تحب مين يقدم شخصية رجل المستحيل في السينما؟
لو كنت من مواليد الفترة من أواخر السبعينات الى أوائل التسعينات. تبقى من الجيل المحظوظ اللي عاصر مشروع (المؤسسة العربية الحديثة) للنشر والتوزيع. واللي أطلقت مجموعة من سلاسل الروايات للجيب. سلاسل زي ما وراء الطبيعة – للكاتب الراحل أحمد خالد توفيق- أو كوكتيل أو زهور. لكن أقوى سلسلة من السلاسل دي كانت سلسلة روايات (رجل المستحيل).
سلسلة روايات رجل المستحيل كانت بتحكي عن ضابط مخابرات مصري اسمه أدهم صبري. بيتكلم مجموعة لغات وبيتقن مجموعة مهارات غير عادية. بالأضافة لقدراته على صنع ماسكات التنكر وتغيير صوته علشان يقدر ينجز مهمات أقرب للمستحيل.
السلسلة حققت نجاح كبير وارتبطت بها أجيال وأجيال من الشباب. ولحد النهردة بيتم اصدار أعداد خاصة من السلسلة. ومن هنا جاء اهتمام السينما بتقديم شخصية أدهم صبري على الشاشة. علشان كده بدأ الدكتور نبيل فاروق في استطلاع رأي الشباب على موقع (تويتر) للتواصل الأجتماعي علشان يشوف مين أفضل فنانين ممكن تقوم بالدور.
من أهم الأدوار اللي هاتكون في الفيلم هي شخصية (قدري) خبير التزوير واللي بيمتاز بجسمه المليان وعقله العبقري وايده اللي (تتلف في حرير) وتقدر تزور جوازات السفر والبطاقات الشخصية والأوراق بمنتهى الأحترافية. لكن مين هايقدم شخصية قدري على الشاشة؟
الدكتور نبيل فاروق قال أن من ضمن المرشحين للدور الفنان (مراد مكرم) مقدم برنامج (الأكيل) بينما أقترح بعض المتابعين ماجد الكدواني للقيام بالدور. أما دور منى زميلة أدهم -وحبيبته- فا أحتار المتابعين مابين منى زكي وكنده علوش أو أمينة خليل. وغيرهم من بطلات الصف الأول في مصر.
وأخيرا مع الشخصية الرئيسية للعمل. شخصية أدهم صبري. واللي رشح لها المتابعين أسماء كتير جدا من بينها أحمد عز وأحمد السقا ويوسف الشريف وأسر ياسين وأحمد العوضي وكريم عبد العزيز ومصطفى شعبان وغيرهم من الفنانين.
وبعد أيام من التداول – وحتى الاختلافات والخناقات- بين مستخدمي تويتر وبعضهم على الشخصية اللي تنفع في البطولة. تم طرح الموضوع في استفتاء وكانت الأسماء المتاحة هي:
أحمد عز – يوسف الشريف – أسر ياسين – أحمد العوضي
وفي النهاية تقدم الدكتور نبيل فاروق بالشكر للمشاركين في التصويت وقال أن كل الأراء هايتم أخذها في الاعتبار وفق حسابات الإنتاج السينمائي والفني وباقي الاعتبارت اللي بتقوم عليها الأفلام السينمائية.
والمميز في الموضوع أن رجل المستحيل – اللي بيكتب الفيلم أحمد مراد اقتباسا عن روايات الدكتور نبيل – مش هو العمل الوحيد اللي هانشوفه قريب من اعمال د. نبيل فاروق. لكنه كمان أعلن عن اقتراب تحويل رواية (أرزاق) اللي تم نشرها في سلسلة كوكتيل لعمل درامي هانشوفه قريب. وده خبر كويس جدا.
وسؤالنا ليكم… لو من محبي ومتابعي شخصية أدهم صبري أو رجل المستحيل. تحب مين يقدم الشخصية على الشاشة؟ ولو بتسمع عن رجل المستحيل لأول مرة. تحب مين يجسد شخصية ضابط مخابرات استثنائي على الشاشة؟
