Proud Mary: جولة في عالم الجريمة المنظمة
مؤخرا ظهرت مجموعة من الأفلام اللي بتعتمد على نظام جديد في تقديم مشاهد الحركة وهو الجمع بين المشاهد الرياضية واستخدام المسدسات، الأسلوب اللي بيتسمى Gun Fu وشوفنا أفلام كتير على نفس الأسلوب زي John wick على سبيل المثال. لكن هل نجح Proud Mary انه يلعب على نفس التيمة؟ تعالوا نشوف.
القصة
Proud Mary بيحكي عن قاتلة محترفة اسمها ماري بتشتغل لحساب الجريمة المنظمة، وبتقابل طفل صغير في احد عملياتها يبدو أنه بيسير على نفس خطاها، هل هاتتقبل ماري الأمر أم هاتحاول تنقذه من حياة الانحراف اللي داخل لها؟
فريق العمل
Proud Mary من تأليف كريستيان سويجال وإخراج باباك نجفي وبطولة تارجى ب . هينسون و نيل ماكدونو و داني جلوفر و زاندر بيركيلي و بيلي براون و مارجاريت آفري
الأداء التمثيلي
الأداء التمثيلي لتارجي ب هنسون يعتبر الأفضل على مدار أحداث الفيلم، ومن الواضح المجهود البدني اللي قامت بيه علشان تكون على قدر دورها في الفيلم، ولو كان الأخراج أفضل كان ممكن الفيلم يكون له مستوى أفضل بكتير من اللي شوفناه.
السيناريو والحوار والأخراج
سيناريو الفيلم سريع وبيدخل في الموضوع مباشرة، وقدر يصور لنا التغيرات في الحالة النفسية للبطلة بشكل جيد ومميز ويحسب للقائمين على تنفيذه، أما الأخراج فا نجح في توظيف عوامل الفيلم لصالح خدمة القصة، وخصوصا مشاهد الحركة اللي تميز في إخراجها وتقديمها للمشاهدين.
الديكورات والموسيقى والأزياء
ديكورات الفيلم كانت مميزة وتم استغلالها في أحداث الفيلم بشكل جيد، كمان الموسيقى التصويرية وتوزيعها على مدار الفيلم كان توزيع احترافي وخدم أحداث الفيلم بشكل جيد.
الخلاصة
فيلم Proud Mary بيحاول يسير على نهج مجموعة جديدة من أفلام الحركة، لو شوفتوه قولولنا هل نجحوا أم فشلوا من وجهة نظركم؟
علشان تبقى عارف:
تقييم الفيلم على موقع IMDB 5 من 10
