S.M.A.R.T. Chase: مطاردة ومغامرة بلا نهاية

على الرغم من ضعف القيمة الفنية لبعض الأفلام اللي بنشوفها، لكن مجرد قدرة الفيلم على دفعنا على مشاهدته من البداية للنهاية بدون الشعور بالملل ده بيعتبر انجاز بحد ذاته، علشان كده واحنا بنتفرج بنحاول نفهم هل المطلوب من الفيلم مجرد تسلية المشاهدين وعدم احساسهم بالزهق أم لا، وده اللي حصل لنا مع مشاهدة S.M.A.R.T. Chase

القصة

S.M.A.R.T. Chase بيحكي عن رجل أمن خاص بيُطلب منه تأمين قطعة أنتيكات صينية قديمة بيتم نقلها لخارج شنغهاي، لكن الأمور بتتعقد لما بيحاول مجموعة من الأشخاص سرقته، وبندخل في سلسلة لا تنتهي من المغامرات والمطاردات ومشاهد الأكشن المعقدة.

فريق العمل

الفيلم من أخراج تشارلز مارتن وتأليف كيفين بيرنهاردت وبطولة أورلاندو بلوم و لي وو و سيمون يام و هانا كوينليفان و ليين هانج و جينج ليانج

الأداء التمثيلي

الأداء التمثيلي للأبطال كان بيدور في نطاق من مقبول الى جيد، وبشكل عام كان مطلوب من أبطال الفيلم أنهم يقدموا أداء مرتبط بالأكشن والحركه والمطاردات أكتر من ارتباطه بقوة الأداء التمثيلي نفسه، علشان كده نقدر نقول أن الأداء التمثيلي كان جيد في حدود منطقة الأكشن والحركه.

السيناريو والحوار والأخراج

سيناريو الفيلم امتاز بأنه بسيط الفهم ومافيش ألغاز فيه، كمان زي ما قولنا مافيش ملل من الأحداث أو المطاردات خاصة بالنسبة لمحبي النوعية دي من الأفلام، لكن على صعيد تاني حوار الفيلم كان ضعيف والجمل الحوارية كانت محتاجه تكون أفضل وأقوى.

الديكورات والموسيقى والأزياء

الفيلم كان مميز على صعيد الديكورات والموسيقى التصويرية بشكل كبير، كمان حركة الكاميرا السريعة وتكتيك التصوير كل الأمور دي تصب في صالح الفيلم وتدل على أن اخراج الفيلم كان قوي ومش عاوز يقدم فيلم عادي أو مستهلك.

الخلاصة

فيلم S.M.A.R.T. Chase من نوعية الأفلام اللي مش هاتسيب المشاهدين لحظة واحدة للشعور بالملل، وننصح بمشاهدته لمحبي أفلام الحركة والمطاردات.

علشان تبقى عارف: أورلاندو بلوم اتخرج من مدرسة جيلدهول للموسيقى والدراما وقدم أدوار صغيرة قبل ما يبدأ في تقديم أدوار كبيرة زي دوره في Unlocked و S.M.A.R.T. Chase