مقالات كايرو 360

مسلسلات الـ15 حلقة في النصف الأول من رمضان 2026.. 6 أعمال قدرت تخطف العين بدري

قراءة سهلة

محمد البدري

اللي ميّز النصف الأول من موسم رمضان 2026 إن مسلسلات الـ15 حلقة ما كانتش مجرد أعمال سريعة للتسلية وخلاص، بالعكس، قدرت من أول أسبوع تحجز لنفسها مكان واضح وسط الزحمة. الفكرة بقت أوضح من أي سنة فاتت: الجمهور ما بقاش مستعد يصبر كتير على حكاية بتلف وتدور، لكنه بقى ينجذب أكتر للعمل اللي يدخل بسرعة في قلب الصراع، ويعرف يحافظ على توتره وإيقاعه من غير مط. وده اللي خلّى مجموعة من المسلسلات ال ١٥ حلقة بس تبان كأنها موسم مستقل بذاتها مش مجرد جزء من أعمال رمضان.

تعالوا نتناقش في مجموعة من أكتر الأعمال اللي لفتت انتباهنا في النصف الأول من رمضان ٢٠٢٦

في المقدمة ييجي صحاب الأرض، وده من الأعمال اللي راهنت على القضية والوجع الإنساني بشكل مباشر. المسلسل من تأليف عمار صبري وإخراج بيتر ميمي، وبطولة منة شلبي وإياد نصار وآدم بكري وعصام السقا. المسلسل بيحكي على وقع حرب غزة، من خلال تقاطع حياة طبيبة مصرية (منة شلبي) مع رجل فلسطيني (اياد نصار) في رحلة صمود وبقاء وسط الدمار والموت. قوة المسلسل هنا إنه ما اكتفاش بعرض مأساة الحرب كحدث سياسي أو خبري، لكنه قرّب المشاهد من الإنسان نفسه: خوفه، فقده، محاولاته للتماسك، وإيمانه الضعيف اللي بيحاول ينجو بيه. ودي من نوعية الأعمال اللي بتعتمد على الشحنة الشعورية بقدر اعتمادها على الحكاية، وده كان سبب رئيسي في إن المسلسل يلفت النظر من بدري.

وعلى الناحية التانية تمامًا، ييجي كان ياما كان، من تأليف شيرين دياب وإخراج كريم العدل، وبطولة ماجد الكدواني ويسرا اللوزي. المسلسل بيشتغل على منطقة اجتماعية قريبة من الناس جدًا: الملل الزوجي، أزمة منتصف العمر، والرغبة في كسر حياة روتينية.المسلسل بيكشف إن الأزمة بتبدأ بعد 15 سنة من الرتابة، لما الزوجة تقرر تطلب الطلاق بحثًا عن حياة جديدة، لتتحول محاولات الزوج لاستعادة العلاقة إلى صراع حاد، وفي القلب من كل ده بنتهم اللي بتدفع تمن التمزق بين العالمين. جمال العمل، على مستوى الفكرة، إنه مش بيتعامل مع الطلاق باعتباره قرار فردي وخلاص، لكن باعتباره هزة بتصيب شبكة كاملة من المشاعر والذكريات والمصالح، وده يدي للمسلسل بعد إنساني واجتماعي مهم.

أما مسلسل سوا سوا فهو من نوعية الأعمال اللي ممكن نعتبرها رومانسية بس مش رومانسية تقليدية. المسلسل من تأليف مهاب طارق وإخراج عصام عبدالحميد، وبطولة أحمد مالك وهدى المفتي، ومعاهم شريف دسوقي ونهى عابدين وحسني شتا. الحكاية بتتمحور حوالين أحلام اللي تلاقي نفسها محاصرة بين رجلين متناقضين تمامًا: واحد بيحبها بإخلاص، والتاني شايف الحب امتدادًا للسيطرة والنفوذ. الفكرة دي في حد ذاتها كافية تصنع توتر درامي، لكن اللي يدي العمل ثقله فعلًا هو إن العلاقة نفسها ما بتمشيش في طريق رومانسي ناعم، بل في طريق مليان ضغط وخوف ومطاردات ومواجهات، وده يخلي المسلسل أقرب لدراما عاطفية متوترة منها لقصة حب تقليدية.

ومن أكتر الأعمال اللي لفتت الانتباه بسبب عالمها المختلف مسلسل مناعة، وهو من إخراج حسين المنباوي، وبيدور في منتصف الثمانينيات عن “غرام” التي بتلاقي نفسها وحيدة بعد مقتل زوجها، فتدخل بالتدريج إلى عالم المخدرات لحد ما بتبقى قائدة شبكة إجرامية قوية. نقدر نقول أن المسلسل بيبدأ من محاولة بقاء، وبعدها بيتحول الى رحلة صعود خطير في عالم المخدرات.

وفي مساحة أقرب للدراما الشعبية المشحونة بالقهر، ييجي الست موناليزا، من تأليف محمد سيد بشير وإخراج محمد علي، وبطولة مي عمر وأحمد مجدي ووفاء عامر. الست موناليزا بيحكي عن واحدة (مي عمر) بتحسب أنها داخلة على حياة أفضل، قبل ما تكتشف إن زواجها مبني على شروط خفية ومصالح واستغلال، لتبدأ بعدها رحلة طويلة من الانكسار ومحاولة استعادة الذات

أما عين سحرية فهو من الأعمال اللي اعتمدت على فكرة التشويق من مدخل معاصر جدًا: المراقبة. المسلسل من تأليف هشام هلال وإخراج سدير مسعود، وبطولة عصام عمر وباسم سمرة، وتدور قصته عن عادل، الشاب البسيط الموهوب في تركيب كاميرات المراقبة، واللي بيوافق تحت ضغط الفقر على زرع كاميرات سرية مقابل فلوس

ولو بصينا للمجموعة دي كلها مع بعض، هنلاقي إن سر تميزها مش بس في قصر عدد الحلقات، لكن في التنوع الحقيقي اللي بينها. صحاب الأرض اختار يشتبك مع جرح إنساني وسياسي مفتوح، وكان ياما كان دخل إلى قلب الأسرة المصرية وأسئلة الطلاق والخذلان، وسوا سوا قدم حبًا محاصرًا بالخوف، ومناعة نقلنا إلى عالم الجريمة والسلطة في زمن قديم لكنه مألوف، والست موناليزا اشتغل على القهر الشخصي والاجتماعي، بينما عين سحرية قدّم تشويقًا قائمًا على الرقابة والفساد والانكشاف. وده معناه إن النصف الأول من رمضان 2026 ما كانش مجرد تمهيد لباقي الموسم، لكنه كان ساحة كاملة فيها أعمال قصيرة قدرت تصنع حضور حقيقي، كل واحد منها بطريقته ونبرته الخاصة.

زر الذهاب إلى الأعلى