الانيميشن المصري في رمضان ٢٠١٦
فن الأنيميشن أو الكارتون من الفنون السينمائية الجميلة اللى بيستمتع بيها الصغار والكبار على حد سواء، خاصة لو كانت مُتفذة بإتقان ومعموله بحب وفيه فنانين مؤمنين بأهمية اللى بيقدموه.
فى الموضوع ده هانستعرض معاكم مسلسلات الكارتون اللي هاتتعرض فى رمضان السنة دي، وأثناء إستعراضنا للمسلسلات هانستعرض كمان معاكم تاريخ الأنيميشن المصري، وأهم الأسماء اللى أثرت فيه وأثرت محتواه خلال السنين اللى فاتت.. الموضوع ده للكبار والصغار مع بعض!
- بكار
مسلسل بكار واحد من أشهر مسلسلات الأنيميشن فى مصر والوطن العربي، بدأ عرضه سنة 1989 بشخصيات رئيسية هى شخصية (بكار) الطفل النوبي الأسمر الذكي، وأصدقاؤه ومعزته (رشيدة) واللى كانت بتكلم الناس عادي! وكان المسلسل بيستعرض مغامرات بكار واللي كانت بتعجب الصغار والكبار، لإن المسلسل بالإضافة لتعليمه الأطفال أخلاق مهمة زي عدم الكذب أو حب الخير، كمان كان بيشجعهم على البحث والإستكشاف والمغامرة، شخصية بكار كان واقف وراها مخرجة رسوم متحركة عبقرية هى الدكتورة مني أبو النصر.
والحقيقة إن د. مني تستحق فقرة كاملة للكلام عنها لدورها الكبير فى إثراء الأنيميشن المصري، وهى من مواليد 1952 وحصلت على دكتوراة فى فى الرسوم المتحركة من جامعة كاليفورنيا بأمريكا سنة 1988 ورجعت مصر علشان تقدم مسلسل الأنيميشن (رحلة السندباد البحري) و (سوبر هنيدي) و (بكار)، لكن مسيرة د. مني توقفت سنة 2003 لما توفت بعد صراع مع مرض السرطان.
الموسم الجديد من بكار ها يتعرض فى رمضان السنة دي حصرياً على قناة النهار ومن تأليف عمرو سمير عاطف.
- عصام والمصباح
بعد 4 سنوات من عدم تقديم جزء جديد من الانيميشن المصري (عصام والمصباح) بيعود الفنان الكبير مصطفى قمر من جديد لتقديم شخصية (عصام) فى الجزء الثالث من المسلسل الكارتوني الشهير.. الأنيميشن بيحكي عن مغامرات (عصام الدين) الشقيق الأصغر لعلاء الدين المشهور، واللى بينتظر الحصول على مصباح سحري زي أخوه، فقط علشان تبدأ سلسلة من المغامرات واللى بتحتل زمن المسلسل بالكامل.. بيشارك فى الأداء الصوتي فى الموسم الجديد من المسلسل انجي وجدان ونسمة محجوب ومحيي اسماعيل.
- سمعه أخر حاجه
من إنتاج شركة (صوت القاهرة)، ويعتبر محاولة لإعادة إحياء الفنان المتميز إسماعيل يس من خلال تقديمه كشخصية كارتونية مصممة بطريقة ثلاثية الأبعاد 3D لإعادة تقديم أهم لحظاته السينمائية فى الأفلام المختلفة، كمان هانشوف (سمعه) وهو فى أيامنا الحالية وبيستعمل سماعات البلوتوث والتليفونات المحمولة، وغيرها من المفجأت اللى أعلن عنها برومو المسلسل واللى هايتعرض يوميا فى رمضان الحالي على التليفزيون المصري.
- كلمتين وبس
ولسه مع التليفزيون المصري، ومسلسل كلمتين وبس والمعتمد على مناقشة المشاكل الإجتماعية اللى كان بيناقشها الفنان الراحل فؤاد المهندس فى برنامجه اللى كان بيحمل نفس الإسم زمان… ومن الواضح من برومو المسلسل إنه بيناقش قضايا زي الدجل والشعوذة والثقافة وضرورة وجود مكتبة فى كل منزل، ومشاكل الشباب المراهق وكتير من المشاكل الإجتماعية التانية.
- الأزهر
أما أخر المسلسلات اللى بيقدمها التليفزيون المصري السنة دي هو مسلسل الأزهر، واللى يعتبر مسلسل رسوم متحركة، ثلاثي الأبعاد، يستعرض تاريخ الأزهر الشريف منذ تأسيسه عام 972م فى عهد القائد جوهر الصقلي والدولة الفاطمية، مرورًا بدولة المماليك، وصولًا إلى الدولة العثمانية، ثم حكم محمد علي، وحتى قيام ثورة 1919م ومن بطولة سوسن بدر واياد نصار وعبد الرحمن أبو زهرة وهو إنتاج مشترك ما بين الأزهر الشريف وأكاديمة البحث التكنولوجي.
- عائلة رمضان كريم
ولإن الأحلي دايما بنخليه للأخر.. السنة دي بيشارك الفنان الجميل أشرف عبد الباقى بمسلسل أنيميشن بعنوان عائلة رمضان كريم وبيشارك (عبد الباقي) فى البطولة اسماعيل معوض و حسن حسني.
المسلسل بيحكي عن شهر رمضان والعادات الإجتماعية اللى بتحصل فيه زي الدورات الرمضانية والعزومات وموائد الرحمن وغيرها من الأحداث اللى بيناقشها المسلسل فى إطار كوميدي ساخر جميل.
الأنيميشن المصري رحلة طويلة من محاولات الإبداع وتوظيف التقنية الحديثة لإنتاج أعمال قادرة على المنافسة وجذب إهتمام الكبار قبل الأطفال، بعض المحاولات بتفشل لكن كتير منها بينجح وبيسيب جوانا ذكريات جميلة عن أيام أجمل.. وكل أنيميشن وانتوا طيبين فى رمضان!
