باباراتزي . للحب حكاية : حكايه مفبركه وفيلم ضعيف
الباباراتزي هم مصورين الفضائح اللى بيتتبعوا اهل الشهرة والفن من مكان لمكان فى محاولة للحصول على صورة فاضحة او ملف فيديو يوضح حقيقة شىء غامض فى الحياة الخاصة للفنان.. المصورين دول دائما مكروهين على الرغم من ان الناس بتستمتع بالصور اللى بيبيعوها لجرائد ومجلات ومواقع الكترونيه بمئات واحيانا الاف الجنيهات.. ويمكن اشهر واقعة تم لوم (الباباراتزي) عليها هى واقعة وفاة الاميرة ديانا، لما تم اتهام مصوري الباباراتزي بافقاد السائق تركيزه نتيجة كثافة الفلاش الخاص بالكاميرات…
المهم بقى… فيلم اليوم مالوش اي علاقه بالباباراتزي! اللهم الا بعض المشاهد فى بداية الفيلم، ومحاولة ساذجة فى النهاية لاظهار دور مصورة الباباراتزي بشكل ايجابى فقط علشان الفيلم يستحق اسمه.. ومن باب الاحتياط اطلقوا على الفيلم اسم تاني هو (للحب حكايه) واهو بالمره يتم عمل اغنيه لرامي عياش بطل الفيلم بنفس الأسم!
الفيلم من اخراج سعد هنداوي وتاليف احمد عبد الفتاح وبيشارك المطرب رامي عياش البطولة، الممثلة الشابة ايمان العاصى، واللى على الرغم من جمالها لم تقدم اي شىء على مستوي التمثيل، وللاسف ايمان كانت من المواهب اللى كان عندنا امل كبير بخصوصها، لكن يبدو ان موهبتها لم تكن بنفس حجم جمالها الشكلي.
الفيلم بيحكي عن مطرب لبناني مشهور بيقع فى غرام بنت مصريه والدها شخصية شهيره فى حزب ديني فى فترة اقتراب الاحزاب الدينية من البرلمان والرئاسه، ومع تطور الأحداث بيرفض الاهل قصة الحب وبيحاولو بكل الطرق منع (ايمان) من حبيبها لصالح جوازه تانيه بيختلط فيها البيزنس بالسياسة.
قصة محفوظه ومكرره الف مره، وللاسف لم يتم تقديم اي جديد على الصعيد الاخراجي يعوض النمطيه الشديده للقصة، اللهم الا بعض مشاهد المطاردات ومشهد سيارة بتطير فى الهواء كان عندنا امل يكتمل بشكل جيد للنهاية لولا فشل الخدع السينمائية فى مشهد الحريق فى اخراجه بشكل ملائم!
الأداء التمثيلي صفر كبير… صفر ضخم على الشمال لرامي عياش واللى نقدر نغفر له فشله التمثيلي بحكم نجاحه الغنائى، اما ايمان العاصى اللى اخدت فرص كتير ولم تثبت نفسها فى اي فرصه فيهم فلا عذر لها عندنا، اما عزت ابو عوف واللى كان واضح جدا عليه تاثير المرض، وعدم قدرته على نطق 90% من الجمل الحواريه الخاصه به فى الفيلم نتيجة ارهاقه الشديد اللى كان واضح فى كل مشهد، واللى جعل الجمهور مشتت مابين الاشفاق عليه او السخريه من اداؤه التمثيلي.. احنا عن نفسنا كان عندنا احساس ضخم بالشفقه على واحد من اهم واكبر ممثلي جيله.. ربنا يقومه بالسلامه.
الاغاني فى الفيلم كانت كويسه بحكم ان رامي عياش هو البطل، وقدر يقدم اكتر من اغنيه كويسه ومتميزه، لكن بعض الاغاني كانت قصيره ومبتسره، والاغنيه الاخيره فى الفيلم تم غنائها اكتر من مره لدرجه اثارت ضيق الجمهور نفسه، لكن تظل الاغاني هى احسن الوحشين فى الفيلم.
باباراتزي او (حكايه حب) فيلم سىء جدا.. ولا ننصحكم بمشاهدته فى السينمات… او التليفزيون!
