دليل أفلام عيد الأضحي… بدل الخناق على شباك التذاكر
بنشوفهم كتير… شلة شباب واقفين محتارين مش عارفين يتفرجوا على ايه.. السينما زحمة والناس كتير وفاضل 3 دقايق على ميعاد الفيلم.. ولازم ياخدوا قرار قبل بداية الدخول علشان أحلى حاجه فى الفرجة على فيلم فى السينما… الإعلانات.
الناس اللى بنتكلم عنهم دول أكيد لسه لم يقرأوا دليلنا لأفلام عيد الأضحى 2016 علشان الدليل ده بيعرفكم وبالتفصيل قصة كل فيلم وفريق عمله وهو مناسب لأي شريحة بالظبط من الجمهور… شاركوا التقرير ده مع صحابكم اللى بتشوفوهم واقفين يتخانقوا فى السينما قبل بداية الفيلم بدقائق!
جواب اعتقال: جديد محمد رمضان
الفيلم ده بالذات عليه كلام كتير.. البعض بيقول إن الفيلم مش هايلحق سباق عيد الأضحي السنة دي بسبب ظروف التصوير وتوقيت العمل فى الفيلم، وإن عرض فيلم جيد فى موسم غير موسم عيد الأضحي أحسن بكتير من عرضه فى موسم العيد ومستواه يكون ضعيف، خاصة إن محمد رمضان أصبح نجم له أسم لامع ومش محتاج يعرض فى مواسم علشان يحقق نسبة مشاهدة.
الفيلم من إنتاج أحمد السبكى، وتأليف وإخراج محمد سامى، ويشارك فى بطولته إياد نصار ودينا الشربينى وصبرى فواز وسيد رجب ومحمد عادل بالإضافة لمحمد رمضان طبعا.
الفيلم بيحكي عن قصة شاب بيندمج فى أحد الجماعات الإرهابية، وبيقوم بالعديد من عمليات القتل، ولما بيتقتل أخوه على إيد الجماعات دي بيبدأ مخه فى الصحوة من جديد ومحاولة الإنتقام من الجماعة اللى قتلت أخوه، وفى نفس الوقت الهرب من الدولة اللى اصدرت بحقه (جواب اعتقال).
محمد هنيدي.. تعاون جديد مع وش السعد
كلنا فاكرين الفترة الصعبة اللى مر بيها محمد هنيدي، من حيث التدهور الفني لأعماله الأخيرة، لكن هنيدي حس بطعم النجاح من جديد مع فيلمه الأخير (يوم مالوش لازمة) والسبب كان الكاتب المتميز عمر طاهر، واللى قدم للسينما مجموعة من أحلي أفلامها الكوميدية والشبابية فى الفترة الأخيرة.
لسه مافيش تصريحات عن قصة الفيلم بالظبط لكن بنعتقد أن عمر طاهر قادر من جديد على إضحاكنا للمنتهي، المشكلة الوحيدة إن فيه كلام كتير بيتردد إن الفيلم لسه فى طور التصوير وإنه غير جاهز للعرض فى عيد الأضحي، وفى كل الأحوال القائمة الحقيقية للأفلام اللى هاتتعرض فى عيد الأضحي مش هانعرفها غير فى السينمات لإن أفلام كتير بيتم رفعها أو إضافتها فى أخر لحظه.
محمد سعد… عنده شعره
طبعا كلنا فاكرين أغنية (أنا عندي شعره) من فيلم اسماعيل يس الشهير.. المرة دي محمد سعد قرر يخلى عنوان الأغنية الهزلى هو عنوان فيلمه واللى من تأليف وليد يوسف، وإخراج سميح النقاش، من إنتاج وائل عبد الله، ويشارك فى البطولة إلهام شاهين ومنة فضالى وحسن حسنى ولطفى لبيب، ومحمد حسنى وعدد آخر من الفنانين.
محمد سعد قرر يبتعد عن شخصية اللمبى اللى قدمها فى كل أعماله الماضية تقريباً، لكنه ماقدرش يمنع نفسه من تقديم أكتر من شخصية، لكن المرة دي سعد هايظهر فى شخصيتين فقط، أما منة فضالى وهى البطلة الأنثى أمام محمد سعد، قالت إن دورها دور أم لطفلة عندها 9 سنوات وإن دورها فيه لمحة انسانية لا يمكن نكرانها.
