فيلم Apex : الإنسان أخطر ولا الطبيعة؟!
التقييم: ٣ نجوم
عجبك شوف: فيلم Everest
علشان تبقى عارف: تصنيف الفيلم على موقع IMDB هو ٦.١ من ١٠ حسب تقييم حوالي ١٠٠ ألف مستخدم للموقع
فيه ناس ممكن تحس بالإثارة لمجرد انها دخلت بيت الرعب في الملاهي، وناس تانية بتحتاج جرعة أكشن أكبر بكتير علشان الأدرينالين يتدفق في جسمها بلا توقف، ومن الناس دي ساشا اللي بتقوم بدورها تشارلز ثيرون في أحدث أفلامها Apex. لكن مش كل مغامرة بيدخلها الإنسان هايرجع منها سليم!
فيلم Apex بيحكي عن متسلقة جبال ومغامرة محترفة اسمها شاشا، بتتعرض لحادثة مأساوية مش عايزين نحرق أحداثها عليكم، وبعدها بفترة بتقرر ترجع تاني لحياة المغامرة اللي مش بتقدر تبعد عنها، لكنها بتلاقي نفسها فجأة في مواجهة قاتل مهووس، بيحاول يقتلها بأي تمن. فهل هاتقدر تهرب منه؟ وايه التمن اللي المفروض تدفعه علشان تنجو بنفسها؟
على الرغم من فكرة الفيلم النمطية وقدرة أي مشاهد عنده خبرة ولو بسيطة بأفلام الهروب من القاتل المحترف، على انه يستنتج كل أحداث الفيلم بعد ربعه الأول تقريباً، إلا أن Apex بيطرح فكرة فلسفية شوية، هل الخطر الحقيقي متمثل في الطبيعة؟ زي رياضة تسلق الجبال أو السباحة في الأماكن الخطيرة؟ أم أن الخطر الحقيقي الأشد قوة هو الإنسان نفسه لما يفقد عقله ويتحول لألة قتل بتحط خطط شريرة لإيقاع ضحايا حاسين بالأمان النسبي؟
الأداء التمثيلي لتشارلز ثيرون في الفيلم لا يعلى عليه، وده مش غريب على ثيرون اللي عملت أفلام زي Atomic Blonde و سلسلة أفلام The Old Guard ده غير مشاركتها المرتقبة في الفيلم اللي كلنا مستنيينه The Odyssey لكن إحقاقا للحق، الشخصية اللي بتقدمها ثيرون في الفيلم شخصية نمطية، مش بنتوقع منها تعبيرات كتير غير الهلع والغضب مثلا، بينما تارون إيجرتون بيقدم شخصية مُركبة معقدة، ونجح في تأديتها بشكل عظيم.
المخرج بالتاسار كورماكور ممكن نقول انه من المخرجين الشاطرين في إخراج الأفلام اللي لها علاقة بالبيئة الصعبة زي الجبال والأنهار، وسبق وأخرج لنا فيلم Everest سنة ٢٠١٥ وحقق نجاح كبير، وهو هنا بيرجع تاني للمعادية اللي هو شاطر فيها، فيلم فيه صراع ضد الإنسان، وضد الطبيعة في نفس الوقت.
لو بتدور على فيلم مسلي، تقضي قدامه حوالي ساعتين من المتعة والاثارة من أول مشهد لأخر مشهد، متاح على نتفليكس ومحقق معدلات مشاهدة عالية، فا ممكن نقول ان فيلم Apex هايكون الصفقة المثالية لك..
أما لو عايز فيلم فيه حبكة ملتوية Plot twist وأفكار فلسفية وحوارات درامية.. فا Apex مش الفيلم المناسب في الحالة دي.




