ريح المدام: أحسن الوحشين في كوميديا رمضان!
قبل ما نتطرق معاكم لمسلسل ريح المدام ورأينا فيه، عاوزين نحكيلكم حكاية الوسط الفني عارفها كويس جدا. فريق هشام ماجد وشيكو وأحمد فهمي لما انفصل، حاول كل شق من الفريق إنه يعيد اكتشاف وتقديم نفسه من جديد. ومع إعلان هشام ماجد وشيكو الانضمام لأحمد مكي في مسلسل خلصانه بشياكه، بينما قرر أحمد فهمي التعاون مع أكرم حسني صاحب شخصية المذيع الكوميدي سيد أبو حفيظة، واللي كانت مشاركاته بعيدا عن الشخصية دي ضعيفة وغير كوميدية بشكل كبير، ناس كتير توقعت نتيجة السباق الرمضاني الكوميدي انها هاتحسم للثنائي هشام وشيكو، بتعاونهم مع أحمد مكي اللي قرر يرجع بقوة بعد استمراره لوقت طويل في تقديم شخصية الكبير في المسلسل اللي بيحمل نفس الإسم.
لكن بمتابعتنا للمسلسلين وجدنا أن ريح المدام قدر يتفوق على خلصانه بشياكه، وقدر يهزم باقي المسلسلات الكوميدية زي هربانه منها بطولة ياسمين عبد العزيز. لكن مش معنى أن ريح المدام هو المسلسل الأفضل في رمضان من وجهة نظرنا، ده معناه إنه المسلسل الأقوى. ده يمكن بسبب إنه بيتنافس مع أعمال ضعيفه مش أكتر!
قصة المسلسل
المسلسل ماشي بنمط الحلقات المتصلة المنفصلة. والمسلسل بيحكي عن الزوج الخائن (أحمد فهمي) واللي بيتسبب في دخول زوجته (مي عمر) في حالة نفسية بتجعلها تتقمص كل يوم شخصية جديدة، الأمر اللي بيدفع فهمي لمحاولة استرضائها والزواج منها في كل حلقة، بمساعدة صديقه أكرم حسني.
فريق العمل
المسلسل من بطولة أحمد فهمي ومي عمر وأكرم حسني، بمشاركة رجاء الجداوي وإسلام إبراهيم وأيمن منصور وغيرهم من الفنانين. والإخراج لكريم العدل ومن تأليف تامر إبراهيم.
الأداء التمثيلي
كان من الواضح أن العبء الكوميدي للمسلسل ملقي بالكامل على أحمد فهمي وأكرم حسني، بينما تحملت مي عمر عبء الدراما وربط الحلقات ببعضها مع قليل من الكوميديا، وبشكل عام مي من الوجوه البريئة اللي بنحب نشوفها على الشاشة.
أكرم حسني تفوق على نفسه وقدر يقدم أداء أكتر من رائع، وكان من الواضح تركيزه الكبير مع أبعاد شخصيته اللي من الواضح أنها اتكتبت بتركيز كبير. كمان شخصية أحمد فهمي على الرغم من أنها شخصية كلاسيكية ومعروف دوافعها وأغراضها، لكن فهمي قدر يقدمها بشكل مميز وعظيم.
الإخراج – السيناريو – الحوار
إخراج المسلسل تميز بقدرته على الموازنه بين الكوميديا وبين عدم تقديم أحداث مسطحة، لكن السيناريو والحوار وقعوا في أكتر من غلطه منها على سبيل المثال جملة أحمد فهمي في وصف فريق بلاك تيما على إنه (بلاك طينه)، الأمر اللي أكسب الواقعة بعد عنصري أجبر صناع المسلسل على الاعتذار ووضعهم في خانة نيران الفريق الشهير.
بنعيب كمان على المسلسل وجود بعض الايفيهات الجنسية والتلميحات اللي ممكن تكون مش مناسبه لكل المشاهدين. لكن مع نظام التصنيف الجديد اللي من أوائل المرات نشوفه في الدراما العربية بالشكل ده ممكن يكون لصناع المسلسل بعض العذر، لكن في نفس الوقت بعض حلقات المسلسل ممكن تكون مش مناسبه للمشاهدين المحافظين.
الموسيقى والديكور والأزياء
موسيقى المسلسل كانت غير مميزة وغير ملحوظه بالمرة، على عكس الديكورات اللي كانت متكلفة وواضح فيها الاهتمام والابداع، كمان أزياء الشخصيات كانت ممتازه ومعبره عن روح كل شخصية ومتغيره من دور للتاني حسب الأحداث.
الخلاصة
في راينا ان ريح المدام يكسب افضل كوميديا في رمضان. لكن ده مش معناه انه اقوى كوميديا شوفناها. لكن ده بسبب ضعف باقي المسلسلات الرمضانية الكوميدية.
