فيلم Fall : لو بتخاف من المرتفعات.. ما تشوفوش!
زي ما البشر لهم حظوظ في الدنيا. الأفلام كمان.. حظ فيلم Fall حظه كان وحش في السينمات، وما حققش الإيرادات المطلوبة، لكن بمجرد اتاحته على الانترنت، حصلت ضجة. وكأن الجمهور اكتشف فجأة أن الفيلم جامد. وبدأ الكل يتكلم عن المغامرة اللي تعتبر كابوس، لو كنت من الناس اللي بتخاف المرتفعات!
فيلم Fall بيحكي عن (بيكي) – قامت بالدور جريس كارولين كوري- اللي بتهوى تسلق المرتفعات، واللي بتنعزل وتكتئب بعد وفاة زوجها، أثناء تسلقه أحد الجبال، وكمان بتصاب بالخوف من المرتفعات. ثم بترجع تلتقي بصديقتها القديمة وشريكتها في التسلق (هانتر) – قامت بالدور فيرجينيا جاردنر- اللي بتقنعها بصعوبة أنها تتسلق برج اتصالات قديم ارتفاعه حوالي ٢٠٠٠ قدم.
الفيلم بيبدأ فعلياً مع محاولة تسلق البرج، لأنها بتقلب بكارثة، لما بينهار السلم بالصديقتين، وبيلاقوا نفسهم محاصرين أعلى البرج، بدون القدرة على اجراء مكالمات تليفونية، وبدون أي شخص حواليهم ممكن يوفر لهم المساعدة.
فيلم Fall بيلقي الضوء – بالإضافة لقصته- على ايه اللي ممكن يعمله بعض الناس علشان يكسبوا متابعين جدد على السوشيال ميديا. بنشوف (هانتر) اللي عاوزه تعمل طول الوقت مغامرات جديدة بتضع حياتها على المحك، علشان تفضل قناتها على يوتيوب شغاله وتحقق لها أرباح. وبنشوف ازاي ممكن المغامرة تتحول لكابوس في ثواني معدودة، لمجرد الحصول على بعض الشهرة المؤقتة.
من ناحية تانيه بنشوف (بيكي) اللي دافعها للتسلق هو محاولة تجاوز محنة فقد زوجها، محاولة الحياة من جديد بشكل طبيعي، والخروج من حياة سيطر عليها الاكتئاب والخوف والشعور بالذنب.
الميزة في Fall أنه بيقدم، بجانب المغامرة طبعا، تغيرات كبيرة في مشاعر الأبطال، ودوافعهم، على استمرار خط الأحداث، وبيحصل Twist قرب النهاية، حسينا أنه مبالغ فيه وغير مبرر من حيث السيناريو، وده ينضم لبعض الهفوات التانيه اللي شوفناها زي بطارية تليفون (ايفون) اللي بيظهر في الأحداث واللي بيظهر أنه ممتلىء البطارية رغم أن وقت طويل عدى على الأبطال بدون التمكن من شحنه.
لكن بما أننا بنتكلم عن فيلم مغامرات أولاً وأخيرا، فـ Fall بيقدم لنا مغامرة عظيمة. حسينا فيها – واحنا الغير مصابين برهاب الأماكن المرتفعة- بالخوف أحيانا، واتكتمت أنفاسنا حرفيا في بعض المشاهد. فما بالكم لو كان المشاهد بيخاف من الأماكن المرتفعة؟ علشان كده بنقول أن الفيلم غير مناسب للناس دي. ودي فرصة كويسة نلقي الضوء على اضطراب بيصيب من ٢ الى ٥ ٪ من الناس، وفرص حدوثه عند السيدات أكثر من الرجال، واسمه الرسمي Acrophobia المشتق من الكلمة اليونانية ἄκρον اللي بتعني (الذروة) أو الحافة.
المؤلف والمخرج سكوت مان كان فاهم كويس أنه بيتعامل مع فيلم بميزانية محدودة، وطاقم ممثلين قليل من حوالي ٦ ممثلين فقط. لكن ده خلاه يضع رهانه كله على السيناريو وكيفية تقديم الأحداث بتتابع وكثافة على الشاشة، علشان يحقق هدف الإمتاع وكتم الأنفاس، وده اللي قدر يحققه رغم المعوقات اللي واجهت الفيلم.
فيلم Fall فيلم مميز، قدر يعمل من ميزانية قليلة وأبطال قليلين، عمل هايفضل لفترة طويلة في عقل وقلب اللي شافوه. واللي هايفتكروه كويس جدا في كل مرة يكونوا فيها على قمة مكان عالي.
