يوم العرض: مسرحيه جوه فيلم!
على الرغم من سيطرة أفلام الأكشن والكوميديا على الساحة الفنية للأفلام العربية. لكن من الجميل أننا نلاقي محاولة لتقديم فيلم غموض واثارة يخرج بينا بره الدائرة المعتادة للأفلام العربية الموجودة حاليا. لكن ده ماينفيش مشاكل وعيوب فيلم يوم العرض اللي هانتكلم عنه بالتفصيل.
فيلم يوم العرض واضح من أسمه: في يوم عرض أحد المسرحيات بتبدأ سلسلة من الأحداث الغامضة في الحدوث من الشخصيات الحاضرة للمسرحية. الأحداث اللي بترتبط بأفعال قام بيها أبطال المسرحية في الماضي. ومش عاوزين نوضح الأحداث أكتر من كده علشان مانحرقش عليكم الأحداث.
على الرغم من أن معظم أبطال الفيلم من الشباب والنجوم غير المشهورين بشدة، لكنهم بذلوا مجهود كبير علشان يقنعونا بالشخصيات اللي بيقوموا بيها. ومنهم إيهاب فهمي واحمد صيام و ندى بهجت وغيرهم. لكن من ناحية تانيه فقر الفيلم على مستوى الإنتاج خلى الأداء التمثيلي يتأثر بشكل كبير.
لازم نحط في الاعتبار كمان أن الفيلم يعتبر التجربة الاخراجية الأولى للمخرج بيبرس الشهاوي. ودايما التجارب الأولى بيكون فيها كتير من الأخطاء ولازم يكون معاها كتير من التصالح لأي أخطاء بتظهر في التجارب الأولى.
عامل تاني هايضعف من الفيلم وهو توقيت نزوله السينمات. ولو كان تم طرح الفيلم في موسم عيد من الأعياد أو في فترة أقرب لشم النسيم كان ممكن يحقق نجاح أكبر.
يوم العرض فيلم كان ممكن يحقق نجاح أكبر لولا عوامل كتير منها حداثة العاملين فيه وقلة الإنتاج وتوقيت العرض.
