رحيم مش هايرحم حد… ولا حتى المشاهدين!
بعد سنوات طويلة من اقتصار معظم الأعمال الدرامية اللي بنشوفها في رمضان – وغير رمضان – على الكوميديا، الأمر اللي تحول أحيانا لحالة من الإسفاف والاستسهال، من الواضح أن الأكشن قدر يسيطر على الأجواء، والدليل هو مجموعة من المسلسلات اللي كلها لها علاقة بالأكشن والحركة واللي بنشوفها مؤخرا.
رحيم واحد من المسلسلات اللي استغلت النجاح الكبير اللي حققه النجم ياسر جلال في رمضان الماضي من خلال مسلسله (ظل الرئيس) لكن هل قدر ياسر جلال يقدم نفس الأداء اللي قدمه في مسلسل العام الماضي؟
نعم هي الأجابة المختصرة على السؤال ده. أما الأجابة الطويلة فهي أن ياسر جلال بيحصد حاليا نتيجة وقت وجهد كبير قضاه في الشغل على نفسه واختيار ادواره بعناية، ومحاولة الخروج من فخ الدور الواحد واللي وقع فيه بعد دوره في مسلسل لن أعيش في جلباب ابي. وقد ياسر يحقق المعادلة الصعبة ويتخصص في سلسلة جديدة من الأدوار المختلفة عن ادواره السابقة.
مسلسل رحيم من اخراج محمد سلامه وهو أول عمل درامي طويل يقوم باخراجه. ومن الواضح أن سلامه عاوز يثبت نفسه من البداية ويحدد طريق طويل وصعب علشان يمشي فيه لكنه طريق بيمشي فيه المخرجين المتميزين. محمد من نوعية المخرجين المركزين في شغلهم جدا وبيدي مساحة للجميع يتعاونوا معاه – منغير ما يفرضوا رأيهم عليه- وده واضح في الصورة اللي أخرجها في المسلسل، ومن الواضح الكيمياء الكبيرة بينه وبين ياسر جلال وإصرار الاتنين على الإخلاص في شغلهم بشكل قوي. حتى أن ياسر أصر على تصوير أحد المشاهد الصعبة بنفسه وكان هايتعرض لأذى كبير لولا ستر الله.
على الرغم من جمال نور وقدرتها على الاحتفاظ بجمالها لفترة طويلة، لكنها محتاجة تطور ادواتها التمثيلية بشكل أفضل علشان تقدم أدوار أكتر اقناعا للمشاهدين.
لازم نأكد على كفاءة محمد رياض.. الفنان اللي بيثبت يوم بعد يوم قدراته الغير عادية على أداء أي شخصية تطلب منه بكفاءة منقطعة النظير.
مؤلف مسلسل رحيم هو محمد إسماعيل امين وهو أيضا مؤلف مسلسل ظل الرئيس. ومن الواضح أن طريقته في الكتابة بتعجب فريق العمل ومن الواضح أنه قادر يهتم بتفاصيل المسلسل وطبعا من الواضح أن القصة عاجبة الجمهور بدليل الاهتمام الكبير بكل حلقة على السوشيال ميديا.
رحيم مش أحسن عمل في رمضان. لكنه مسلسل بيأكد على قدرة وكفاءة ياسر جلال كممثل وعلى شطارة محمد سلامه كمخرج وتفرد محمد إسماعيل امين كمؤلف. وننتظر في المستقبل تعاون اكبر بين الفريق ده