الفيلم بيحكي عن محامي بيدافع عن رجال الأعمال الفاسدين، لكنه بيتعرض لحادثة بيتحول على اثرها لطفل صغير عنده 5 سنوات فى جسد رجل كبير! ثم بتتوالى الأحداث الكوميدية.
حملة فريزر
هشام ماجد وشيكو وأحمد فهمي.. الثلاثي اللى تعودنا على أفلامهم المتميزة والكوميدية ودمهم الخفيف.. إتنين منهم بس هم هشام ماجد وشيكو هانشوفهم فى حملة فريزر مع بدرية طلبة وبيومي فؤاد واللى بيقدموا من خلال أحداثه تريقة لا علاقة لها بحملة فريزر على مصر واللى انتهت سنة 1809
الفيلم تم تصوير جزء كبير منه فى كرواتيا، ومن إخراج سامح عبد العزيز وبرضو بنشهد حالة من التكتم الشديد حوالين أحداث الفيلم علشان الموضوع يبقى مفجأة فى دار العرض مباشرة.. ياتري الدويتو الكوميدي بيحضر لنا إيه اليومين دول؟!
البس عشان خارجين
على الرغم من إن إسم الفيلم كان (ويك اند) إلا أنه تم تغييره الى (البس عشان خارجين) على الرغم من المعركة مع الرقابة بسبب الإسم ومحاولة منتج الفيلم السبكي التمسك بالإسم ومحاولة كتابته على الأفيش بعد اضافة علامة X عليه لزوم محاولة خداع الرقابة!
الفيلم من بطولة حسن الرداد، إيمي سمير غانم، بيومي فؤاد، طاهر أبو ليلة، حنان سليمان، محمد علي رزق، مصطفى محمود، وعدد من ضيوف الشرف منهم نسرين أمين، مراد مكرم، ضياء الميرغني، وأيمن منصور، سيناريو وحوار هشام ماجد وشيكو، وإنتاج أحمد السبكي وإخراج خالد الحلفاوي.
صابر جوجل: محمد رجب فى فيلم جديد
من تأليفه وبطولته بنشوف محمد رجب فى دور راجل متخصص ومحترف فى التعامل مع البرمجيات والكمبيوتر وتقنيات الإنترنت وغيرها، والناس كلهم بيسموه صابر جوجل، لكنه بيتورط بسبب موهبته فى عمليات غير مشروعة مع عدد من رجال الأعمال المشبوهين وبيضطر للهرب والسفر خارج مصر.. ثم بتستمر الأحداث فى قالب أكشن كوميدي.
بيشارك رجب فى البطولة نور الكاديكي و أحمد صيام وهادي الجيار وحسن عبد الفتاح و ايهاب فهمي و راندا البحيري وعدد من الفنانين.
محمد رجب قدم مؤخراً أفلام ماحققتش نجاح كبير فى السينما وإن حققت نجاح إلي حد ما فى العرض التليفزيوني وعلى الفضائيات زي فيلم سالم ابو اخته، واللى كان بيحكي عن مغامرات شاب مصري فقير فى محاولة جمع المال لزواج أخته الوحيده.
طلق صناعي.. البحث عن الجنسية الأمريكية
ماجد الكدواني وحورية فرغلي وبعد تعاونهم فى دراما إنسانية اجتماعية فى فيلم زي (ديكور) بنشوفهم المرة دي فى فيلم كوميدي عن سيدة بتحاول تحصل لإبنها على الجنسية الأمريكية من خلال إنها تولده داخل السفارة الأمريكية من خلال تعاطيها حقنة (طلق صناعي)!
الفيلم تعرض لمشاكل كتير وتوقف تصويره اكتر من مره مرة لحمل الفنانة مي كساب ومرة لمرض الفنانة حورية فرغلى بسبب أحد اكسسوارات التصوير وغيرها من المشاكل اللى قرينا عنها فى وسائل الإعلام، لكن فى النهاية واضح إن الفيلم هايقدر يشوف النور فى موسم عيد الأضحي 2016
دي كانت الأفلام المتوقع نزولها فى عيد الأضحي.. الخريطة بتتغير كل شويه وفى أفلام بتلحق السباق وفيه افلام تانيه مش بتقدر توفي بوعودها وتلحق بقطار العرض… لكن فى كل الأحوال إحنا بنراهن على عيد الأضحي 2016 انه يقدم جرعة مختلفة ومتميزة من الأفلام العربية الجميلة.
