خيال مآته : فيلم ما يعرفش الحلول الوسط!
بعض الأفلام ما فيهاش حلول وسط. يا تحبها قوي يا تكرهها قوي. وفيلم خيال مآته من الأفلام دي. أراء الناس خارج دور العرض كانت ما بين عاشق للفيلم ومابين كاره له تماما. إحنا هانحاول نوصل لكم إيه هي أسباب تكوين الانطباعات دي عن الفيلم.
خيال مآته اللي من تأليف عبد الرحيم كمال بيحكي عن يكن (أحمد حلمي) الإنسان البخيل، واللي بينفذ عملية سرقة مرتبطة بالسيدة أم كلثوم. وبعد سنين طويلة بيقرر يلجأ للسرقة تاني. المرة دي بالإستعانة بحفيده (أحمد حلمي برضو) اللي بنشوفه طوال الوقت في حالة مشاكسة رومانسية مع أسيا اللي قامت بدورها منه شلبي.
من حيث الحبكة والفكرة الفيلم بيتبع نفس السكة اللي بتمشي عليها معظم أفلام حلمي السابقة. الشخص اللي فيه صفة سلبية واللي بيمر بتجربه بيتغير بعدها تماما وبيشوف الدنيا بشكل مختلف.
الحبكة دي ممكن يطلع منها شغل كويس جدا. لكن السيناريو أخد الفيلم ودخل بيه في حيطه! وحسينا طوال الوقت أن السياق الدرامي اللي بتدور فيه الأحداث مش مظبوط خالص يعني الشخصيات اللي بنشوفها على الشاشة مالهاش خلفية تخلينا نحبها أو نكرهها او نتعاطف معاها حتى.
كمان إيقاع الفيلم كان بطىء قوي على عكس توقعاتنا ودي نلوم فيها المخرج خالد مرعي. بعض المشاهد الغير كوميدية كانت بتستمر لأطول من وقتها بكتير وبعض المشاهد اللي كان ممكن يطلع منها كوميديا كتير كانت بتخلص بسرعة ونحس أنها أتقطعت من سياقها!
حتى الكوميديا اللي المفروض تبقى الملعب الأساسي لأحمد حلمي، حسينا أن كانت المواقف الخاصة بالفيلم ممكن يطلع منها كوميديا أقوى بكتير من اللي شوفناها على الشاشة. حتى ستايل الكوميديا نفسه حسينا أنه قديم. وفكرنا شويه بأفلام زي مطب صناعي مثلا وغيرها من أفلام أحمد حلمي.
الكيمياء بين أحمد حلمي ومنة شلبي كويسة جدا. لكن لكن حسينا أن الكيمياء دي ماتمش أستغلالها بشكل جيد علشان نشوف في النهاية فيلم كويس.
ديكورات الفيلم ومكياجه – خاصة مكياج شخصية يكن- كان مميز جدا. لكن المشاهدين اللي مستنيين السنين اللي فاتت علشان يشوفوا جديد أحمد حلمي، واللي كانت توقعاتنا بخصوصه بتزيد يوم بعد يوم من الترقب. مكانوش متوقعين أنهم يتفرجوا على فيلم أحلى ما فيه المكياج! من هنا بييجي كراهية بعض المشاهدين الشديدة للفيلم.
أما لو ماعندكش أي نوع من التوقعات وعاوز تتفرج على قصة واضحة بدون تعقيدات كتير ومش متوقع تقع على الأرض من الضحك – لأن ده مش هايحصل- في الحالة دي ممكن يعجبك خيال مآته.
