روج: فيلم مكرر وحبكة محفوظة
مشاركة فيلم (روج) فى مهرجان الأسكندرية السينمائي الدولي كان من الأخبار الغريبة والمحبطة للعاملين فى المجال الفني، يمكن لضعف مستوى الفيلم الفني، وعدم قدرته على المنافسة الحقيقية وتمثيل إسم مصر فى مهرجان مهم زي ده.
(روج) من بطولة أمير صلاح الدين وفاطمة ناصر ومن تأليف أمير نسيم ومن إخراج جون إكرام، وبيحكي عن بنت فقيرة بتشتغل فى محل كوافير، بتقرر الإنتحار فى أحد الأيام بعد ما بتكتشف أنها حامل من حبيبها اللى بيقرر عدم الإعتراف بالحمل.
بيتزامن مع قرار البنت بالإنتحار وصول عامل توصيل الطلبات للمنازل، الأمر اللى بيدفعها لتهديده بالمسدس علشان يشهد معاها أخر لحظات حياتها.. لكن الأحداث بتاخدنا بعيداً عن واقعة الإنتحار بشكل مش عاوزين نحرقه على المشاهدين.
المشكلة الأساسية للفيلم كانت فى السيناريو المترهل والممل، وخط سير الأحداث المتوقع اللى سحبنا له السيناريو بكل بطء وملل، وبينتهي الفيلم بدون ما بنحصل على أجوبة حقيقية وشافية عن كتير من علامات الإستفهام اللى بيخلقها السيناريو.
أمير صلاح الدين نجم فريق بلاك تيما، وبطل الفيلم، بيقدم أداء تمثيلي ردىء جدا، والحقيقة ده ضايقنا جداً لأن أمير من الفنانين اللى احنا بنراهن عليهم بقوة لتقديم أعمال قوية ومحترمة، والحقيقة إننا لازلنا عند نفس رهاننا ومش هايرجعنا عنه فيلم واحد فاشل له، على الرغم من إن الفيلم يعتبر من بطولته بشكل أو بأخر. لكن أداء أمير التمثيلي كان ضعيف، وكان فيه محاولة يائسة للكوميديا ما استحملهاش البنية الأساسية للعمل.
نيجي للفنانة التونسية فاطمة ناصر بطلة الفيلم، واللى بتقدم دور البنت اللى بتحاول تنتحر.. وعلى الرغم من مصرية ملامح وجهها وقدرتها على الكلام بالعامية المصرية، إلا أن فاطمة فشلت فى تقديم دور جيد، وكانت انفعالاتها مبالغ فيها فى بعض الأحيان وضعيفة جداً فى مشاهد تانيه. ومانقدرش نرمي كل العبء على الأداء التمثيلي، لكن الفيلم كان بيعاني مشكلة حقيقية فيما يتعلق بالإخراج.
كان من الواضح قيام سلسلة مطاعم مصرية شهيرة بالدعاية لنفسها من خلال أحداث الفيلم، والحقيقة إن إبراز الدعاية دي تم بشكل جيد وإن كان مش بيدي فرصة للمشاهد فى التساؤل هل قصد الفيلم فعلاً يعمل دعاية للمطعم أم لا، لإن الإعلان كان واضح ومباشر جداً فى بعض المشاهد.
(روج) مش أسوأ فيلم مصري شوفناه مؤخراً، لكنه كان محتاج اهتمام بالسيناريو والإخراج أكتر من الإهتمام بالدعاية للمطاعم وإخراج الكليبات الدعائية للفيلم!
