Thank You for Your Service: الحرب ممكن تعمل ايه في الجنود؟!

أفلام كتير تناولت فترة الحرب الأمريكية في العراق، لكن أفلام قليلة اللي بتخوض داخل منطقة الصراع النفسي داخل الجندي ما بين ضرورة الالتزام بالواجب المطلوب منه، وفي نفس الوقت شعوره أنه في الأخر مُحتل وأن الأرض دي مش بتاعته.

القصة

Thank You for Your Service بيحكي عن مقاتل أمريكي بينضم لصفوف الجيش وبيسافر للخدمة في العراق. وهنا بيتعرض لعدد كبير من الأهوال والمصائب المصاحبة للحرب. وبعد عودته لبلاده من جديد بيشعر أن الحرب لسه بتطارده. وأن اللي شافه وعمله في العراق بيطارده حتى في الولايات المتحدة. هل هايقدر يتعايش مع كل المشاكل دي؟

فريق العمل

الفيلم من تأليف وإخراج جايسون دين هول اقتباسا عن كتاب ديفيد فينكل. أما البطولة كانت من نصيب هالي بينيت و مايلز تيلر و إيمي شومر و كيت لين شيل و جو كولي و كيشا كاستل-هيوز

الأداء التمثيلي

كان لازم تهتم جدا ونركز في الأداء التمثيلي في فيلم Thank You for Your Service علشان طبيعة التجربة والانفعالات في الفيلم ده قائمة على تمثيل أبطاله، وعلى قدرتهم على أنهم يعكسوا لنا طبيعة المشاكل النفسية اللي بيعانوا منها.

والحقيقة أن كل أبطال الفيلم قدروا يعكسوا لنا طبيعة الصراع اللي بيدور جواهم. والأنعكاس ده كان بالطريقة الصعبة: نظرات العيون وطبقة الصوت، وغيرها من أدوات الممثل اللي عرفنا يستعملوها بشكل صحيح تماما علشان يوصلوا لنا شعورهم وانفعالاتهم المختلفة.

السيناريو والحوار والأخراج

سيناريو الفيلم كان جيد وقوي، لكن للأسف حسينا بالملل خاصة في الجزء الثاني من الأحداث، ولو قدر الأخراج أنه يسيطر على خط سير السيناريو بشكل أفضل من اللي شوفناه في النهاية كان هايكون أفضل. لكن من الواضح أن المخرج كان مهتم بأداء الأبطال وفاته أنه يظبط سرعة سير السيناريو وخط سيره.

الديكورات والموسيقى والأزياء

ديكورات الفيلم كانت أكثر من رائعة، خاصة أن الفيلم بيصور مجموعة من المعارك في العراق ثم مشاهد تانيه في أمريكا، بالتالي كان فيه تنوع كبير في الديكورات وأماكن التصوير. الموسيقى التصويرية كمان على الرغم أنها لم تكن جديدة علينا لكن مستواها كان متميز ونقلتنا لمساحة الأحداث اللي بيناقشها الفيلم.

الخلاصة

Thank You for Your Service فيلم حربي نفسي متميز ويستحق المشاهدة بتركيز.

علشان تبقى عارف:

الفيلم يعتبر أول تجربة إخراجية لـ جايسون دين هول