السينما الإيطالية:Winx Club – A magical Adventure
فى الواقع، إحنا بـ نشجع على مشاهدة الأفلام غير الهوليودية، وكان نفسنا يكون تشجيعنا ده لصالح الأفلام العربية، لكن الواقع المأساوى اللى بـ تعيشه السينما فى مصر بـ تخلينا نفكر أكثر من مرة قبل ما نشجع على مشاهدة السينما بتاعتنا! بالتالى مش بـ يتبقى أمامنا غير التشجيع على مشاهدة الأفلام غير الهوليودية زى فيلم النهارده، ومش بعيد نبدأ قريبًا نشجع على مشاهدة الإنتاج التركى اللى بدأ يغزو عالم الأفلام بخطوات قوية زى ما اكتسح التليفزيون والإنتاج الدرامى بشكل يحط إنتاجنا المصرى فى مقارنة مزعجة.
الفيلم من إخراج وتأليف أجينو سترافا، إيطالى الجنسية وصابغ الفيلم بتاعه بصبغة رومانسية حالمة من النادر أننا نشوفها فى كثير من الأفلام فى قاعات العرض اليومين دول. بذكر قاعة العرض، للأسف عدد المشاهدين ما كانش كثير زى ما توقعنا، وكان معظمها من الأطفال اللى فرحنا أن عينهم بدأت تتعود على أسلوب جديد فى المونتاج والإخراج غير الأسلوب الهوليودى.
الفيلم بـ يحكى عن رحلة مدهشة لأميرة لمملكة مفقودة اسمها مملكة دومينو، بـ تقرر الملكة البحث عن أهلها الحقيقيين، رحلتها مش سهلة، لكن فتيات الوينيكس بـ يساعدوها فى رحلة بحثها الحثيثة. قصة ممكن تبدو بسيطة، لكن أداء ليتزيا كيمبا فى دور بلوم وتيدى ديلون فى دور أندروس وماركو فيفيو فى دور ريفين وأمليانو كولتو فى دور سكاى ساعدوا على إكساب القصة والأداء جزء من الإيقاع الساحر.
الموسيقى كانت رائعة والعرض بتقنية الـ 3D كان ثرى ورائع، ومن زمان ما شوفناش فيلم بالإبهار ده.
من الآخر.. قد تكون التجربة السينمائية الإيطالية ناقصها عوامل كثير، لكن الابتعاد عن هوليود يخليها تستحق نعطيها أكثر من فرصة.
