مقالات كايرو 360

مسلسل كتالوج

قراءة سهلة

محمد البدري

مافيش شك، أن الأعمال اللي انتجتها نتفليكس لمصر والمنطقة العربية، غيرت شكل الإنتاج في المنطقة، وعودتنا على فكرة البذخ الإنتاجي، البذخ اللي بيدي الفرصة للمؤلف يتخيل أي حاجه وهو واثق انها هاتتنفذ على الشاشة بالطريقة اللي في خياله بالظبط. الإنتاج اللي يضمن للمخرج انه يقدر يكتب الأسماء اللي عايزها كأبطال لمسلسله وهو واثق انهم هايمثلوا في العمل بتاعه لأنهم هايخدوا الأجر اللي يطلبوه. لكن هل الإنتاج هو العامل الوحيد اللي ممكن يخلي العمل ينجح؟ تعالوا نشوف الإجابة من خلال مسلسل (كتالوج).

(كتالوج) بيحكي عن يوسف (محمد فراج) اللي زوجته أمينة (ريهام عبد الغفور) بتتوفى بعد صراع طويل مع مرض السرطان وتترك له مهمة العناية بأولاده المراهقين كريمة ومنصور (ريتال عبد العزيز وعلي البيلي).

المهمة صعبة، والتحديات كتير. مش بس في العناية بالأولاد دراسيا، لكن كمان في كل نواحي حياتهم التانية، خاصة أن كريمة موهوبة في التمثيل ومنصور موهوب في كرة القدم، وده بيحط عبء أكبر على الأب اللي بيضطر يستعين بناس من الأسرة زي العم حنفي (خالد كمال) و الخال أسامة (أحمد عصام السيد). وده مش بيورينا بس مواقف كوميدية طول الوقت، ده كمان بيورينا مواقف غاية في التراجيديا. كأن المخرج وليد الحلفاوي والمؤلف أيمن وتار عايزين يضعونا في خلاط ضخم من المشاعر الإنسانية اللي بتضربنا كل حلقة.

كل حالة الزخم المشاعري دي مكانتش هاتظهر لولا (رمانة الميزان) اللي تمثلت في الجميلة سماح أنور في دور مديرة المنزل، والصراحة أن اختيارات سماح أنور الأخيرة كلها بتقول اننا أمام ممثلة من الطراز التقيل، وده مش غريب على سماح اللي شكلت جزء أساسي من المشهد الفني المصري في فترة سابقة، ولسه قادرة تدهشنا بأدائها اللي جاي من منطقة السهل الممتنع بشكل أمتعنا وحسسنا أننا قدام مدرسة قديمة من الفن والجمال.

وبما أننا بنتكلم عن الأداء التمثيلي.. احنا فاهمين كويس أن محمد فراج ممثل من العيار التقيل، لكنه في (كتالوج) بيروح لمنطقة تانيه من الأداء، فيه مشاعر مختلفة ومتضاربة، قدر فراج بعبقريته المعهودة انه يقدمها لنا كلها بشكل رائع. احنا شوفنا مع فراج مشاعر الأب التايه مع مسئوليات أولاده، والحبيب اللي بيحاول يخرج من قصة حب طويلة انتهت بفراق تراجيدي، والأخ المهموم بصحة أخوه، وحتى الجار اللي بيحاول يتفاعل بشكل إيجابي مع جاره القبطان جورج (بيومي فؤاد) اللي بيعاني من مشكلة نفسية تخليه مش قادر يغادر المنزل تحت أي ظرف لسنين طويلة.

ريهام عبد الغفور ممكن نعتبرها الحاضر الغائب في المسلسل، وعلى الرغم من وفاتها في الحلقة الأولى لكنها حاضره في مشاهد كتير في باقي المسلسل، والحقيقة ان ريهام ممثلة تقيلة وبتعرف توصل ملايين المشاعر بمجرد نظرة من عينها، ودورها كان خفيف على القلب والعين بشكل رائع.

