Hacksaw Ridge : فيلم يستحق الأوسكار
بداية من شهر نوفمبر وحتي حفل الأوسكار فى فبراير2017، هانبدأ فى استقبال مجموعة من الأفلام اللى بيدفعها المنتجين فى الشهور الأخيرة قبل الأوسكار للمنافسة على الجائزة الأكثر أهمية فى تاريخ السينما فى العالم.. ومن المعروف إن بعض التيمات بتأثر بشكل أكتر من غيرها فيما يتعلق برأي لجان التحكيم الخاصة بالمسابقة العالمية، ومن بين التيمات دي.. تيمة الأفلام المأخوذة عن قصص حقيقية.
على مدار سنة 2016 ماشوفناش أفلام كتير تستحق الأوسكار، والحقيقة إن نوعية الإنتاجات السينمائية خلال السنة كانت مابين متوسطة الى سيئة، لكن Hacksaw Ridge قدر يخالف توقعات الجميع ويقدم سيمفونية سينمائية جميلة ومتميزة.. وده اللى هانتكلم عنه بالتفصيل دلوقت.
Hacksaw Ridge من إخراج الممثل المتميز والمخرج ثابت الخطي (ميل جيبسون)، واللى يعتبر من وجهه نظرنا أفضل ما قدمه للسينما كمخرج، والفيلم من بطولة أندرو جارفيلد و ريتشارد بيروس و جاكوب وارنر و مايلو جيبسون (إبن ميل جيبسون).
الفيلم مقتبس عن قصة حياة ديزموند دوس، الشاب الأمريكي الرافض لفكرة التجنيد الإجباري والمشاركة فى قتل الأبرياء خلال الحروب، لكنه بيتطوع للخدمة فى الحرب العالمية الثانية كمسعف فى الجيش الأمركي، وعلى الرغم من إنه لم يطلق رصاصة واحدة خلال الحرب ولم يحمل سلاح، إلا أنه أنقذ كتير من الأرواح واستحق وسام الشجاعة واحترام الجيش والمجتمع الأمريكي.
سيطرة ميل جيبسون كمخرج كانت واضحة تماماً على الفيلم، خاصة فى النصف الأخير واللى اتصف بالعنف والدموية الزايدة، الأمر اللى بيخلينا لا نرشح الفيلم لمشاهدة الأطفال أو المشاهدين اللى بيتضايقوا من مشاهد العنف والدم وماشابه.
الأداء التمثيلي لكل الأبطال كان متميز، على الرغم من الحوار المتكلف أو المصطنع بعض الشىء، لكن الأداء التمثيلي وخصوصاً المشاهد الدرامية كان متميز جدا، وقدر كل المشاركين فى الفيلم انهم يوصلوا لنا مشاعرهم ببساطة وسهولة، لكنها من نوع السهل الممتنع، واللى ساعدهم على ده قوة السيناريو وارتباطه الشديد بالأحداث الحقيقية اللى تمت خلال الحرب.
الموسيقي التصويرية لعبت دور مهم ومتميز فى الأحداث، وتكاملت مع الديكورات المتميزة واللى قدرت ترجعنا بالزمن لفترة الحرب العالمية الثانية بكل ما فيها من مهازل لا إنسانية ومواقف صعبة وحالة من الجنون الجماعي اللى أصابت العالم فى الفترة دي.
Hacksaw Ridge فيلم حربي إنساني رائع ومتميز، ويستحق مشاهدة متأنية، وأكيد فى انتظاره فى ساحة المنافسات الرئيسية على الأوسكار.
