فيلم The cabin in the woods : رعب كما يجب أن يكون

 الفيلم للكبار فقط .. فعلا . متفكرش حتى مجرد تفكير فى اصطحاب اطفال صغار او ناس ملهاش تقل على افلام الرعب التقيلة لان النتيجة مش هتكون مرضية على الاطلاق، بالاضافة لبعض المشاهد والالفاظ اللى ممكن تضايق المتحفظين ، رغم التدخل الشديد للرقابة فى مصر الا ان بعض المشاهد لازالت فيها نوع من الجرأه .. إحنا حذرناك 🙂

كل ما نشوف فيلم رعب كنا ندعى ربنا ونقول : يارب عاوزين فيلم رعب حقيقى .. فيلم رعب مش بيعتمد فقط على (خض) المشاهد والتاثير على جهازه العصبى بالسلب، وواضح ان ربنا استجاب لدعائنا بسرعة وشوفنا اخيرا فيلم رعب مختلف

المخرج درو جودارد قدم فى الفيلم قصة أشباح تبدو فى البداية انها تقليدية،  لمجموعة من الشباب اهمهم كريستين كونولى وأنا هيتشون وكريس هيمثورث وغيرهم ، الشباب دول بيتم احتجازهم فى كوخ صغير فى غابه مفيهاش ناس

القصة تبدو تقليدية ، ولولا حرصنا على عدم حرق الاحداث كنا قولنالك ايه الجديد المرة دى ، لكن احنا عاوزينك تروح وتشوف بنفسك ومش عاوزين نحرق عليك سهرة جميلة فى الويك اند

البطل الاساسى قبل الممثلين كان المؤثرات الخاصة والجرافيكس العظيمه ، وكنا بنتحسر واحنا بنتفرج على مستوى الجرافيكس فى الافلام المصرية ، اما عن المؤثرات الصوتية والبصرية .. بجد مش قادرين نقول لكم مدى انبهارنا بالمستوى اللى وصلت له ، واللى زودت ضربات قلبنا لحظات تسارع الموسيقى فى مشاهد الرعب ، لكن الاضاءة كانت ليليلة فى كتير من المشاهد كعادة افلام الرعب لما الليل بييجى فيها بسرعة كبيرة

مستوى الدم والعنف والجنس عاليين جدا فى الفيلم ، رغم محاولة الرقابة تقليل حدة  المشاهد الجنسية لدرجة خذف مشهد كامل مؤثر جدا على البناء الدرامى للفيلم  الا ان بعض المشاهد ممكن متعجبش المشاهدين المحافظين ، كمان مشاهد الدم خصوصا فى المشاهد  الاخيرة كانت قوية جدا وتؤدى مشاعر اى انسان مش بيحب اللقطات دى ، بالتالى الفيلم يستحق كل نقطه على كل حرف فى كلمه (للكبار  فقط) المكتوبة على البوستر

الديكورات كانت جميله ومتميزة ، ونقلت لنا جو الفيلم بدقة وعبرت عن المعانى اللى عاوز يوصلها، المكياج كمان كان كويس لكن حسينا بوتيرة من المبالغة فى المشاهد الاخيرة من الفيلم

لو غاوى افلام الرعب والدم والقتل .. بنوعدك بتجربة قوية ورائعه مع الفيلم ده .. اما لو ما لكش فى الجو ده .. بنقولك .. متروحش احسن