ماينفعش مانتكلمش عن دور الأطفال العباقرة ريتال عبد العزيز وعلي البيلي، وتحديدا البيلي اللي لسه مقدم دور يوسف في مسلسل (لام شمسية) في رمضان الماضي عن التحرش الجنسي بالأطفال، ولو علي استمر في النوعية دي من اختيارات أدواره فا احنا هانكون أمام ممثل تقيل لا يشق له غبار خلال سنين قليلة فقط قادمة. وافتكروا كلامنا ده.

عجبنا جدا توظيف ضيوف الشرف في المسلسل، زي محمد محمود عبد العزيز اللي أتكلم عن تجربة فقد والده في مشهد طويل ومؤثر جدا، والحقيقة ان الحد الفاصل بين الحقيقة والخيال في مسلسل (كتالوج) واهي جدا، لأن مخرج العمل نفسه مر بتجربة الفقد لما عاش مع والده الفنان الجميل نبيل الحلفاوي نفس الظروف اللي بيعيشها أبطال مسلسلة تقريبا، وده خلى شغله على المسلسل (شخصي) جدا لدرجة انه أهدى العمل لروح والده.

الطبخة الفنية في (كتالوج) تبدو مبهرة. لكن ده مش معناه ان فيها بعض العيوب، زي انها تحولت عند بعض الحلقات لحاجه شبه الدروس التعليمية مش الفن الخالص. يعني احنا فاهمين أن رسالة العمل الأساسية هي رسالة لكل أب انه يكون متواجد في حياة أولاده، ومايخليش الشغل يحوله لماكينة ATM بدون مشاعر أو مشاركة حقيقية في حياة الأولاد. لكن مش لازم في كل حلقة نخلي النصيحة دي تتقال بالمستوى ده من المباشرة والتقليدية. لدرجة أننا نشوف فراج ماسك المايك وبيقول الكلام ده حرفيا تقريبا في حفلة تكريم أمينة في المدرسة. وفي كتير من الجمل الحوارية في المسلسل.

من الحاجات اللي ضايقتنا كمان اقتصار وجود شخصية القبطان جورج (بيومي فؤاد) للكوميديا بس. وكنا عايزين نشوف أبعاد إنسانية أكتر للشخصية دي، ونعرف أكتر الظروف اللي جعلت عنده الاضطراب النفسي اللي يمنعه من مغادرة المنزل، وبدون مبالغة نقدر نقول أن شخصية (جورج) ممكن يفرد لها عمل فني كامل يناقش الأمراض النفسية الغير منتشرة بكثرة. وواثقين أن الجمهور هايكون عندهم اهتمام بحاجة زي دي.

كل ده ممكن نغفره للمؤلف أيمن وتار اللي بيخرج للمرة الأولى تقريبا من مساحة الأمان الخاصة به في تقديم الكوميديا الصرفة في الأعمال اللي بيكتبها. أيمن بيحاول يقول من خلال (كتالوج) أنا عندي مستويات مختلفة وعميقة من الكتابة ومحتاج الفرصة علشان أقدمها، ونعتقد أن من بعد (كتالوج) أيمن هايدخل في مستوى جديد من الكتابة نفسنا نشوفه فيه، لأن أعماله الكوميدية الأخيرة مكانتش بنفس القوة.

نرجع للنقطة اللي اتكلمنا عنها في بداية مقالنا. هل البذخ الإنتاجي النتفليكيسي قادر لوحده انه يعمل عمل فني حلو؟ الإجابة البسيطة المباشرة القصيرة هي: لا. لكن في حالة (كتالوج) الإنتاج مكانش البطل الوحيد للعمل، لكنه كان العنصر المحفز اللي يخلي التوليفة الدرامية الجميلة دي تخرج على الشاشة بأفضل شكل ممكن، وبأحسن ممثلين، وبأفضل ديكورات مريحة للعين، وبأحسن مستوى من الكتابة والإخراج.

برافو فريق (كتالوج)، ويارب نشوف أعمال تانيه على نفس المستوى قريب.

زر الذهاب إلى الأعلى