كل جديد عن أجهزة (أبل) الجديدة 2017
محبي التكنولوجيا والتليفونات المحمولة كان عندهم سهرة جميلة من ساعات، قضوها مع مؤتمر شركة ابل العالمي اللي بيعقد في شهر سبتمبر من كل سنة، علشان تقدم الشركة العملاقة والرائدة في مجال الاتصالات والتكنولوجيا كل جديد في المجال ده. تعالوا نشوف مع بعض ايه الأجهزة الجديدة اللي قدمتها أبل المرة دي؟
أولا لازم نقول لكم بعض المعلومات المهمة والطريفة عن المؤتمر.
- مؤتمر أبل السنة دي بيوافق الذكرى العاشرة لإطلاق أول أيفون على يد مدير أبل السابق ستيف جوبز. علشان كده بيحمل الهاتف الجديد والمميز من أبل رقم 10.
- المؤتمر اتعقد في قاعة بتحمل اسم الراحل ستيف جوبز في إشارة واضحه لدوره الرئيسي في ابتكار الأيفون.
- تيم كوك أتكلم عن Apple Park وهى منطقة ضخمة فيها مسرح ستيف جوبز وبتعمل كلها بالطاقة النظيفة وفيها مساحات خضراء علشان يشعر الموظفين في أبل بالراحة والعودة للطبيعة.
- المؤتمر امتاز بخفة الظل ووجود كتير من عوامل المرح والنكته اثناء عرض الهواتف والتطبيقات المختلفة.
أما دلوقتي هانستعرض معاكم الجديد من أبل
جيل جديد من الساعات
قدمت أبل جيل جديد من الساعات بأشكال مختلفة وامكانيات حديثة منها القدرة على مقاومة الماء، كمان تم الإعلان عن أن السلسلة الجديدة من الساعات الذكية هايكون معاها شريحة تجعلها وحدة مستقلة بذاتها وممكن تعمل اتصالات وتتصفح الانترنت والواتس اب وغيرها من التطبيقات بدون الحاجه للتليفون الأصلي!
سعر الساعة الجديدة يبدأ من 329 دولار وممكن بداية طلبها من الولايات المتحدة من 15 سبتمبر.
تليفزيون أبل جديد
أما تليفزيون أبل فا حصل على جيل جديد بتقنية 4K اللي بتقدم وضوح رائع في عرض الصور على التليفزيون، بالإضافة لتقنية ألوان HDR اللي بتجعل الألوان والرسومات أوضح وأنقى بكتير من قبل كده. بالإضافة لأن الجهاز الجديد أصبح أسرع بكتير وأكتر قدرة على أداء كتير من المهام بفاعلية أكبر.
سعر الجهاز الجديد يبدأ من 179 دولار وها يبدأ بيعها في 22 سبتمبر.
أيفون 8 و 8 بلس
أما بعد كده كان لازم يتم الإعلان عن التليفون الجديد من أبل وهي سلسلة هواتف 8 و 8 بلس واللي بتأتي بتقنية عالية جدا في التصوير الثابت مع وجود مجموعة كبيرة من الفلاتر السهلة والسريعة، بالإضافة للقدرة على تصوير الفيديو بجودة 4K وكل ده بمعالج أسرع وأعلى من أي هاتف أيفون تاني تم إصداره قبل كده.
سعر الأجهزة يبدأ من 699 دولار أمريكي على حسب النوع والمساحة التخزينية وهايتم اتاحتهم للبيع في 16 سبتمبر.
أيفونX
ومع نهاية الحفلة وشعور الجميع أن أبل انتهت من كل عروضها، قد تيم كوك المفجأة النهائية والأقوى على مدار الحفل، وهى أيفون X الأيفون الأسطوري اللي بتصدره أبل بمناسبة مرور 10 سنوات على تأسيسها.
التليفون الجديد بيأتي بتصميم مختلف تماما لأن الشاشة استولت على مساحة التليفون الأمامية بالكامل، وتم الغاء الزرار الأساسي للأيفون Home واستبداله بالضغط على الشاشة في أي مكان. كمان دلوقت التليفون أصبح بيفتح ببصمة الوجه يعني بمجرد النظر للتليفون هايشتغل علطول! وعلشان تضمن أبل عدم التعدي على خصوصية الناس صممت التليفون بعوامل أمان تجعله مستحيل يتفتح بدون نظر الشخص له بتركيز علشان ماحدش يستغل نوم صاحب التليفون ويفتحه ببصمة الوجه!
مش بس كده. أبل أعلنت أن تليفونها الجديد هايتشحن بتقنية Wireless charge بمعنى أنه مش هايحتاج يتوصل بالأسلاك علشان يشحن!
لكن علشان كل شيء له ثمن، التليفون الجديد من أبل بيبدأ بسعر 999 دولار أمريكي! وهايبدأ يتباع في الأسواق الأمريكية نهاية شهر أكتوبر الحالي.
