم من أن فن السينما من الفنون الثقافية اللي بتقدم متعة بصرية وعقلية للمشاهدين، لكن لازم نعترف أن الإيرادات والأرباح المادية اللي بتحققها الأفلام تعتبر عامل مهم من العوامل اللي نقدر من خلالها نحكم بيها على مدى نجاح أو فشل الأعمال الفنية دي.
علشان كده جمعنا لكم من خلال الموضوع ده مجموعة من أعلى الأفلام اللي حققت أعلى إيرادات في سنة 2017، تعالوا نتكلم لغة الأرقام ونشوف أعلى 10 أفلام حققت إيرادات في 2017.
10. Pirates of the Caribbean: Dead Men Tell No Tales
في المركز العاشر بنشوف فيلم Pirates of the Caribbean: Dead Men Tell No Tales بأيرادات 794.9 مليون دولار.
الفيلم من إخراج واكيم رونينج وإسبن ساندبرج، والسيناريو لجيف ناثانسون، أما البطولة فكانت من نصيب جوني ديب وخافيير بارديم وجيفري راش وبرنتون ثوياتس مع كايا سكوديلاريو.
الفيلم بيحكي عن الكابتن جاك سبارو واللي بينطلق في رحلة جديدة بيحاول فيها يوصل لرمح بوسايدون الأسطوري. الرمح اللي هيمكنه من السيطرة على كل البحار، وهزيمة الأشباح اللي أطلقها عدوه (سلازار) في محاولة منه لهزيمة القراصنة والسيطرة على السفن الخاصة بهم.
9. Wonder Woman
في المركز التاسع بنقابل فيلم Wonder Woman اللي قدر يحقق اجمالي إيرادات 821.8 مليون دولار واللي أثار حالة كبيرة من الجدل في وقت عرضه في مصر والدول العربية بسبب جنسية بطلة الفيلم (جال جادوت) الإسرائيلية.
الفيلم بيحكي عن المرأة الخارقة لما كانت عايشة على جزيرة فيها عدد كبير من الفتيات الأمازونيات، وفى أحد الأيام بتسقط طائرة حربية أمريكية على الجزيرة وبتقدر البطلة الأميرة ديانا إنها تنقذ الطيار الأمريكي واللي بيحكيلها عن الحرب العالمية الأولى اللي بتدور في العالم وقتها. ديانا بتقرر تشارك في الحرب علشان تحقق حلمها ومهمتها الأساسية اللي بيدور حواليها الفيلم.
الفيلم من إخراج باتي جينكينز ومن بطولة جال جادوت وكريس باين وروبن رايت مع كوني نيلسن ولوسي ديفيس.
8. Thor: Ragnarok
في المركز الثامن بنشوف Thor: Ragnarok واللي حقق اجمالي إيرادات 850.4 مليون دولار.
الفيلم بيبدأ بهجوم قوي وعنيف من هيلا شريرة الفيلم، واللي بتقدر من خلاله أنها تنفي (ثور) خارج عالمه، لكنه بيقدر يتحد مع (هالك) علشان يكون فريق موازي يقدر يتصدي لـ(هيلا) وينقذ العالم من مصير مظلم جدًا.
الفيلم من تأليف كريج كايل وكريستوفر يوست ومن إخراج تايكا وايتيتي ومن بطولة كريس هيمسورث، توم هيدليستون، كيت بلانشيت، إدريس إلبا، وجيف جولدبلوم.
وعرفنا أن كيت بلانشيت علشان تقدر تقوم بدورها في الفيلم اضطرت تلتحق بصفوف تعليم الكابويرا، وهو فن قتالي حديث نسبيا.
7. Guardians of the Galaxy Vol. 2
في المركز السابع بنشوف مغامرة جديدة من سلسلة أفلام Guardians of the Galaxy وهو الجزء الثاني من السلسلة الشهيرة. والفيلم حقق 863.7 مليون دولار.
فيلم Guardians of the Galaxy 2 من بطولة كريس برات وزوي سالدانا والمصارع ديف باتيستا، بالإضافة لمشاركة سلفستر ستالون في الأداء الصوتي للأحداث، وفين ديزل اللي المرة دي لم يكتفي بعمل الأداء الصوتي لشخصية جروت، بل قام بمحاكاة مرئية للشخصية في الجزء الثاني.
الفيلم من إخراج وتأليف جيمس جن، اقتباسًا عن القصة المصورة الخاصة بدان إبنيت.
الفيلم منقسم لتلات فصول رئيسية. الأول مغامرة جديدة لفريق من المغامرين الأخيار، اللي بياخدوا على عاتقهم حماية المجرة. والثاني اكتشاف البطل بيتر كويل معلومات جديدة عن حياة والده وحقيقة شخصيته، والثالثة محاولة شرير الفيلم (يوندا) الانتقام من مجموعة حماية المجرة.
6. Wolf Warrior 2
في المرتبة السادسة بنشوف Wolf Warrior 2 بايرادات 870.3 مليون دولار.
