مقالات كايرو 360

مراجعة فيلم The Whisper Man: أسماء كبيرة وحكاية مرعبة.. لكن فين الرعب الحقيقي؟

قراءة سهلة

التقييم: ٢.٥ من ٥

نصيحة كايرو ٣٦٠: الفيلم إنتاج ٢٠٢٦، ومتوفر على نتفليكس في مصر بترجمة عربية، ومدته حوالي ساعتين. الفيلم مقتبس من رواية بنفس الاسم للكاتب أليكس نورث، وتصنيفه العمري على المنصة ١٨ سنة فأكثر.

عجبك شوف: فيلم Prisoners إنتاج ٢٠١٣، من إخراج دينيس فيلنوف، واللي بيقدم حكاية اختفاء أطفال وصراع نفسي بين الخوف والرغبة في الوصول للحقيقة.

إيه أكتر حاجة ممكن ترعب أب؟ إنه يفقد ابنه؟ ولا إنه يكتشف إن فيه شخص غريب بيتواصل مع ابنه من غير ما يعرف؟ السؤال ده هو الفكرة اللي بيبني عليها فيلم The Whisper Man أحداثه، واللي بيجمع مجموعة من نجوم هوليوود بقيادة (روبرت دي نيرو) و(آدم سكوت) و(ميشيل موناجان). لكن هل الأسماء الكبيرة دي كفاية لصناعة فيلم رعب وتشويق ناجح؟

الفيلم بيحكي عن توم كينيدي (آدم سكوت)، كاتب روايات جريمة فقد زوجته، وبيحاول يبدأ حياة جديدة مع ابنه الصغير جيك (أكستون لوكا بورتو). علشان كده بينتقلوا لمدينة هادية، لكن المدينة دي عندها تاريخ مرعب مع قاتل متسلسل كان بيستهدف الأطفال، واشتهر باسم الرجل الهامس أو The Whisper Man، واللي اتحبس من سنين طويلة.

المشكلة إن حوادث اختفاء الأطفال بتبدأ تظهر من جديد، وفي نفس الوقت جيك بيحكي عن صديقة غامضة محدش غيره بيشوفها. ومع اختفاء جيك نفسه، بيضطر توم يستعين بوالده بيت ويليس (روبرت دي نيرو)، المحقق المتقاعد اللي سبق ونجح في القبض على القاتل، رغم إن العلاقة بين الأب وابنه مقطوعة من سنين.

هنا بيبدأ المخرج (جيمس أشكروفت) في اللعب على مساحة بين الرعب النفسي والتحقيق البوليسي، وبيطرح سؤال مهم: هل القاتل القديم كان بيشتغل لوحده، ولا فيه شخص تاني بيكمل جرائمه؟

أقوى فكرة في الفيلم مش بيكتفي بفكرة لغز من الخاطف ، لكنها العلاقة بين تلات أجيال: جد خسر علاقته بابنه بسبب انشغاله بالجريمة، وأب خايف يخسر ابنه، وطفل بيحاول يتعامل مع فقد أمه. للأسف السيناريو، اللي كتبه (بن جاكوبي) و(تشيس بالمر)، مش بيدي العلاقات دي مساحة كفاية، وبيفضل يطارد المفاجآت على حساب بناء الشخصيات.

آدم سكوت بيقدم حالة القلق والانهيار التدريجي بشكل مقنع، بينما روبرت دي نيرو بيعتمد على أداء هادي ومتحفظ، لدرجة إن بعض المواجهات بينه وبين ابنه كانت محتاجة انفعال أكبر. أما ميشيل موناجان في دور المحققة أماندا بيك، فوجودها مهم لتحريك التحقيق، لكن الشخصية نفسها مش مكتوبة بعمق يناسب موهبتها. وفي المقابل، (مايكل كيتون) بيترك انطباع مزعج ومناسب لطبيعة الحكاية رغم مساحة ظهوره المحدودة.

بصريًا، الفيلم بيعتمد على ألوان باردة وإضاءة قاتمة، بتساعد على خلق الإحساس بالخطر، لكنها مش بتعوض ضعف تصاعد التوتر. والمشكلة الأكبر إن بعض التحولات الدرامية ممكن تتوقعها قبل حدوثها، وبالتالي الفيلم بيفقد واحدة من أهم أدوات أفلام الجريمة والغموض: المفاجأة.

في النهاية، The Whisper Man فيلم عنده فكرة قوية وممثلين ممتازين، لكنه مش بيعرف يستغل إمكانياته بالكامل. ممكن يعجب محبي التحقيقات والجرائم الغامضة، لكن لو مستني فيلم يسيبك مشدود ومتوتر زي Se7en أو Prisoners، فغالبا هتخرج منه بإحساس إن الجرعة كانت محتاجة تبقى أعلى شوية.

زر الذهاب إلى الأعلى