ما تراه ليس كما يبدو قصة فلاش باك و أنت فقط
محمد البدري
اتفرجنا مؤخراً على مسلسل ما تراه ليس كما يبدو، والحقيقة إن فكرة المسلسلات اللي كل مجموعة حلقات منها، بتحكي قصة معينة، مش جديدة علينا ولا جديدة على الدراما بشكل عام، لكن صناع (ما تراه ليس كما يبدو) عايزين يلعبوا اللعبة بشكل مختلف المرة دي.
في قصة (فلاش باك) بنشوف المصور الجنائي (زياد الكردي) الشاطر جداً في شغله، وفي نفس الوقت بيحب زوجته مريم (مريم الجندي) حب جنوني، لكن في يوم عيد ميلادها، مريم بتتوفى في حادث مفاجئ، وبيفشل زياد في حل لغز القضية على الرغم من أنه بيبذل مجهود غير طبيعي في الموضوع ده.
بنشوف حياة زياد بعد مرور وقت طويل على الحادثة، وازاي مش قادر يتخطي فقد حبيبته، رغم الوقت الطويل، ورغم محاولة أصحابه المستمرة انهم يطلعوه من حالة الحزن، حتى لو من خلال انهم يرشحوا له بنت تانيه يتعرف عليها علشان يبدأ حياته معاها.
لحد دلوقت ممكن نشوفها قصة تقليدية عن الفقد، لكن اللي بيحصل بعد كده، ان حساب مريم على فيس بوك بيظهر اونلاين على الماسنجر، على الرغم من ثقة زياد إنها مش سايبه كلمة السر لأي حد من أهلها أو أصحابها، ومن هنا بنبدأ نشوف تطور في الأحداث غير طبيعي، مش عايزين نحرقه عليكم علشان تعرفوا تتفرجوا على الحكاية.
الأداء التمثيلي لأبطال الحكاية عجبنا، لكن عندنا بعض ملاحظات على أداء أحمد خالد صالح اللي كان ثابت زي ماهو في كتير من المشاهد، على الرغم من أنه المفروض يدينا انطباعات مختلفة مابين الحب للغضب لعدم الفهم، كمان نبرة صوت أحمد كانت محتاجه تتغير بتغير المشاعر والانفعالات، والحقيقة أن الصوت واحد من أهم أدوات الممثل، لكن حسينا كأن أحمد ثابت عند منطقة أداء الزوج المصدوم بوفاة زوجته ومش عايز يخرج بره منطقة الأداء دي بكامل أدواته كممثل. على الرغم من معرفتنا أن أحمد كممثل يطلع منه أحسن من كده.
لكن بطل الحكاية الأساسية كانت الحبكة.. الحبكة اللي بتأكد لنا في كل لحظة إن فعلا أحكامنا كبشر على الأمور ممكن تتغير بتغير فهمنا للقصة. وبيحتفظ لنا صناع القصة بـ Plot twist أخيرة بتغير لنا نظرتنا عن القصة كلها. للأسف مش حاسين اننا نقدر نتكلم أكتر في النقطة دي علشان مانحرقش القصة، لكن نقدر نقول لكم أجلوا حكمكم على الأحداث كلها لحد ما تشوفوا القصة للنهاية علشان فيها مفاجأة هاتخليكم تعيدوا النظر في القصة كلها، وممكن تعيدوا كمان النظر في أحداث كتير مرت في حياتكم وتعيدوا تقييمها من أول وجديد.
إخراج جمال خزيم كان واضح فيه الاهتمام بالتفاصيل، والرغبة في أن كل كادر يطلع بطريقة مبهرة وفنية، على الرغم من أن عنده صعوبة في إبراز القصة نفسها بكل التعقيدات والـ Twists اللي فيها. لكن جمال كان دايما مهتم بالتوازن بين إبراز القصة وبين جماليات الكادرات نفسها وده يحسب له.
خزيم هو مخرج القصة التانيه اللي شوفناها في المسلسل، والكلام هنا عن قصة (أنت وحدك)، اللي بتحكي عن سارة (تارا عماد)، الصحفية الشاطرة المتفوقة في شغلها، وسبب تفوقها هو قدرتها على تنظيم وقتها ومجهودها، من خلال انها تبعت لنفسها رسايل على واتس اب بالحاجات اللي المفروض تعملها خلال يومها.
كل الأمور بتمشي بشكل كويس، لحد ما تكتشف تارا ان فيه حد تاني بيبعت لها رسايل من حسابها. بالتالي شكوكها بتتجه ان حد عامل Hack على حسابها على واتس اب، لكنها بتكتشف ان مافيش حد اخترق حسابها، وأن الموضوع بيتعدي حدود المنطق. ومن هنا بتبدأ تشك في قواها العقلية، وفي نفس الوقت بتحاول تكتشف ايه اللي بيحصل في حياتها وحياة أمها (وفاء صادق) بالظبط.
وفاء صادق الممثلة الجميلة اللي شوفناها زمان في أعمال في منتهى القوة زي زيزينيا ولن أعيش في جلباب أبي، لسه قادرة تقدم أداء تمثيلي ممتاز، حاجه كده تجمع بين الاحترافية اللي اتبنت نتيجة أعمالها السابقة مع أحسن مؤلفين/مخرجين/ ممثلين في مصر في الفترة دي، وبين الشعور الصادق واحترافيتها في إدارة أدواتها كممثلة. وده استفادت منه تارا عماد اللي عرفت هي كمان تعمل أداء ممتاز. لكن الحقيقة ان السيناريو نفسه ماخدمش الاتنين علشان يطلعوا أفضل ماعندهم.
في قصة (أنت فقط) حسينا ان فيه تطويل في القصة علشان تستمر لخمس حلقات كاملة، وكان ممكن يتم اختصار القصة كلها في حلقة واحدة مثلا، كمان طريقة تعريف المشاهد بالشخصيات والعلاقات بينهم كانت سطحية شوية ومافيهاش رغبة في التجديد. يعني مش لازم كل شخصية تظهر على الشاشة بجملة حوارية تقول فيها : انا فلانة الفلانية وانتي تقربي لي كذا.. علشان نعرف العلاقة بينهم. كان ممكن نعرف ده من خلال الأحداث نفسها وبشكل طبيعي أكتر.
عمرو جمال في دور سليم، كان عليه عبء كبير في لحظة التحول أو الـ Twist اللي بيحصل في الأحداث، لكن أداؤه كان أضعف من أنه يتحمل مسئولية المرحلة دي في السيناريو، وحسينا ان لسه قدامه وقت أطول علشان تجربته كممثل تكون ناضجة أكتر ويقدر يشيل عبء التحول الدرامي ده.
كالعادة مش قادرين نخوض أكتر في تفاصيل القصة علشان مانحرقش الأحداث، لكن بشكل عام ولحد دلوقت، وحسب القصص اللي شوفناها في (ما تراه ليس كما يبدو) نقدر نقول ان إسم المسلسل حقيقي تماما، وان لازم تكونوا على استعداد لحبكات ملتوية وتغيرات جذرية بتحصل في كل قصة، ودي أمتع حاجة شوفناها في المسلسل على الرغم من باقي العيوب اللي اتكلمنا عليها.
ممكن نرجع لكم مع تحليلات أكتر لباقي قصص المسلسل، وممكن ساعتها نحس ببعض الحرية في حرق الأحداث لما يمر الوقت الكافي ونبقى متأكدين أن معظمكم شاف المسلسل كامل. لكن نصيحتنا الأخيرة ليكم.. شوفوا المسلسل بحذر شديد علشان ما تراه.. ليس كما يبدو… خالص.



