بلاش تبوسني: تاريخ القبلات في السينما المصرية

بنحب الأفلام العربية اللي بتقدم تجربة سينمائية مختلفة، ومش مجرد فيلم عادي. صحيح ده يعتبر مغامرة لأن مش كل المشاهدين بتتقبل الأنواع دي من الأفلام بسهولة، لكن اللي بنلاحظه مؤخرا يوم بعد يوم أن تقبل المشاهد العربي للتجارب والمغامرات السينمائية بيزيد مش بيقل.. تعالوا نتعرف أكتر على (بلاش تبوسني)

القصة

بلاش تبوسني بيحكي عن الممثلة السينمائية فجر واللي بتقوم بدورها ياسمين رئيس واللي بترفض تأدي مشهد القبلة في فيلم هو الأول أخراجيا لمخرجه، لكن رفض فجر للبوسة بيفجر كتير من المواقف والأحداث، وبيستعرض الفيلم كمان تاريخ القبلات في السينما المصرية بشكل عام.

فريق العمل

الفيلم من تأليف وإخراج أحمد عامر وبطولة ياسمين رئيس و وسوسن بدر والفت امام و محمد مهران وعايده رياض و سلوى محمد علي مع ظهور لمحمد خان – الله يرحمه- و خيري بشارة بأشخاصهم الحقيقية كضيوف شرف.

الأداء التمثيلي

ياسمين رئيس في دور البطولة قدرت تقدم الدور بشكل جيد. وفى اعتقادنا أن ياسمين حاليا في مرحلة أنها بتجرب نفسها وبتجرب قدرتها على أداء شخصيات مختلفة وأعمال مختلفة، والحقيقة أننا بنحب وبنشجع ميل ياسمين للمغامرة والتجربة واكتشاف حدود قدراتها التمثيلية اللي واضح أنها واسعه وكبيرة.

السيناريو والحوار والأخراج

سيناريو الفيلم سهل المتابعة وواضح المعالم، لكن الناس اللي مش بتحب السينما كصناعة، أو مش بتحب عالم ما وراء الكواليس ممكن تشعر ببعض الملل من بعض التفاصيل والأحداث، لكن بشكل عام الفيلم يعتبر تجربة جديدة ومختلفة من صناعه.

الديكورات والموسيقى والأزياء

ديكورات الفيلم والموسيقى التصويرية الخاصة به كانت جيدة وعلى مستوى عالي وقدرت تنقلنا مكانيا وبصريا لأماكن الفيلم، وساعدت على شعورنا النفسي الصحيح بالشخصيات اللي بتقدم بطولة الأحداث

الخلاصة

فيلم بلاش تبوسني يعتبر تجربة سينمائية جديدة، هايحبها محبي السينما كفن وصناعة على حد سواء

علشان تبقى عارف:

شارك الفيلم في مسابقة (ليال عربية) ضمن فعاليات مهرجان دبي السينمائي الدولي 2018.