فين قلبي: فيلم غنائي خفيف

مطربين كتير قدموا أفلام سينمائية.. عمرو دياب ومحمد فؤاد وعامر منيب –الله يرحمه- وغيرهم كتير، لكن تعتبر تجربة مصطفى قمر تجربة مميزة علشان دايماً قمر مش بينسى أنه فى الأساس مطرب، وبيحاول يستغل نقاط قوته كمطرب علشان ينجح الأعمال السينمائية اللى بيقدمها.

فيلم فين قلبي من تأليف محمد راضي، وحوار رضا زايد، وإخراج ايهاب راضي، وبيشارك مصطفى قمر بطولة الفيلم شيري عادل ويسرا اللوزي، بالإضافة لمجموعة كبيرة من ضيوف الشرف هانتكلم عنهم بالتفصيل فى الفقرات القادمة.

الفيلم بيحكي عن رجل بيحب الموسيقى والغناء (مصطفى قمر)، وعايش على بيع الأدوات الموسيقية للفنانين والملحنين المشاهير، وبتستمر حياته بوتيرة هادئة ولا تخلو من بعض المواقف الكوميدية، لحد ما تحصل له مجموعة من المواقف –مش عاوزين نحرقها- علشان يلاقي نفسه متزوج من سيدتين (شيري و يسرا) وبيحاول يفاضل بين الأقرب لقلبه، ومن هنا بييجي إسم الفيلم (فين قلبي).

من أكتر الأمور الإيحابية اللى بتميز الفيلم هى الموسيقى والأغاني، وده شىء متوقع لما يكون البطل هو مصطفى قمر، كمان قمر قدر يستعين بمجموعة من أصدقاؤه علشان يظهروا كضيوف شرف زي الفنان حمادة هلال وهاني رمزي وحميد الشاعري، واللى ظهروا بشخصياتهم الحقيقية، أما محمد لطفي وعزت أبو عوف مثلا فظهروا كضيوف شرف لكن بشخصيات غير شخصياتهم الحقيقية.

الأداء التمثيلي فى الفيلم كان بيتراوح بين المتوسط الى الضعيف، ولو كان الأداء التمثيلي بنفس قوة المزيكا والأغاني، كان الفيلم هايكون علامة متميزة جدا فى تاريخ السينما. لكن للأسف تأتي الرياح بما لا تشتهي السفن.

معلومة على الطاير: الفيلم من إنتاج مصطفي قمر!

نقطة إيجابية أخيرة عاوزين نتكلم  عليها هى صورة الفيلم.. وهى محصلة اتحاد الديكورات مع الإضاءة وتصميم كادرات الفيلم، والحقيقية أن صورة الفيلم كانت متميزة جداً، وكانت بتعطينا شعور عام بالجمال والراحة والرحابة، وده شىء إيجابي مش بنشوفه فى أفلام تانيه كتير.

علشان تبقى عارف:

الفيلم يعتبر التعاون الثاني بين مصطفى قمر والمخرج إيهاب راضي بعد فيلم (حبك نار) في عام 2004.

الفيلم كان اسمه فى البداية (لما تحب بجد) ثم تم تغييره الى (فين قلبي).