أجمد 10 أفلام عربية فى 2016
زي ما عودناكم فى نهاية كل سنة بنقدم لكم كشف حساب أفضل الأفلام العربية اللى عرضتها سينمات القاهرة فى السنة الماضية… كان نفسنا نزود على كلامنا ونقول إن الإختيار كان صعب والمنافسة شرسة على لقب أفضل الأفلام وكده، لكن الحقيقة إن الموسم السينمائى العربي فى 2016 كان ضعيف جدا، وهزيل جدا.
يمكن عزاؤنا الوحيد إن حالة الضعف دى مش بس فى الأفلام العربية، لكن على سبيل المثال الإنتاج الهوليودي فى 2016 كان ضعيف هو كمان، وبصعوبة لما بنلاقى فيلم أو اتنين نضمهم لقائمتنا لأفضل الأفلام خلال السنة… تعالوا نشوف القائمة.. واللى رتبناها من الأضعف للأقوي.
10-من 30 سنه
محاولة من أحمد السقا ومني زكي وشريف منير تقديم فيلم كوميدي أكشن دراما فى نفس الوقت… الحالة دي بيعرف أهل بوليود والسينما الهندية إنهم يقدموها كويس، لكن عندنا إحنا بتكون النتيجة سمك لبن تمر هندي..لكن ميزة من30 سنه إن كان فيه إجتهاد كبير ومحاولة لتحقيق نجاح عالي.. يمكن الحظ مكانش من نصيب الفيلم قوي، لكنه يستحق يكون فى قائمتنا ولو كأضعف فيلم قوي فى 2016!
محاولة قوية من أسر ياسين للعودة بقوة.. دراما مختلطة بأكشن بشكل لا يمكن فصلهم عن بعض، ودور متميز –زى ما عودنا دايما- لمحمود حميده، وطبعا ما ينفعش ننسى نسرين أمين اللى على الرغم من اهتزاز اختياراتها السينمائية.. قدرت تقدم أداء مش بطال فى الفيلم.
من عوالم الإنترنت والسوشيال ميديا بنشوف مغامرة كوميدية جميلة كتبها إسمين يعرفهم كويس المتابعين على الفيس بوك وتويتر.. شريف الألفي وهشام منصور.. أما البطولة فكانت من نصيب عمرو يوسف و دينا الشربيني واللى قدروا يقدموا أداء تمثيلي متميز، خاصة ان موضوع الفيلم مساعدهم على تقديم أداء قريب من حياة الأزواج الجدد والمشاكل اللى بتواجههم.
واحد من أجرأ الأفلام فى 2016 بسبب موضوعه اللى بيتناول تابو الجنس والجسد بشكل عام، الأداء التمثيلي كان قوي، كمان الإضاءة وتكنيك التصوير لعبوا أدوار مهمة علشان نحس بمشاعر الأبطال كإننا عايشين معاهم فى منطقة منعزلة فى مساحة مفتوحة من الأرض المملوكة لرجل أعمال غني بيكتشف علاقة محرمة بين إتنين من اللى عايشين فى العزبه.
من الجرأة للكوميديا من خلال فيلم جحيم فى الهند.. الفيلم من بطولة محمد عادل إمام والفنانة الشابة اللى بنتوقع لها مستقبل متميز ياسمين صبري واللى حققت نجاحات كبيرة فى اختياراتها الفنية فى الفترة الماضية، وطبعا بيومي فؤاد كمعامل مشترك بين معظم أفلام 2016 وواضح إنه مكمل لبدايات 2017 كمان.
سواء اتفقنا أو اختلفنا على قدراته الفنية، إلا أن أحمد حلمي قدر يحقق حالة من النجاح المستمر على مدي فترة طويلة.. إسم زي إسم حلمي أصبح علامة جوده معروفة على أي فيلم بيقدمه، وقدر يحقق جماهيرية ونجاح متميزين فى فترة قصيرة.
