The Neighbor: فيلم رعب لزوم الهالوين
مع حلول موسم عيد الهلع، بتستمر السينمات في تكثيف عرض مجموعة من أفلام الرعب بغض النظر عن تاريخ نزولها السينمات العالمية، وده بيعمل حالة رواج لمجموعة من الأفلام المرعبة اللي بتكون مش على قدر المستوى، وللأسف الشديد The Neighbor يعتبر من ضمن الأفلام دي.
القصة
الفيلم بيحكي عن زوج وزوجة بيكتشفوا جار جديد لهم وبيحاولوا يكونوا صداقة جيدة معه، لكنهم بيكتشفوا انه بيخبي سر كبير، والسر ده بيدخلهم في مواجهة صعبة وفيها كتير من المشاهد والمواقف المرعبة اللي المفروض توقف الدم في عروق المشاهدين.
فريق العمل
الفيلم من أخراج ماركوس دونستان وتأليف باتريك ميلتون وبطولة جوش ستيوارت و ميليسا بولونا و اليكس إيسو و روني جين بليفنز و جاكلين فليمينج
الأداء التمثيلي
على الرغم من محاولة الاجتهاد من أبطال الفيلم علشان يقدموا لنا في النهاية عمل رعب جيد، لكن السيناريو والأخراج لم يساعدوهم، واكتفينا بمشاهدة الممثلين وهم بيقدموا لنا مشاهد من الرعب والهلع بدون أي محاولة لخلق رابط بين الأحداث غير رابط واهي جدا، الأمر اللي افقدنا التعاطف والتفاعل مع أبطال الفيلم ومع الأحداث نفسها.
السيناريو والحوار والأخراج
سيناريو الفيلم أدخر الجزء الأكبر من الرعب والمشاهد المرعبة لقرب نهاية الأحداث، وده تركنا في البداية مع سلسلة من الأحداث المتوقعة والغير مرعبة واللي حسينا من خلالها أنها مش بتقدم أي حاجه غير دفع الأحداث دفعا للمواجهة الأخيرة، ولو كان تم استغلال الوقت ده في زيادة ارتباطنا العاطفي بأبطال الفيلم في رأينا الفيلم كان ممكن يكون أقوى، ودي غلطة أساسية للسيناريو والأخراج.
الديكورات والموسيقى والأزياء
المؤثرات الصوتية والموسيقى في الفيلم كانت قوية، كمان الديكورات قدرت تنقلنا بصريا لمنطقة أحداث تصوير الفيلم، كمان لا ننسى الخدع الفنية المتقنة واللي ساهمت بدرجة كبيرة في شعورنا أن الفيلم قابل للمشاهدة.
الخلاصة
لو كنت من محبي عيش تجربة الرعب مع أي فيلم رعب في فترة الهالوين.. في الحالة دي بس ننصحك بمشاهدة The Neighbor
علشان تبقى عارف:
الفيلم بتدور أحداثه في ولاية ميسيسيبي الأمريكية
