Underwater : الزلزال لوحده مش كفاية!
على الرغم من تصنيفه كفيلم رعب، إلا أن رأينا أن فيلم Underwater مايعتبرش فيلم رعب. وأن التصنيف الأصح له هو أنه فيلم إثارة وتشويق.
Underwater بيحكي عن طاقم من الباحثين موجودين في معمل تحت الماء بمسافة كبيرة. لكن زلزال كبير بيدمر المكان وبيجبرهم على محاولة الوصول للأمان بأي ثمن. المشكلة أن فيه كيان أخطر بكتير من الزلزال متربص بيهم. ياترى هو ايه؟
على الرغم من أن القصة ممكن تعطينا ايحاء أنه فيلم مرعب لكن المخرج وليام إيوبانك أختار أنه ياخد الفيلم لإتجاه الإثارة أكتر. علشان كده مش بنشوف (خضات) أو jump scares كتير في الفيلم. لكن الوحش فعلا كان قرار وليام انه يقدم كمية كليشيهات كبيرة جدا في الفيلم!
من أول مشهد لأخر مشهد هاتحس طوال الوقت أنك بتشوف مقاطع من أفلام رعب كتير زي A Quiet Place و The Descent و Aliens وغيرها من الأعمال. ولو كان المخرج اعتمد على نفسه وقدم الفيلم بدون الاقتباسات دي كان هايكون أفضل بكتير
صعب نحكم على الأداء التمثيلي في فيلم إثارة لأن الانفعالات المطلوبة من الأبطال مش بتكون كتير. لكن صعب برضو ننكر أن كريستين ستيوارت قدمت دور ممتاز. وهي من الممثلات المجتهدات اللي بيشتغلوا على نفسهم وشكلهم علشان يناسب أي دور يقوموا بيه.
والحقيقة أن باقي أبطال الفيلم هم كمان عملوا أدوارهم بشكل كويس. لكن سيناريو الفيلم لم يسمح لهم بأي تميز. يعني كل شخصية كانت بتدور في الفلك المرسوم لها بالظبط لدرجة أن أحد حد عنده ثقافة سينمائية بسيطة جدا يقدر يستنتج كل واحد من الأبطال موجودين هنا ليه. سواء الشخصية الكوميدية اللي بتلطف الأحداث أو الشخصية النسائية اللي بتقع في حب الشخصية البطلة أو الجريئة.. وهكذا.
Underwater فيلم بيلعب على نمط ثابت من أفلام الرعب والاثارة ومش بيحاول يطور أو يضيف له أي جديد. ممكن تشوفوه على جانب الخروجة لكن ما تنزلوش من البيت مخصوص علشانه.