لف ودوران مش أحسن أفلام حلمي، لكنه فيلم يستحق يكون فى قائمتنا بما إننا بنتكلم عن أفضل الأفلام فى 2016.. يمكن لو رجعنا للخلف كنا هانفتكر فيلم اسف على الإزعاج واللى بنعتبره أفضل أفلام حلمي على الإطلاق، وأكيد كان واحد من أقوي الأفلام أيامها,
الفيلم الأخير للمخرج الراحل محمد خان.. محمد خان واحد من أهم وأقوي أسماء المخرجين فى مصر والعالم العربي.. لازم نعترف إن قبل زحمة الصيف مش أفضل أفلام محمد خان، لكنه يظل فيلم مؤثر وقوي خلال 2016، والفيلم أثار حالة من الضجة مع بداية عرضه بسبب بعض المشاهد اللى تم تصنيفها كمشاهد جريئة.
قبل زحمة الصيف من تأليف غادة شهبندر وبطولة ماجد الكدواني وهنا شيحه و أحمد داوود و هاني المتناوي وغيرهم من الأبطال، وبيحكي عن مجموعة من الأشخاص بيلعب القدر دور مهم فى اجتماعهم فى كومباوند واحد… والعلاقات اللى بتنشأ نتيجة التجمع ده.
3-هيبتا
إقتباساً عن واحدة من أشهر وأنجح الروايات اللى صدرت مؤخرا –واللى بتحمل نفس الإسم- للكاتب محمد صادق… نقدر نعتبر فيلم هيبتا من الأفلام اللى تستحق عن جدارة إننا نضمها لقائمتنا القصيرة عن أفضل أفلام 2016 … الفيلم بيحكي عن قصة محاضر بيقدم محاضرة عن الحب والخطوات اللى بياخدها الحب فى حياتنا، ومن خلال المحاضرة بنشوف قصة بيتفاعل فيها أبطال الفيلم وهم عمرو يوسف وياسمين رئيس و أحمد داوود وجميلة عوض و أحمد مالك، وغيرهم من أبطال الفيلم.
الكاست الخاص بالفيلم متميز جدا ومن أفضل الفنانين الشباب فى مصر تقريبا، ولما يجتمع النص القوى مع الأداء التمثيلي الرائع بنكون قدام فيلم متميز هو هيبتا.
2-اشتباك
واحد من أحسن الأفلام اللى شوفناها خلال 2016 واللى كتبه محمد وخالد دياب، وأخرجه محمد دياب، ومن بطولة نيللي كريم و طارق عبدالعزيز و هاني عادل و أحمد داش و أحمد مالك و عمرو القاضي.
على الصعيد الظاهري الفيلم بيحكي عن مجموعة من المواطنين المصريين واللى بيتم احتجازهم فى أحد عربيات الترحيلات. لكن فى الحقيقة الفيلم بيعتبر تشريح لكل الطوائف السياسية والإجتماعية فى مصر فى عهد ما بعد الثورة.
عناصر قوة الفيلم كتيرة ومتعددة، منها الديكور المتميز، ومنها الحوار الأكثر من رائع، وطبعا الأداء التمثيلي لكل الأبطال اللى قدروا يقدموا ملحمة سينمائية مذهلة فى مساحة ضيقة من الديكور هى سيارة الترحيلات.
فى رأينا فيلم البر التاني هو أفضل أفلام سنة 2016.. وده له أسباب كتيرة.. أولا القصة المتميزة اللى بتناقش قضية حقيقية ومؤثرة فى المجتمع المصري وهى قضية الهجرة غير الشرعية واللى أصبحت ظاهرة فى المجتمع المصري خاصة بين الأوساط المعدومة مالياً واجتماعياً.
السبب التاني اللى بيخلينا نعتبر البر التاني أفضل أفلام العام هو فريق التمثيل فى الفيلم المكون من محمد علي و حنان سليمان و عبدالعزيز مخيون و عمرو القاضي و عفاف شعيب و محمد مهران وهم كلهم ممثلين بيتم اعادة إكتشافهم وتقديمهم من جديد فى إطار أحداث الفيلم اللى ألفه زينب عزيز وأخرجه على أدريس… برافو.
دي كانت قائمتنا لأفضل الأفلام فى 2016.. عاوزين نعرف رايكم فينا، وياريت تشاركون بقوائمكم الخاصة.
