مقالات كايرو 360

مراجعة فيلم The Uprising: هل الغضب وحده يكفي لتحقيق العدالة؟

قراءة سهلة

التقييم: 3 ونصف من 5

عجبك شوف: Peterloo (2018) وBraveheart (1995)

نصيحة كايرو 360: الفيلم مدته ساعتين و8 دقايق، وتصنيفه العمري الأمريكي R بسبب مشاهد العنف والدماء. والأفضل تعرف شوية عن ثورة الفلاحين الإنجليزية سنة 1381 قبل المشاهدة، علشان تقدر تميز بين التاريخ الحقيقي والخيال السينمائي.

إيه اللي ممكن يخلي فلاح بسيط، كل طموحه إنه يزرع أرضه ويعيش في سلام، يقرر فجأة مواجهة الملك وجيشه؟ هل الظلم وحده كفاية علشان يحول إنسان عادي لقائد ثورة؟ الأسئلة دي بيطرحها فيلم The Uprising إنتاج 2026، من كتابة وإخراج (بول جرينجراس)، صاحب أفلام United 93 وCaptain Phillips، وبطولة (أندرو جارفيلد)، في معالجة سينمائية لثورة الفلاحين الإنجليزية سنة 1381.

الأحداث بتبدأ في إنجلترا بعد انتشار الطاعون الأسود، اللي تسبب في وفاة نسبة ضخمة من السكان، وساب البلد في أزمة اقتصادية واجتماعية قاسية. وسط الظروف دي بنتعرف على فلاح بسيط (أندرو جارفيلد)، فقد زوجته وأطفاله بسبب الوباء، وبقى عايش حياة مليانة حزن وفقر، بيشتغل في الأرض علشان يدفع الضرائب المفروضة عليه.

لما أحد محصلي الضرائب بيطالبه بمبالغ إضافية، وبيشكك في وفاة أفراد أسرته، الفلاح بيقرر إنه مش هيتحمل الإهانة أكتر من كده. المواجهة اللي بتحصل بينهم بتكون شرارة تمرد بيتحول تدريجيا لثورة شعبية، بينضم فيها البطل لشخصيات تاريخية حقيقية زي وات تايلر (كوزمو جارفيس)، والقس جون بول (جيمي بيل)، اللي بيطالب بالمساواة بين البشر ورفض الظلم.

ومع تحرك الثوار ناحية لندن لمواجهة الملك الشاب ريتشارد الثاني (وودي نورمان)، بنكتشف إن الصراع مش مجرد مواجهة بين فلاحين مظلومين وحكام أشرار، لكنه صراع بين مصالح متشابكة، وأفكار مختلفة عن العدالة والسلطة، وحتى عن حدود العنف المقبول لتحقيق التغيير.

أندرو جارفيلد قدم شخصية الفلاح بحضور إنساني مقنع، خصوصا في التعبير عن الحزن والغضب من غير الاعتماد المستمر على الحوار. لكن السيناريو ماقدروش يدي الشخصية العمق الكافي، وحصرها في مساحة ضيقة من المشاعر. وعلى الجانب التاني، جيمي بيل وكوزمو جارفيس قدموا شخصيتين مختلفتين في دوافعهم وأساليبهم، وده خلق تنوع مهم وسط الثوار.

إخراج بول جرينجراس اعتمد على الكاميرا المحمولة والحركة السريعة اللي اتعودنا عليها في أفلام Jason Bourne، ونجح في نقل الفوضى والعنف خلال المعارك. لكن الأسلوب ده أحيانا بيصعب متابعة الأحداث، خصوصا مع الإضاءة القاتمة والألوان الترابية المسيطرة على الصورة.

المشكلة الأكبر إن الفيلم بيحاول يناقش أفكار تاريخية وسياسية كتير، من غير ما يدي كل فكرة مساحتها الكافية. كمان الإيقاع مش متوازن، وفيه شخصيات بتظهر وتختفي من غير تطوير حقيقي، ومحاولة ربط الأحداث بأسطورة روبن هود بتثير تساؤلات عن مدى التزام السيناريو بالتاريخ. وان كنا نتوقع ان الفيلم يكون قصده فتح مساحة لتطويره واضافة شخصيات جديدة في أجزاء قادمة

في النهاية، The Uprising فيلم عنده فكرة قوية وتنفيذ بصري مناسب لأجوائه، لكنه ماقدرش يستغل كل إمكانيات حكايته. هيعجب محبي الدراما التاريخية والمعارك والصراعات السياسية، أما اللي بيدور على شخصيات إنسانية عميقة، فممكن يحس إن الثورة كانت تستحق معالجة أفضل.

زر الذهاب إلى الأعلى