القرد بيتكلم: أكشن ومطاردات وسحر وحركات!

من الواضح أن الإسلوب الإخراجي للمخرج بيتر ميمي بيتصاعد يوم بعد يوم، وبيكتسب أرض جديدة ومساحات أكبر من الإبداع، وبدل ما كنا زمان بنعتبر وجود أسم ميمي على فيلم علامة من علامات الأفلام التجارية الغير متعوب فيها، مع عرض مسلسل الأب الروحي وفيلم القرد بيتكلم… ممكن فكرتنا تختلف شويه.

القرد بيتكلم من بطولة أحمد الفيشاوي وعمرو واكد وريهام حجاج، بالأشتراك مع بيومي فؤاد وسيد رجب وليلي عز العرب.

الفيلم بيحكي عن الشقيقين طه ورشاد الشناوي، واللى بيتجمعوا مع بعض بعد 3 سنين من الأفتراق، علشان ينفذوا حيلة سحرية قوية وبتمتد علي مدار أحداث الفيلم كله، لسبب بنعرفه كمشاهدين فى تتابعات الأحداث فى الربع الأخير من الفيلم.

الأداء التمثيلي لأحمد الفيشاوي وعمرو واكد  نقدر نقول أنه كان مقبول، وكان من الواضح تفوق  الفيشاوي على واكد فيما يتعلق بالأداء التمثيلي، مع الوضع فى الأعتبار أن كلا النجمين مكانش فى (الفورمه) المناسبة علشان يقدروا يطلعوا أفضل ما عندهم خلال أحداث الفيلم.

كان من الواضح أن عمرو واكد مش مذاكر الشخصية كويس، وألقاؤه للجمل الحوارية كان ضعيف ومصطنع، على العكس من أحمد الفيشاوي اللى بيؤكد فى كل فيلم بيقوم بيه على قدرته على التعايش مع الشخصية اللى بيقدمها، وإن كان دوره فى القرد بيتكلم مش واحد من أقوي الأدوار اللى قدمها مؤخرا.

ريهام حجاج بتستمر فى مسلسل السقوط الفني بالتصوير البطىء.. ومن الواضح أن أختياراتها فى الأدوار اللى بتقوم بيها غير موفقة بالمرة، والحقيقة مش عارفين ليه بتصر موهبة حقيقية وقوية زيها على تقديم أدوار مساندة وضعيفة وهامشية، والأسوأ أنها بتقدم الأدوار دي بشكل ضعيف وبدون اقتناع.

الفيلم بيتميز بقوة فيما يتعلق بالحبكة والسيناريو، على الرغم من تأثره بفيلم أجنبي زي Now you see me لكن الفيلم قدر يطور حبكته الشخصية ومايتحولش لمجرد تمصير لفيلم أجنبي، وده كان المميز على صعيد القصة والحبكة.

مشاهد المطاردات فى الفيلم كانت متميزة، لكن مشاهد السحر كانت محتاجه تكون أقوي من كده، كمان الموسيقي التصويرية كانت سيئة جداً وكانت محتاجه يتم تغييرها بالكامل لموسيقى أكتر مناسبة للأحداث.

القرد بيتكلم فيلم خفيف وظريف، وبيقدم أكشن وحبكة وشغل سحر وخدع لا بأس بيهم، ونقدر نعتبره تسلية مناسبة على مدار ساعتين… استمتعوا بيهم.

علشان تبقي عارف: مخرج الفيلم بيتر ميمي هو مخرج فيلم الهرم الرابع ومسلسل الأب الروحي اللى بيعرض حاليا على قنوات DMC.