By the Sea : الرومانسية تعانق التراجيديا!
المثل القديم بيقول “ابن الوز عوام”.. ومثال اخر بيقول “وراء كل رجل عظيم امرأة”.. لكن يبدو ان علاقة (انجلينا جولي) و(براد بت) هاتحول المثل الأول الى “زوج الوزه عوام”.. والثاني الى “وراء كل امراة عظيمة… رجل”!
من تأليف وإخراج وبطولة انجلينا جولي، بنشوف قصة رومانسية تراجيدية عن زوجين بيسافروا الى فرنسا لقضاء عطلة طويلة، لعلها تساهم فى إنجاح علاقتهم الزوجية اللى بتمر بأزمة كبيرة.. الزوج (رولاند) مؤلف بيحاول يكتب كتاب جديد لكن الوحي بيقاطعه لانشغاله بالخلافات مع زوجته الراقصة السابقة (فانيسا) واللى بتعاني من ضعف زوجها الجنسي واحساسها الدائم بالفراغ وانعدام الهدف.
زي ما احنا شايفين الفيلم كل شخصية فيه ثقيله وموزونه ولها اكثر من بعد، وينفع يخرج منها اكثر من قصة تقدم بشكل منفصل، ومع دخول زوج وزوجه شابين متزوجين حديثا فى غرفة الفندق المجاور لأبطالنا، بتزيد القصة تعقيدا وبتستوي الأحداث على نار هادئة، يمكن العيب الوحيد للفيلم –واللى منعنا من اعطاء الفيلم5نجوم كاملة- كانت بتتمثل فى النار الهادئة زيادة عن اللزوم اللى تم طهي الأحداث عليها، بشكل اشعرنا فى بعض الأحيان بالملل، واشعر المشاهدين اللى ليس لهم صبر ان الوقت والمال اللى انفقوه فى مشاهدة الفيلم راح هدر.
من المشاهد الأولى للفيلم واحنا بنشوف تميز واضح للفيلم على مستوي الصورة.. كادرات هادئة واثقة واسعة للبحر والمناظر الطبيعية، بدون تطويل او استعراض عضلات ممكن يقع فيه اي مخرج مبتدىء بيحاول يتعالى اخراجيا على الجمهور لتعويض نقص خبرته، وهو الفخ اللى لم تقع فيه (انجيلينا) اللى اختارت توقع عملها الأول بإسم: (انجلينا جولي بيت) بعدما اختارت ربط اسمها باسم زوجها (براد بت).
على الرغم من شهرته الواسعة فى العالم اجمع كساحر للنساء، وواحد من اكثر ممثلين هوليود جاذبية، الا ان سحر شخصية (رولاند) طغي على غرور (براد بت) الشخصي، ودفعه لتقديم دور رجل سكير، ضعيف جنسيا، غاضب وحزين ومكتئب طوال الوقت، الأمر اللى اطلق قدراته التمثيلية الى العنان واعاد تقديم فنان هوليودي متميز من جديد من خلال نص مكتوب بقوة ولم يكن يحتاج سوي لفنان على قدر (بت) لتقديمه.
الموسيقي التصويرية والديكور لعبوا دور متميز فى الفيلم، الموسيقي كانت على مستوي الأحداث وقادرة على التصاعد مع وتيرة الأحداث بشكل ممتاز ومريح للأذن ومساعد على الغوص فى أحداث الفيلم، اما الديكورات فا سافرت بينا لعالم مختلف ومتماسك، وصنعت لوحات فنية للفندق اللى بيعيش فيه الزوجين، ورسمت مع المناظر الطبيعية اللى تم اختيارها بعناية كادرات فى غاية الروعة.
الرقابة المصرية مارست هوايتها المفضلة فى (القصقصة) من الأفلام.. بعض المشاهد اللى تم حذفها اخل بالتسلسل الدرامي للأحداث وجعلنا نشعر ان الأحداث فيها شىء غلط او ان المونتاج مش مظبوط. الحقيقة برضو احنا مش عاوزين نتحامل على الرقابة بدرجة كبيرة لأن لينا تجربه مع فيلم The Wolf Of Wall Street واللى عرفنا بعد مشاهدته بدون قطع رقابى اسباب ومبررات الرقابة فى قطع حوالى 45 دقيقة من زمن الفيلم!
By The Sea واحد من أفضل الأفلام الرومانسية اللى شوفناها فى 2015 ان لم يكن افضلهم على الإطلاق، لكننا لا ننصح بمشاهدته لأصحاب الشخصيات الحساسة، او اللى بيعانوا من مشاكل فى حياتهم الزوجية او الناس الأكثر ميلاً للإكتئاب لأن الفيلم فيه جرعة تراجيدية لا يستهان بها، كمان لا ننصح بمشاهدته للمشاهدين عديمي الصبر لأن الفيلم محتاج تركيز واحداثه بطيئة الى حد ما.
