مقالات كايرو 360

الملك لير: عن الملك يحي الفخراني!

قراءة سهلة

اتشرفنا بحضور العرض الأول لمسرحية الملك لير، والحقيقة اننا من بعدها حاسين إننا ماكناش قدام عرض عادي، بقدر ما كنا قدام حالة كاملة من العظمة والجمال… مش بس علشان الأداء الأسطوري من الجميل المميز يحي الفخراني، لكن علشان حاجات تانيه كتير هانتكلم عنها في مقالنا عن مسرحية الملك لير نسخة ٢٠٢٥

أولا وقبل كل حاجه، عجبنا أن المسرحية بتتعرض على المسرح القومي، بدون تغيير في سعر التذاكر عن باقي عروض المسرح. بنتكلم عن أسعار ٦٠ و ٨٠ و ١١٠ جنيه للتذكرة الواحدة. يعني تقريبا بتمن ساندوتش شاورما، تقدر تتفرج على عرض مسلي وممتع وكمان فيه رسالة وعظة مكتوبة ومتنفذة بشكل رائع.

مسرحية الملك لير، بتحكي عن ملك عظيم بيملك مملكة واسعة وضخمة، وبيدين بالولاء له عدد ضخم من الحراس، والخادمين المخلصين، وعنده ٣ بنات، بيقرر في بداية المسرحية إنه يقسم ملكه بين التلات بنات. كل واحدة من البنات بتحاول تنافق أبوها علشان تاخد مساحة أكبر من الميراث، ماعدا الأخت الأصغر اللي بتتصرف بشكل عادي، وده بيضايق الملك لير، فا بيقرر يحرمها من الميراث.

بنشوف بعد كده ازاي قرار الملك لير بتقسيم ثروته أثناء حياته، ها يأثر عليه لما البنات تقرر تنقلب على الأب وتسئ معاملته. مش عايزين نحرق عليكم الأحداث أكتر من كده علشان تستمتعوا بمشاهدة المسرحية.

عجبنا جدا عدم التقيد بنسبة ١٠٠٪ بالنص الأصلي، والاهتمام بتقديم اسقاطات اجتماعية وسياسية مهمة جدا ومتماشية مع عصرنا الحالي، يحيي الفخراني في المؤتمر اللي اتعمل قبل المسرحية قال إن كل مرة يقرا الملك لير يكتشف فيها حاجه مختلفة، وده كان واضح جدا في تناوله للمسرحية في نسخة ٢٠٢٥، واللي عرف فيها يوصل كتير من الرسايل، لدرجة انه كان بيلتفت للجمهور أحيانا ويوجه لهم الكلام بشكل مباشر. بس برضو بطريقة تخليه مايخرجش من إطار العرض نفسه ولا يخرج عن النص.

كمان شخصية المهرج اللي ظهرت في المسرحية كانت بتوجه رسايل كتير للجمهور وللملك لير نفسه. أحيانا طريقة توجيه الرسايل بشكل مباشر بتضايقنا شوية، لكن الجميل إنها مكانتش صفة مسيطرة على العرض على العكس من أعمال تانيه بنحس انها برامج تعليمية موجهة للمشاهدين!

أكتر حاجه لفتت نظرنا وعجبتنا في المسرحية، الأداء العبقري من د. يحي الفخراني، وبالصدفة شوفنا الفخراني وهو داخل المسرح قبل بداية عرض المسرحية، وكنا مستغربين ازاي هايقدر يقدم أداء كويس بحالته الصحية اللي أكيد متأثرة بتقدمه في السن.. لكن بمجرد ما طلع الفخراني على المسرح، حسينا اننا بنتفرج على شخص تاني خالص.. طبعا كان ممكن باقي الممثلين يساعدوه في الحركة أو الجلوس، بس ده اتوظف كويس في السيناريو بشكل مايلفتش نظر الجمهور.

بس مع احترامنا الشديد لأداء الفخراني، بس لو كان أداء باقي الأبطال اللي معاه مش كويس، كان مستحيل يقدر يشيل المسرحية لوحده. وهنا تيجي أهمية باقي الأدوار في المسرحية، والحقيقة أن كل واحد من الأبطال قام بدوره على أكمل وجه وقدم أداء استثنائي. بس بعض الأسماء تستحق نتكلم عنها أكتر شوية.

الفنان طارق دسوقي قدم أداء ممتاز وطارق الكاشف وأمل عبد الله، وطبعا لا ننسى لقاء علي اللي قدمت دور ممتاز على الرغم من قلة مساحة ظهورها على المسرح، لكنها قدرت تلعب شخصيتها بشكل يخلي الجمهور لا ينساها حتى وهي مش على خشبة المسرح.

لا يمكن مسرحية الملك لير كانت تنجح بدون تصميم الرقصات والمعارك الأكثر من رائع، توظيف الإضاءة في العرض بطريقة عظيمة، والاهتمام بحركة وكلام الفنانين في خلفية المشاهد بنفس قدر الاهتمام بالأبطال اللي في مقدمة المشهد، كل ده يقول إننا أمام مخرج ممتاز هو شادي سرور.. واللي اهتم بكل تفصيلة وكل شاردة وواردة علشان يقدم لنا في النهاية عمل مسرحي لا يُنسى.

من أعظم مشاهد المسرحية مشهد المبارزة في الفصل الأخير، ومشهد المعركة بين الجيشين، وحتى مشاهد الرقصات في أول العرض، والحقيقة أن كل واحد اشتغل على المشاهد دي عمل أقصى ما يمكن من جهد علشان تطلع المشاهد حقيقية وممتعة الى أقصى حد. وفكرة استخدام شاشات في الخلفية لعرض الديكور بطريقة فنية وحديثة كانت فكرة ذكية وخلتنا ننسجم أكتر مع العرض.

مسرحية الملك لير، مش بس مسرحية ناجحة تقدر تقضي معاها وقت لطيف، هي مثال حي على القدرة رغم الظروف الصعبة.. قدرة فنان على الوقوف على خشبة المسرح يوميا، وتقديم أداء جسدي ونفسي أكتر من رائع رغم تقدمه في السن وحالته الصحية.. قدرة مسرح تابع للدولة على توفير عرض ثقافي غني، بسعر أكتر من مناسب، على مسرح أكتر من رائع.. قدرة مجموعة من الفنانين الشباب على تقديم أفضل ماعندهم علشان يثبتوا أن في مصر لسه جيل من الفنانين الشباب اللي قادرين يقدموا جديد فعلا..

وأخيرا.. قدرة الجمهور على إنه يفهم ويستوعب إن بيتقدم له فن حقيقي وجميل وممتع، والدليل على ده حالة الاقبال الأكثر من رائع على المسرحية، لدرجة أن حفلاتها كلها محجوزة بالكامل تقريبا. والجمهور بيحاول يلاقي تذكرة بأي شكل…

الملك لير نسخة ٢٠٢٥… برافو.

زر الذهاب إلى الأعلى