خمس أفلام تساعدك على الإجابة: ليه يا زمان ما سيبتناش أبرياء؟!
الزمان هو ١٥ ديسمبر.. قبل نصف شهر من بداية السنة الجديدة ٢٠٢٣ والمكان هو المقر السري لموقع كايرو ٣٦٠. حيث فريق العمل بيشتغل علشان يقدم لكم مُحتوى مفيد وممتع وحديث. وده بيخلينا في سباق مع… الزمن.
بمناسبة الكلام عن الزمن.. نقدر نقول أن الزمن هو التحدي الأكبر اللي قابله البشر منذ بدء الخليقة. علشان يفهموه ويطوعوه لصالحهم. لأن البشر كانوا شايفين الزمن زي قطار بيسير في اتجاه واحد فقط. في رحلة ذهاب بدون عودة. لحد سنة ١٩١٦.
ومنين بيجي الشجن .. من اختلاف الزمن
ومنين بيجي الهوى .. من ائتلاف الهوى
في السنة دي بدأ العالم الشهير ألبرت اينشتاين، ينشر أبحاثه عن الوقت والزمن، وقدر يثبت، أن الزمن مش بس بيمشي في اتجاه واحد، وأننا لو تحركنا بالسرعة الكافية، هانقدر نتحرك في الزمن. وده مُختصر بسيط عن نظرية النسبية اللي اكتشفها اينشتاين. وحفزت ألاف العلماء أنهم يشتغلوا على الفرضية دي.
بس العلماء مش الوحيدين اللي اتغيرت فكرتهم عن الزمن. الفنانين والمبدعين هم كمان عبروا عن اختلاف نظرتهم للزمن في أعمالهم. وفي لوحته الشهيرة إصرار الذاكرة – أو ثبات الذاكرة- بيورينا الرسام العالمي سلفادور دالي نظرته لنسبية الزمن من خلال رسم ساعات هشة ولينة، في تعبير واضح أن الزمن هو كمان أصبح قابل للتغير.
صُناع الأفلام اشتغلوا على فكرة نسبية الزمن، وقدموا لنا أعمال رائعة لعبت على الفكرة دي. بأكتر من تيمة.
The Curious Case of Benjamin Button
سنة ٢٠٠٨ استقبلت السينمات فيلم مُدهش بعنوان The Curious Case of Benjamin Button ومن بطولة براد بيت و كيت بلانشيت، عن قصة حقيقية لمريض بمرض نادر جدًا، بتخلي الزمن بالنسبة له معكوس. بمعنى أنه بيتولد بملامح عجوزة، ثم يبدأ يمر بمرحلة الشباب ثم الطفولة!
الفيلم كان مدهش بجد من حيث تطويع المكياج والمؤثرات في إنتاجه. مش بس بمعايير ٢٠٠٨ لكن لحد دلوقت. ومش هاتقدروا تحبسوا دموعكم مع اقتراب الفيلم من النهاية.
ليه يا زمان ما سبتناش أبرياء
وواخدنا ليه في طريق ما منوش رجوع
Inception
بعد ٢٠٠٨ بسنتين، كريستوفر نولان كان بيعمل عظمه! كان بيقدم فيلمه Inception للسينمات. الفيلم بيناقش فكرة فانتازية، عن قدرة بعض الأشخاص أنهم يتدخلوا في أحلام الأخرين، ويزرعوا فكرة معينة في أدمغتهم. الفيلم استفاض في شرح نظريات لها علاقة بتغير الزمن بتغير الواقع. بمعنى أن حلم لمدة ٣ دقائق ممكن تحصل فيه أحداث تستغرق ٣ سنوات! ودي حاجه حقيقية احنا بنشوفها في أحلامنا. خاصة لو متقلين شويه في الأكل 😅
Interstellar
لسه مكملين مع كريستوفر نولان، اللي الزمن عامل له هاجس حقيقي، بيظهر في كل أعماله. وأهمها Interstellar اللي بيستعرض رحلة رائد فضاء خارج الأرض، وازاي الزمن مر عليه بشكل مختلف عن مروره على الأرض. الماستر سين المرعب في الفيلم، كان لما بطلنا رجع الأرض وشاف بنته وهي بتحتضر، بينما هو لسه شاب صغير في السن، لأن الزمن مر عليه بشكل مختلف عن مروره على الأرض!
دور يا زمن
وخدنا في دايرتك
وان عاكستك خطاوينا او سايرتك
هتدور بينا يا زمن.. هتدور ينا
وتجيب اخرنا ولا بنجيب اخرتك
الرقص مع الشيطان
قبل كل الأفلام دي، وتحديدا سنة ١٩٩٣ نور الشريف كان بيستعد لرقصة خاصة جدا.. رقصة مع الشيطان. في واحد من أفلام الخيال العلمي القليلة في السينما العربية. عن دكتور بيرجع من الاتحاد السوفيتي، بيكتشف نبات غريب، بيقدر يخليه يسافر عبر الزمن، سواء في المستقبل أو الماضي.
الميزة في الرقص مع الشيطان، أنه ناقش بتوسع وجهة النظر الفلسفية للسفر عبر الزمن، وقدم نظريات فلسفية ودينية وعلمية عميقة جدا للمشاهد العادي في إطار من الدراما المخلوطة بالأكشن والرعب. وفي رأينا أن الرقص مع الشيطان ما أخدش حظه من الشهرة والنجاح. زي كتير من أفلام الخيال العلمي العربية.
وينفلت من بين إيدينا الزمان
كأنه سَحبة قوس فى أوتار كمان
وتنفرط الايام.. عقود كهرمان
يتفرفط النور.. والحنان.. والأمان
The Terminator
ولأن صناع السينما عارفين أننا بنتفرج بغرض المتعة أولا وأخيرا، قدموا من خلال سلسلة The Terminator الشهيرة، فيلم أكشن عالمي بطولة أرنولد شوارزنيجر، عن ألة قتل بتعود للماضي علشان تتخلص من طفل.. لأنه هايكون زعيم المقاومة اللي هايغير العالم في المستقبل. ومحاولة المتمردين أنهم يفشلوا المخطط ده من خلال ارسال انسان ألي لنفس الفترة الزمنية لحماية الزعيم.
من بداية الخلق، ولحد نهاية العالم. الزمن هايظل محور تفكير واهتمام المبدعين والفنانين والشعراء. جنبًا الى جنب مع العلماء والفيزيائيين ورجال الدين والفلسفة.
أو زي ما قال عمنا العبقري سيد حجاب اللي بنختم بأشعاره زي ما استعرضناها معاكم في رحلتنا:
يا تري اللي بيعيش الزمن … إحنا
، ولاّ الزمن هو اللي بيعيشنا ؟!!
