أفلام العيد 2017.. قصة وهلس وأكشن!
شهر كامل قضاه المشاهدين بعيد عن شاشات السينما. شهر كامل قضيناه في حضن مجموعة من المسلسلات اللي بتتراوح بين القوة والضعف. شهر كامل قضيناه في عزومات وتراويح وسهرات رمضانية. دلوقت جه الوقت أن السينما ترجع من جديد للصدارة!
ومن خلال موضوعنا هانستعرض مع بعض الأفلام العربية اللي هاتنزل في موسم عيد الفطر 2017.
الأصليين
مفجأة العيد باقتدار، وواحد من أهم وأفضل الأفلام اللي هاتنافس بقوة في الفترة القادمة، وإن كان في رأينا أنه كان من الأفضل ينزل الفيلم بعد موسم العيد والضجة اللي بتحصل فيه.
الفيلم من تأليف أحمد مراد في أول أعماله المكتوبة خصيصا للسينما. مراد قدم قبل كده أعمال مهمة زي فرتيجو اللي تحولت من رواية لمسلسل، والفيل الأزرق اللي تحولت من رواية لفيلم. لكن الأصليين هو أول سيناريو يكتبه مراد للسينما مخصوص.
إخراج الأصليين لمروان حامد، وهو أيضا نفس مخرج فيلم الفيل الأزرق اللي كتبه مراد، ولما نعرف أن البطولة من نصيب خالد الصاوي اللي قام ببطولة الفيل الأزرق هانعرف أننا أمام ثلاثي بيعيد قصة نجاحه من جديد. وده سبب مهم لانتظارنا الأصليين في السينمات.
الأصليين بيحكي عن رجل أسمه سمير عليوه بيقوم بدوره ماجد الكدواني، بتتغير حياته رأسا على عقب لما بيقابل رجل مجهول هو خالد الصاوي.
بيشارك الصاوي في البطولة ماجد الكدواني ومنه شلبي وكنده علوش ومحمد ممدوح.
اعلان الفيلم
https://www.youtube.com/watch?v=F6NM0r1JYeU
جواب اعتقال
ومن جو الغموض والفلسفة لأجواء الأكشن والحركة، والمرة دي مع محمد رمضان، واحد من أشهر وأهم أبناء جيله من الفنانين. واللي قرر يخوض السباق السينمائي في العيد مع المخرج محمد سامي واللي ألف أيضا أحداث الفيلم، واللي بتدور عن شاب بيحاول ينتقم من جماعة إرهابية تابعة لجماعات الإسلام السياسي. الشاب بيجد نفسه فجأة في صراع ومطاردة بين الشرطة وبين رجال الجماعة، فهل هايقدر يفلت من الفخ المزدوج؟
بيشارك محمد رمضان في بطولة الفيلم دينا الشربيني و إياد نصارو سيد رجب و محمد عادل و وليد فواز
اعلان الفيلم
https://www.youtube.com/watch?v=0vJCMNr3Tlg
هروب اضطراري
مين ممكن يواجه محمد رمضان في ميدان أفلام الأكشن غير أحمد السقا؟ ملك المشاهد الصعبة والشقلبات والمشاهد الخطرة.
السقا بيشارك في سباق العيد بفيلم من إخراج أحمد خالد موسى وتأليف محمد سيد بشير.
هروب اضطراري بيحكي عن شابين بيتورطوا في جريمة قتل ابن رجل أعمال مشهور، وعلشان يثبتوا برائتهم لازم يهربوا ويمارسوا حياة الخارجين عن القانون. فهل هايقدروا يثبتوا الحقيقة أم هايتعرضوا لعقوبة الإعدام؟!
بيشارك السقا في بطولة فيلمه الجديد غادة عادل و أمير كرارة و مصطفى خاطر و فتحي عبدالوهاب و محمد عادل.
اعلان الفيلم
https://www.youtube.com/watch?v=kRiQRPHC9O4
عنتر ابن ابن ابن ابن شداد
ومن الأكشن للكوميديا، ومع إسم فيلم طويل شويه (عنتر ابن ابن ابن ابن شداد) واللي يبدو أن صاحبه محمد هنيدي أصبح بيتفائل بأسماء الأفلام الطويلة بعد نجاح فيلمه (رمضان مبروك أبو العلمين حموده). هنيدي بيوعدنا بجرعة كوميدية عالية بيشاركه في تقديمها درة و باسم سمرة و إيمان السيد و علاء مرسي و لطفي لبيب.
الفيلم من تأليف أيمن بهجت قمر ومن إخراج شريف إسماعيل. وبيحكي عن شاب بينحدر من سلالة عنتر بن شداد المقاتل الشهير، لكن الاختلاف الكبير بين عنتر وصورته الأسطورية في أذهاننا وبين شكل محمد هنيدي بيخلقوا عدد ضخم من المواقف الكوميدية.
إعلان الفيلم
https://www.youtube.com/watch?v=R9mJQjjs3Cg
تصبح على خير
وأخيرا ومع أخر أفلام عيد الفطر، فيلم تصبح على خير من بطولة المطرب تامر حسني وإخراج وتأليف محمد سامي وهو ثاني عمل له يخرجه ويألفه بعد جواب اعتقال اللي بنشوفه في سباق العيد السنة دي.
الفيلم كوميدي رومانسي فانتازي بيحكي عن شاب بيعاني من مشكلات في حياته وبيلجأ لحلها من خلال الدخول في عالم الأحلام.
بيشارك تامر في البطولة دره ونور ومي عمر ومحمود البزاوي وأحمد زاهر.
اعلان الفيلم
https://www.youtube.com/watch?v=OyZkmUtxtZU
