قهوة بورصة مصر: مصر قاعده على القهوة!
الأفلام اللي عاوزه تناقش قضايا كبيرة قدامها طريقة من أتنين. الأول أنها تقدم أفكارها بشكل رمزي والمشاهد يفهم من نفسه، والثانية أنها تقدم الفكرة بشكل مباشر. فيلم قهوة بورصة مصر بيحاول يتبع الأسلوب الرمزي، لكن في بعض المشاهد كُنا بنحس أن صناع الفيلم عاوزين يطلعوا لنا ويقولوا لنا إحنا نقصد كذا كذا!
الفيلم بيحكي عن قهوة من قهاوي منطقة وسط البلد، واللي كانت زمان بيتجمع عليها المضاربين في بورصة القطن في القاهرة زمان. والنهردة أصبحت بتجمع المثقفين والفنانين والأدباء. واللي بيحكي عنهم الفيلم من خلال شخصياته المتعددة وأحداثه المتلاحقة. واللي بيرصد فيها قصة مجموعة من رواد قهاوي وسط البلد.
قهوة بورصة مصر من تأليف علاء مرسي وبطولته. ومن الواضح أن الفيلم يعتبر من أهم المشاريع الفنية اللي دخلها علاء. والحقيقة أن علاء بيقدم في الفيلم دور استثنائي وجديد وجاد مقارنة بباقي الأعمال اللي قدمها قبل كده.
بيشارك علاء في البطولة مجموعة من الفنانين الكبار زي لطفي لبيب وحسن حسني اللي ظهر عليه أعراض التقدم في السن بشكل كبير أثر شوية على قدراته التمثيلية.
من الفنانين اللي قدموا أداء جيد جدا الفنان الشاب أحمد صبري غباشي. وغباشي شارك قبل كده بأدوار صغيرة في بعض الأعمال زي مسلسل اختفاء بطولة نيللي كريم. لكن واضح أنه بيشق طريقه بقوة وبصبر.
ماعجبناش في سيناريو الفيلم انه مش بيدي فرصة للمشاهد أنه يفكر بنفسه ويفك رموز الفيلم. وكان نفسنا الفيلم يدينا فرصة نفكر بنفسنا بدل ما يقدم لنا الشخصيات بالوضوح ده.
كمان ماعجبناش في الفيلم انه عاوز يناقش كل القضايا المهمة مرة واحده. وكان نفسنا يركز على قضية أو اتنين فقط
قهوة بورصة مصر فيلم مميز للناس اللي بتحب الأفلام اللي بتناقش قضايا كبيرة وفيها شخصيات كتير ومتشابكة.
