مقالات كايرو 360

القصة الكاملة : جريمة في الزمالك : هل الظروف الصعبة مبرر للجريمة؟

قراءة سهلة

بعد ماشوفنا القصة التالتة من مسلسل القصة الكاملة، السؤال الأساسي اللي بيدور في دماغنا هو: هل ظروف الانسان الصعبة مبرر له علشان يرتكب جريمة؟

جريمة في الزمالك بتبدأ بقصة نادية (صبا مبارك) بنت شابة عايشة ظروف صعبة جدا، مابين ظروف مادية صعبة، وأهل بيستغلوها ماديا، وخطيبها (أحمد بهاء الدين) اللي مش بيسيب تصرف واحد في كتاب “كيف تصبح ندلا بدون معلم” علشان يطبقه معاها.

الحاجة الوحيدة الكويسة في حياة نادية، هي الست الأجنبية – اسمها جريتا وقامت بدورها رندة كعدي- اللي بتشتري منها الطلبات في السوبر ماركت اللي هي كاشير فيه. بتعاملها كويس وبتديها فلوس باستمرار علشان تحسن حياتها.

مع الوقت وزيادة الثقة بين الاتنين، جريتا بتطلب من نادية تتطمن عليها باستمرار علشان عايشة لوحدها، وبتديها مفتاح بيتها، ومن هنا بتبدأ الأحداث تاخد منحنى غريب مش عايزين نحرقه عليكم.

وعلى الرغم من أن القصة مكونة من ٣ حلقات لكن من بداية الحلقة الأولى لقينا نفسنا مشدودين لتكملة المشاهدة للنهاية في جلسة واحدة ودي حاجة مش سهل تحصل خصوصا في زمن مشهور عنه تشتت الناس في المحتوى القصير وعدم رغبتهم في متابعة عمل مستمر على أكتر من حلقة.

صبا مبارك بتقدم شخصية (نادية) بشكل مثالي، بدون مبالغة أو تصنع، وبأداء معتمد بالأساس على تعبيرات الوجه وطريقة الحركة والكلام، وفكرنا دورها هنا بدورها في مسلسل ورد على فل وياسمين، لكن صبا بتقدر تدي لكل شخصية بتعملها (بروفايل) مختلف تماما ودي حاجة تحسب لها.

مانقدرش ننسى كمان دور جلال العشري في دور الأب، اللي قدر في كل تفصيلة في شخصيته يورينا دور الاب المتسلط اللي عايش عالة على بنته.

الميزة في إنتاجات شاهد الأصلية، إنها أعطت صناع الدراما حرية كاملة في تقديم العمل بتاعهم بالطريقة الأمثل اللي يستحق يظهر بيها على الشاشة، سواء كان فيلم أو مسلسل قصير أو مسلسل مكون من عدد من الحلقات كل مجموعة منها بتحكي قصة مختلفة، زي مابنشوف مع (القصة الكاملة) المقتبس عن قضايا عرضها صانع المحتوى سامح سند عن قصص حقيقية.

لكن (جريمة في الزمالك) مختلف شوية عن الجريمة الحقيقية، واللي الفاعل فيها فضل مجهول، لكن طبيعة الدراما بتفرض أحيانا تغييرات تتعمل في القصة علشان المشاهد يتقبلها.

القصة الكاملة انتاج متميز من شاهد، متعوب في تفاصيله بشكل كبير، وحكاية جريمة في الزمالك تستحق المشاهدة ونرشحها للناس اللي بتحب المحتوى عن الجريمة.

زر الذهاب إلى الأعلى