Beautiful Boy: السينما تعلن الحرب على الإدمان!
وقت قصير عدى على مشاهدتنا لفيلم Ben is Back واللي بيتناول الإدمان. ومن الواضح أن السينما مشددة حصارها لتيمة الإدمان في الفترة الأخيرة وده اتجاه قوي ومميز. وفي رأينا لو السينما مش هاتناقش القضايا دي بالجرأة دي. مين اللي يقدر يعمل كده؟!
Beautiful Boy مأخوذ عن واحد من الكتب الأكثر مبيعاً في أمريكا. وبيحكي عن شاب مدمن لمخدر الميث، ومحاولاته المستمرة للتعافي – ومن ثم الأنتكاس والتعافي من جديد- وكل ده من خلال مساعدة ومعاونة والده له.
تيموثي شالميت بطل الفيلم اضطر يشتغل على نفسه علشان يقدم دور الإبن المدمن. وتابع مع أطباء متخصصين في تخفيض وزنه بالتدريج علشان يقدر يقدم صورة صحيحة للمشاهدين عن حياة الشاب المدمن. والحقيقة أنه نجح في دوره بشكل مبهر.
أما الإبداع الحقيقي في التمثيل فكان لستيف كاريل في دور دايفيد. والحقيقة أن الأداء المميز ده مش جديد على ستيف. ولا يمكن ننسى دوره المميزة والرائع في فيلم Little Miss Sunshine.
وكل التميز ده في الأداء التمثيلي لا يمكن يمر بدون ما نعرف المسئول الحقيقي عنه. المخرج فليكس فان جروينيجين واللي قدر يقدم فيلم مترابط بصورة مميزة وانتقال هادي بين الكادرات بشكل يخلينا مستمتعين ومجذوبين لكل مشهد من البداية للنهاية.
وبما أننا اتكلمنا عن الإخراج لازم كمان نتكلم عن الموسيقى التصويرية والديكورات واللي قدرت تنقلنا بشكل مميز لجو الفيلم اللي كان مشحون بالدراما واللي اتشدينا لمشاهده من البداية للنهاية.
Beautiful Boy فيلم قوي بينقلنا لعالم التعافي من الإدمان. ننصح بمشاهدته لكل واحد عاوز يترك أي عادة سيئة في حياته ومحتاج الدفعة علشان يبدأ.
