مسلسل 1899 : أهلا بيك على الحد الفاصل بين الواقع والخيال
من الواضح أن نتفليكس أدمنت النجاح الساحق اللي حققه مسلسل Dark بمواسمه الثلاثة، اللي بدأ عرضها سنة ٢٠١٧ وانتهى سنة ٢٠٢٠. وقررت إعادة التجربة مع نفس صناع المسلسل، علشان يقدموا لنا الموسم الأول من مسلسل 1899 اللي واضح جدا أنه مستمر معانا لموسم جديد إضافي على الأقل.
مسلسل 1899 بيحكي عن مجموعة كبيرة من الشخصيات، متجهة لأمريكا على متن سفينة عملاقة. لكن قبطان السفينة بيتلقى رسالة غامضة على اللاسلكي من سفينة تانيه تابعة لنفس الشركة، كانت مفقودة من فترة طويلة نسبيا. بالتالي بيقرر ينحرف عن مساره التقليدي علشان يتوجه للسفينة المفقودة، في وسط اعتراض عدد كبير من الركاب. علشان تبدأ سلسلة من الأحداث الغريبة في الحدوث. تخلينا نعرف أن فيه روابط غامضة بين الركاب وبين بعضهم البعض.
الغموض هو المسيطر على مسلسل 1899 من المشهد الأول. والمشاهد نفسه عارف أن الغموض هو اسم اللعبة من البداية، خاصة المشاهدين القادمين من مسلسل Darkواللي اتعودوا على الخدع الزمنية، والتدقيق في كل مشهد، ومحاولة استنتاج أي معلومة من مشاهد تبدو بسيطة وتقليدية للمشاهد العادي اللي تعتبر دي أول تجربة له مع مسلسل فيه جرعة عالية من الغموض.
يعيب مسلسل 1899 أننا نقدر نعتمد الموسم الأول كله (٨ حلقات) مجرد تمهيد لأحداث أقوى هاتحصل في الموسم الثاني، بالتالي اللي بيدور على إجابات سريعة لكل الأسئلة اللي بتدور في دماغه، هايلاقي نفسه محتاج يستنى وقت أطول بكتير من المُعتاد. لأن حتى مع اقتراب الأحداث من نهايتها، بنحصل على أجوبة لبعض الأسئلة، وبنشوف خيوط تانيه لم يتم الإجابة عنها بشكل مباشر. علشان يفضل المشاهد في حالة من الترقب.
بعيدا عن التأثر بمسلسل Dark نقدر نقول أن مسلسل 1899 متأثر بأجواء فيلم تايتانيك الشهير، عن السفينة الغارقة الأشهر في التاريخ، خاصة في تقسيم أبطال المسلسل لفئات حسب أوضاعهم الاقتصادية والاجتماعية. لكننا بنلاحظ رابط خفي بين كل الشخصيات، وهو بحثهم عن حياة جديدة، بعد مشاكل كبيرة تعرضوا لها، ولقوا نفسهم في النهاية على متن السفينة اللي واخداهم لأرض جديدة وبداية جديدة.
مسلسل 1899 بالإضافة لكونه مميز على صعيد القصة والغموض والرموز المستخبية، هو كمان بيقدم جرعة تمثيليلة ممتازة، مع توظيف أكثر من رائع للخدع الخاصة والديكور، وطبعا الموسيقى التصويرية الملائمة لكل مشهد بيمر علينا أثناء المشاهدة. لكن مشكلة المسلسل الوحيدة هي الغموض الزائد، وفكرة التلاعب بالزمان والمكان. كلها حاجات عارفها محبي مسلسلات زي Dark ومتعودين عليها. لكن لو كنتم من محبي المسلسلات التقليدية. أو بيضايقكم الغموض الزائد عن الحد. 1899 مش هايكون المسلسل الأفضل لكم.
