سبع البرمبه: أنا واحد اتفرجت على سبع البرمبه يعني مش باقي على حاجه!
مع استمرار رامز جلال في تكرار الروتين السنوي الخاص بيه وهو اطلاق برنامج مقالب في رمضان وفيلم في العيد.البرنامج اللي فكرته أو طريقة تقديمه مش بتتغير تقريبا والفيلم اللي برضو مش بنشوف اي جديد بخصوصه. مش عارفين هل نلوم رامز في استسهاله تكرار كل حاجه ولا نلوم الجمهور؟!
فيلم سبع البرمبه بيحكي عن زوجة بتصاب بمرض نفسي بيجبر جوزها على انتحال شخصية ممثلين مشاهير في الأفلام والمسلسلات العربية زي أحمد السقا وياسر جلال وغيرهم. والمفروض بنشوف مشاهد كوميدية بتتفجر نتيجة انتحال رامز للشخصيات دي.
ممكن بسهولة نقول أن الفيلم يعتبر كوكتيل بين مجموعة مسلسلات وأفلام عربية قديمة وجديدة. يعني فكرة محاولة اظهار البطل في صورة مش صورته من خلال تقمص الشخصيات بتفكرنا بجزء من فيلم أنكل زيزو حبيبي. وفكرة الاسكتشات أو الشخصيات اللي بينتهي بيها كل فصل من فصول الفيلم بتفكرنا بمسلسل ريح المدام. والفكرة بشكل عام مناسبة أكتر للمسلسلات أكتر منها مناسبة للأفلام.
لا جديد من رامز جلال. أداؤه السينمائي زي ما هو. وبنحس أنه بيقدم شخصية رامز جلال مش الشخصية اللي المفروض يلعبها في الفيلم. جميلة عوض في دور الزوجة بتقدم أداء (جامد) بدون أن تعبيرات بوجهها ومش عارفين ليه بتعمل كده رغم موهبتها الكبيرة.
الكوميديا الاساسية في الفيلم كانت مع شخصيات زي محمد عبد الرحمن و بيومي فؤاد ومحمد ثروت وبشكل عام مستوى الكوميديا في الفيلم كان منخفض وماضحكناش كتير. ويمكن يكون الاطفال فقط هم اللي هايضحكوا على بعض مشاهد الفيلم
سبع البرمبه محاولة مكررة من رامز جلال انه يلعب في الجزء الكوميدي المضمون. وبنعتقد أنه هايحصد بعض النجاح المضمون من الفئات المضمون أنها تتفرج على الفيلم. لكن مافيش أي تجديد أو مغامرة أو موهبة جديدة بيقدمها سبع البرمبه.
