أفلام تناولت أوبئة وأمراض خطيرة

لو فاكرين أن وباء كورونا هو السيناريو الأسوأ لانتشار وباء. نحب نقولك أن السينما قدمت سيناريوهات أخطر من دي بكتير.

في الموضوع ده هانستعرض معاكم أشهر الأفلام اللي تناولت أوبئة وأمراض خطيرة. لو بتحبوا النوع ده من الأفلام نوعدكم بقضاء سهرة لا يمكن نسيانها!

Contagion

إذا ذكرت الأوبئة والأمراض لازم نفتكر فيلم Contagion اللي بيحكي عن وباء بينتشر بسرعة الصاروخ، ومحاولة مجموعة من المواطنين الأمريكيين على اختلاف توجهاتهم مواجهة الوباء والاحتفاظ بحياتهم في نفس الوقت.

وعلى الرغم من أن الفيلم من أنتاج ٢٠١١ لكن ناس كتير تذكرته من جديد بالتزامن مع انتشار كورونا لتشابه جزء كبير من أحداثه مع الأحداث اللي بنشوفها دلوقت.

Inferno

الجميل في Inferno أنه بيناقش قضية انتشار الوباء من ناحية فلسفية بحته. يمكن علشان الفيلم مقتبس عن رواية دان براون الشهيرة بنفس الأسم

Inferno بيورينا مغامرة البروفيسور روبرت لانجدون علشان يوصل لفيروس خطير قبل انتشاره وقضاؤه على البشرية.

كان لازم نفتكر Inferno خاصة مع أنباء إصابة توم هانكس بطل الفيلم بفيروس كورونا. واللي بنتمنى له الشفاء العاجل.

10 Cloverfield Lane

الجميل في 10 Cloverfield Lane أنه مش بيتكلم عن الوباء أو الفيروس بشكل مباشر. يعني مش بنشوف مشاهد بشعة وكده. لكننا بنشوف حياة البشر بعد انتشار الفيروس. وايه اللي ممكن يحصل لثلاث أشخاص في مخبأ مخصص للعزل تحت الأرض؟

Bird Box

وأخيرا ولمحبي انتاجات نتفليكس، عندنا Bird Box اللي بيحكي عن وباء بيقتل الناس اللي مفتحه عنيها! ومن هنا بنشوف مغامرة ساندرا بولوك علشان تنقذ نفسها وحبايبها. لكن كل ده وكلهم مغميين عينهم!

Bird Box حقق ضجة كبيرة لما صدر، مش بس لأنه بيتكلم عن وباء غامض، لكن علشان الفيلم له ابعاد إنسانية واجتماعية وحتى سياسية كبيرة جدا.