نصائح محترفة لأسنان نظيفة وصحية في ٢٠١٨
على الرغم من أن السن أو الضرس اللي بيخسره الأنسان البالغ مش بيقدر يعوضه تاني، وعلى الرغم من ارتفاع أسعار تركيبات الأسنان والأسنان الصناعية، وعلى الرغم من أن زيارة دكتور الأسنان بتكون مهمة شاقة ومخيفة على كتير منا، إلا أن كتير من الناس لسه جاهلة بكتير من القواعد البسيطة والمهمة واللي ممكن من خلالها نتجنب كتير من أمراض الأسنان واللثة، ونوفر على نفسنا وقت وجهد وفلوس كتير.
الدكتور محمود صلاح رفاعي، أخصائي تجميل الأسنان وعضو الأكاديمية الأمريكية لتجميل الأسنان كتب من فترة مجموعة تويتات على تويتر بيعطي فيها نصايحه للناس اللي عاوزه تتمتع بأسنان صحية ونظيفة. تواصلنا معاه وقررنا نسمع منه أكتر وننقل لكم التجربة بالكامل.
د. محمود قال لنا:
Halitosis او ما يعرف برائحة الفم الغير مرغوب فيها دا مرض اللي بيعاني منه بيحس ان ريحة فمه مش كويسة و بتأثر على نفسية صاحبها تلاقيه خايف يتكلم و دايما بيبعد عشان خايف حد يضايق او ياخد باله من الريحة دي.
الرائحة دي ممكن تدل على مشكلة بسيطة او عرض لمرض خطير. مش قصة اخرها باكو لبان وخلاص.
احنا بنقسم المرض لتلات انواع
- حقيقي ( و دا فعلا عندك مشكلة )
- كاذب ( انت حاسس ان عندك مشكلة و الدكتور مش لاقي سبب ليها )
- هوس او فوبيا ( احساسك بالمشكلة مستمر حتى بعد العلاج )
اسبابه : ليه اسباب متعلقة بالفم و اسباب تانية غير متعلقة بالفم
الأسباب المتعلقة بالفم زي: التدخين٠ المشروبات الكحولية ٠امراض اللثة ٠ تسوس الاسنان٠ تكون طبقات الجير و البلاك على الاسنان ٠ عدم الاهتمام بغسيل الاسنان ٠عدم الاهتمام بنظافة اطقم الاسنان المتحركة ٠ التركيبات الثابتة اللي مش مضبوطة
٠الفينييرز او ما يعرف باابتسامة هوليوود لما ماتسمحلكش بنظافة اسنانك كويس خصوصا لما تمنعك من استخدام خيط الاسنان كويس ٠
نوع الاكل ( السكريات و النشويات و الحلويات ..)
عدم استخدام خيط الاسنان خصوصا بعد الاكل مباشرة
حالات الخلع الجراحي او بعد اي علاج جراحي للفم
وأخيرا امراض الفم زي التقرحات ، جفاف الفم ، التجمعات الدموية
وأهم سبب متعلق بالفم هو عدم نظافة اللسان خصوصا انه اكبر مكان تتجمع فيه البكتيريا داخل الفم في الجزء الخلفي للسان ٠
أما الأسباب الغير متعلقة بالفم هي:
جفاف الفم نتيجة لامراض المناعة و العلاج الاشعاعي او الكيماوي …الخ وبعض أمراض المناعة أو الأعراض الجانبية لبعض الأدوية أو بعض أمراض السرطانات وأمراض الدم ومشاكل المعدة أو حتى أمراض الجيوب الأنفية وارتجاع المرىء
أما لو كانت رائحة الفم نفاذة جدا وشبه رائحة الأسيتون ممكن تكون علامة على ارتفاع معدل السكر في الدم أو حموضة الدم.
بعد كده سألنا د. محمود.. نعمل ايه لو حد نبهنا لريحة فمنا الكريهة أو لاحظناها بنفسنا؟ قال لنا:
طبيب الاسنان هو اول واحد تروحله للمشكلة دي عشان يشوف لو المشكلة من الفم او برة الفم فيسحسن اول حاجة تعملها تزور طبيبك
وبالنسبة للحلول المقترحة للمشكلة.. أول وأهم الحلول هي تظبيط نظام الأكل وكل ما كان الأكل فيه نسبة الياف أكثر زي الخضروات مثلا كل ما كان أفضل، أما لو هاتاكل حلويات يجب غسيل الأسنان بالمعجون بعدها مباشرة.
كمان لازم نواظب على مسح اللسان باستمرار لانه من أكتر الأماكن اللي بتتجمع عليها الكتيريا المسببة للرائحة الكريهة، لكن بلاش نمسح اللسان بعنف أو علشان لا يسبب لنا مشاكل.
من أهم الأمور استخدام خيط الأسنان بطريقة صحيحة بعد كل وجبة، ونحاول نبعد عن استخدام خلة الأسنان علشان بيكون لها اثار جانبية أسوأ.
من أهم الأمور شرب كميات كبيرة من المياه على مدار اليوم، وتناول اللبان بدون سكر، وبعض أنواع اللبان الطبي بدون سكر واللي بتمنع التسوس بالإضافة لتحسينها رائحة الفم.
ولو بتستعمل فرشة الأسنان باستمرار ضروري تغيرها مرة واحدة كل شهر على الأقل علشان تضمن عدم تكون بكتيريا عليها.
فيه منتجات زي مضمضة او معجون اسنان فيه مادة chlorhexidine دي ممتازة في مقاومة البكتريا بس ماتستخدمهاش اكتر من اسبوعين عشان ماتعملش صبغة على اسنانك او اللثة
وفي النهاية وعدنا د. محمود بتقديم نصايح واستشارات مستمرة لمتابعي كايرو360 وتمنى للجميع أسنان صحية وجميلة.
