الطاهى : فشل طبخة سينمائية

مين قال ان مفيش علاقة بين الافلام وبين الطبخ؟ العلاقة وثيقة  .. فيه افلام تقيلة وافلام خفيفة، وفى افلام تحس انها مطبوخة بمزاج وعلى رواقة، وافلام تحس انها مطبوخة بسرعه وعن استعجال، الافلام زى الطبخ يا سادة ، والاستوديوهات زى المطابخ ، والمخرجين زى الشيفات والممثلين زى الجارسونات

وبما اننا اقتنعنا ان الافلام زى الطبخ ، وبما ان فيلم ” الطاهى ” بيتناول عالم المطابخ هل نقدر نوصف الفيلم بطريقة ليها علاقة بعالم الطبخ؟

الفيلم كنا متوقعين انه يكون سخن وشهى ومطبوخ بعناية وانه يقدم لنا جرعة عظيمه من الضحك الراقى المعتمد على المواقف الكوميدية مش مجرد القاء للايفيهات، الا ان للاسف الفيلم انطبخ بسرعة وتم تقديمه بدون اهتمام فا كانت النتيجة انه اصبح بارد والناس بعدت عنه ، لدرجة ان القائمين على السينما قالولنا ان الفيلم من يوم نزوله ما شافوش غير عدد قليل من الناس، كمان احنا كنا الوحيدين فى قاعة العرض فى اليوم اللى شوفنا فيه الفيلم

جان رينو بيلعب دور شيف من اشهر شيفات العالم اسمه الكساندر لاجارد، بيتعاون مع جاكى اللى لعب دوره ميشيل يون علشان يفضل محتفظ بشهرة مطعمه العالمية ويحتفظ جاكى بزوجته اللى ربنا بيرزقها بطفل جديد بيحتاج منه مصاريف أكبر

رغم ان ايقاع الفيلم واقع، ورغم ان كتير من عناصر الفيلم مش بالقوة اللى كنا متخيلينها ، الا ان  الديكورات والموسيقى  كانت جميله اوى ، وفيها لمسة فرنسية مميزة ومحبوبة، والديكورات قربتنا اكتر من جو الفيلم ، خصوصا ديكورات المطابخ والاسواق والتصوير الخارجى بشكل عام

جان رينو ممثل احنا بنحبه، يمكن مش بندوب عشقا فيه لكن فاكرين له كتير من الادوار الجميلة، لكنه فقد كتير من سحره فى فيلم “الطاهى” قد يكون ده فشل من المخرج وقد يكون بسبب التقدم فى

السن

the chief فيلم كان المفروض “ينطبخ” احسن من كده .. شوفه فقط فى حالة لو كنت جعان 🙂