نادي الرجال السري: شوفوا الفيلم بدون ما تشوفوا التريلر!

موسم إجازة نصف العام واحد من المواسم السينمائية المهمة اللي بتتسابق شركات الإنتاج الفني أنها تقدم فيها أعمالها. لكن من الملاحظ في موسم 2019 ان الأعمال اللي بتتنافس في الموسم ضعيفة وغير مهمة. ماعدا (نادي الرجال السري) القادر على تقديم توليفة جميلة جدا بين الكوميديا والرومانسية في إطار خفيف ولطيف.

نادي الرجال السري بيحكي عن أدهم (كريم عبد العزيز) الزوج الواقع طوال الوقت تحت سيطرة زوجته الغيورة هاجر (غادة عادل) واللي بتتحكم في تفاصيل يومه بداية من صحيانه وحتى شغله في عيادة طب الأسنان اللي بتصر على أنه يروحها بهدوم غير مهندمة ورائحة وحشه علشان تبعد عنه أي محاولة منه للدخول في علاقات نسائية.

لكن على الرغم من الاستسلام اللي يظهر على أدهم، إلا أنه في الخفاء بيدير نادي للرجال. لتسهيل الخيانة والمغامرات النسائية عليهم بالاشتراك مع حيرم (بيومي فؤاد). النادي اللي بيحاول عضو جديد هو فؤاد (ماجد الكدواني) أنه ينضم له. علشان تتولد سلسلة لا تنتهي من المواقف الكوميدية.

المميز في (نادي الرجال السري) هو اعتماده على كوميديا الموقف.. كوميديا المشهد. ده اللي نجح (أيمن وتار) المؤلف في كتابته ونجح خالد الحلفاوي في تقديمه على الشاشة كمخرج. وحسينا بشغل الخلفاوي على الشاشة – وهو بالمناسبة ابن الفنان نبيل الحلفاوي- اللي قدر يخلق مواقف كوميدية اعتمادها الاساسي هو الموقف والحركة مش النكته والايفيه.

غاده عادل وكريم عبد العزيز كانوا اختيارات موفقة جدا في بطولة الفيلم. وحتى الأن لسه كريم عبد العزيز عارف يحافظ على مركزه كممثل (جوكر) يعرف يشتغل أكشن أو كوميديا أو تراجيديا. شوفناه قبل كده في أعمال رعب سوداوية زي (الفيل الأزرق) أو أعمال مخابراتية زي (أولاد العم) وغيرها من الأعمال اللي نجح في أدائها. غير تميزه طبعا في الكوميديا.

غاده عادل لسه محافظة على جمالها وقدراتها التمثيلية القوية. بتقدر تأدي بعنيها وتختصر مشاهد كاملة بمجرد بعض النظرات. لكن مساحة الأداء الكوميدي لها كانت أقل بكتير من المساحة اللي تم تخصيصها لكريم عبد العزيز.

ماجد الكدواني الممثل المميز. لم يكن في أحسن حالاته. مش بسبب أداؤه التمثيلي لكن بسبب مساحة الدور نفسها. لكن ده لا ينفي أن له مشاهد مميزة جدا جعلتنا نضحك الى اقصى حد.

مشاركة ضيوف الشرف زي أحمد أمين وأكرم حسني وهشام ماجد وغيرهم كانت مميزة جدا ومتوظفة صح ولها وقع كوميدي ممتاز.

أما أسوأ ما في الفيلم هو التريلر اللي تم اختيار أسوأ مشاهد الفيلم وانتزاعها من سياقها. التريلر اللي المفروض تشجع الناس على المشاهدة جعلت توقعاتنا عن الفيلم أسوأ بكتير من اللي شوفناه في الحقيقة.

نادي الرجال السري فيلم كوميدي جميل جدا ننصحكم بمشاهدته. بعيدا عن أي توقعات مسبقة. وطبعا بدون مشاهدة التريلر الإعلاني!