الفيلم بيحكي عن أحد عناصر القوات الخاصة واللي بيستمتع بحياته بعد التقاعد في مدينة هادئة، لكن كتير من عوامل الخطر بتبدأ في الظهور من جديد علشان يبدأ يستعيد قدراته القتالية ويدافع عن المدنيين المحيطين به.
الفيلم من أخراج جينج وو وتأليف كوين دونج ومن بطولة جينج وو و فرانك جريلو وسيلينا جيد.
5. Spider-Man: Homecoming
بايرادات 880.2 مليون دولار بنشوف في المركز الخامس فيلم Spider-Man: Homecoming الفيلم بيحكي عن بيتر باركر، الشاب المتهور صاحب الـ 15 سنة واللي بيبدأ في اكتشاف أبعاد قدراته الجديدة كبطل خارق، بعد اللي حصل في أحداث الفيلم السابق Captain America: Civil War واللي بتجعله يفشل في إنه يعيش حياة عادية كباقي المراهقين اللي في سنه، وتبدأ علاقته بأبوه الروحي توني ستارك تصبح أقوى يوم بعد يوم.
فهل هيقدر بطل خارق عنده كتير من التفاصيل النفسية أنه يتصدى لشرير جديد وخطير؟
الفيلم من إخراج جون واتس ومن تأليف جوناثان غولدشتاين م. وجون فرانسيس دالى، أما بطولة الفيلم فكانت من نصيب روبرت داوني جونيور، اللي قام بدور توني ستارك وماريسا تومي وتوم هولاند اللي قام بدور سبايدر مان، ودونالد جلوفر وجان فافريو وجونيث بالترو.
4. Despicable Me 3
في المركز الرابع وبايرادات 1.033.5 مليار دولار بنشوف الجزء الثالث من سلسلة Despicable Me الشهيرة.
الفيلم بيحكي عن (جرو) اللي بيقرر يواجه عدوه بلتازار برات، المهووس بفترة الثمانينيات والتسعينيات الفنية وتيماتها الغنائية والتمثيلية، وفي وسط المواجهة بتظهر أحداث وشخصيات جديدة مش عاوزين نحرقها عليكم علشان تقدروا تستمتعوا بمشاهدة الفيلم.
الفيلم من إخراج كايل بيلادا ومن تأليف سينكو بول والبطولة لـ ستيف كاريل وكريستين ويج وجيني سليت مع راسل براند وآندي نيمان.
3. Star Wars: The Last Jedi
في المرتبة الثالثة بنشوف فيلم Star Wars: The Last Jedi بايرادات 1.229.7 مليار دولار
الفيلم بيحكي عن راي اللي بتبدا رحلتها في عالم الجيداي وتبدأ رحلة مع سكاي ووكر اللي هاتكتشف من خلالها أسرار كتير عن الماضي
الفيلم من بطولة جون بويجا و دايزي ريدلي و مارك هاميل ومن أخراج وتأليف ريان جونسون
2. The Fate of the Furious
بايرادات 1.236 مليار دولار بنشوف الجزء الثامن من واحده من أشهر سلاسل أفلام السرعة وسباقات السيارات في العالم.
الفيلم من إخراج إف. غاري غراي، ومن تأليف ’كريس مورغان . أمّا طاقم التمثيل فضم نفس الوجوه المعتادة فين ديزل، وجيسون ستاثام، ودوين جونسون، وتيريس جيبسون، وميشيل رودريغيز، وغيرهم من الأبطال.
الفيلم بيحكي عن (دوم) واللي كان بيقضي شهر العسل مع زوجته (ليتي) لكنه بيقرر يرجع من جديد لعالم الجريمة، وبيبدأ الفريق اللي اجتمعوا مع بعض كأسرة واحدة في محاولة ارجاعه للطريق الصحيح.
- Beauty and the Beast
أما الفيلم صاحب المركز الأول معانا، وبأيرادات 1.263.5 مليار دولار، الفيلم الشهير Beauty and the Beast.
الفيلم بيحكي عن بنت جميلة أسمها بيل، بيتم اختطاف والدها على يد وحش ضخم مرعب، ولما بتسعى بيل لتحرير والدها، بينتهي بيها الأمر حبيسة عند الوحش مكان والدها المختطف، ومن هنا بتبدأ بيل في التعرف عن قرب على شخصية الوحش، ومن هنا بتبدأ تكتشف مع الوقت إن سلوكه السيء مجرد عرض جانبي، لكنه في الحقيقة أفضل بكثير من الشكل البشع اللي بيبدو به. وبتكتشف في النهاية إنه كان أمير جميل، لكنه أصيب بلعنه حولته لوحش، هو والحاشية المحيطة به.
الفيلم من بطولة إيما واتسون ودان ستيفنز ولوك إيفانز مع جوش جاد وكيفين كلاين وإيان ماكلين ومن أخراج بيل كوندون وتأليف ستيفن شوبسكي
