أفلام عيد الأضحى ٢٠٢٥ .. لم يحضر أحد
محمد البدري
طول عمرنا بنفضل موسم عيد الأضحى عن موسم عيد الفطر، علشان نوعية الأفلام اللي بتتعرض فيه بتكون أقوى ومؤثرة أكتر. لكن في موسم ٢٠٢٥ من الواضح إن الأفلام اللي داخله سباق عيد الأضحى قليلة ومافيهاش جديد يذكر. تعالوا نعرف أيه الأفلام دي وبتحكي عن ايه.
المشروع X : كريم عبد العزيز في حته تانيه
الفيلم الأول في سباق عيد الأضحى ٢٠٢٥ هو فيلم المشروع اكس. بطولة كريم عبد العزيز وياسمين صبري واياد نصار وأحمد غزي وعصام السقا.
المشروع اكس بيحكي عن ظابط شرطة بيحاول يتصدى لعصابة تهريب أثار، وفي نفس الوقت بيتعرف على غواصة عايشه في الجونة. ومن خلال الاتحاد بين الاتنين بنشوف مجموعة من المغامرات اللي مش بتنتهي.
الفيلم متميز جدا في البذخ الإنتاجي وإنتاج مشاهد الأكشن، والمخرج بيتر ميمي عامل مجهود ممتاز، وواضح ان الفيلم هايكون لاعب أساسي في موسم عيد الأضحى ٢٠٢٥
ريستارت : تامر حسني وجنون الترندات
الفيلم الثاني معانا هو فيلم (ريستارت) من بطولة تامر حسني وهنا الزاهد وباسم سمرة ومحمد ثروت وعصام السقا.
الفيلم بيحكي عن جنون الترند وسعي اتنين (محمد وعفاف اللي قام بدورهم تامر حسني وهنا الزاهد) لكسب فلوس من السوشيال ميديا بأي طريقة، وده اللي بيخلق الكوميديا من خلال أحداث الفيلم. وفي نفس الوقت فيه تركيز على خطورة انتشار الترندات ومحاولة الناس انها تكون (ترند) بأي شكل حتى لو على حساب حياتهم الشخصية.
سيكو سيكو : نجاح مستمر
أما مفجأة عيد الأضحى ٢٠٢٥ هي استمرار عرض فيلم سيكو سيكو من موسم عيد الفطر لحد دلوقت. وده نجاح لا يمكن نتجاهله. وممكن تقروا الريفيو التفصيلي بتاعنا عن الفيلم من هنا
سيكو سيكو من بطولة عصام عمر وطه الدسوقي، واللي بيلعبوا دور يحيي وسليم، أولاد العم اللي بيتوفى عمهم، وبيسيب لهم تركة عبارة عن سلع مش مشروعة، وبنشوف في الفيلم محاولتهم المستميتة لبيع (البضاعة) والحصول على أموالهم.
الفيلم زي ماقولنا حقق نجاح كبير، ومش بعيد يقدر ينافس في عيد الأضحى ٢٠٢٥. خاصة أن الموسم مش بيتعرض فيه أفلام جديدة للمرة الأولى من سنين طويلة.



