بين بحرين: بين عالمين في مصر
ناس كتير مكونه فكرة عن الأفلام اللي بتشارك في مهرجانات أنها بتكون مملة وغير صالحة للمشاهدة الجماهيرية. بعض الأفلام قدرت تخرج عن القاعدة دي وتقدم أفلام قوية وقادرة على المنافسة الجماهيرية والفنية في نفس الوقت. و (بين بحرين) يعتبر من الأفلام دي.
بين بحرين بيحكي عن قصة معاناة المرأة بشكل عام في مصر. وبيناقش مجموعة من القضايا المثيرة للجدل زي الختان والزواج المبكر وغيرها من القضايا من خلال قصص بطلاته، واللي بتتقاطع مع بعضها علشان تنسج في النهاية توب مُحكم بيخلينا نعرف في النهاية إيه هو سبب مشاكل قطاع كبير من الستات في مصر..واللي في رأينا هو الجهل والفقر.
الجميل في قصة مريم نعوم أن أبطالها مافيهمش أشرار وطيبين. الكل بيرتكب تقريبا نفس المستويات من الأخطاء ولو بأشكال مختلفة. حتى لو بالعجز والصمت وعدم القدرة – أو الرغبة – في الدفاع عن النفس.
الأداء التمثيلي لكل ابطال الفيلم تقريباً كان مميز، فاطمة عادل بنشوفها في دور زهرة، والحقيقة أن دي مش أول مرة فاطمة تقدم أداء قوي، وسبق وشوفناها في دور مميز في مسلسل سجن النسا اللي كتبته مريم نعوم برضو. فاطمة المرة دي بتطل علينا بأداء أكثر احترافية ونضج. نفس حالة النضج اللي شوفناها عند يارا جبران في دور سمية، واللي قدمت هي كمان دور هايخلينا فاكرينها وبندور عليها في أدوارها التانيه.
ماينفعش ننسى ثراء جبيل وعارفه عبد الرسول و كل من شارك في الفيلم الحقيقة قدم أداء متميز وقوي.
لو كنتم من أصحاب النفوس المرهفة الفيلم ممكن يحسسكم ببعض الاكتئاب. وممكن ماتقدروش تمسكوا دموعكم في بعض المشاهد، ومش عارفين دي ميزة ولا عيب في إخراج أنس طلبة للفيلم لكن الأحداث قادرة تمس قطاع واسع من المشاهدين خاصة من الجنس الناعم.
بين بحرين بيستعرض مجموعة من السيدات في مصر، بين عالمين مختلفين تماما.. فيلم يستحق المشاهدة والانتباه. شوفوا الفيلم وشاركونا رأيكم
