Bohemian Rhapsody : فيلم مميز لعشاق السيرة الذاتية
على الرغم من اهتمام النقاد والمشاهدين حول العالم بفيلم Bohemian Rhapsody لكن احنا في مصر عندنا أسباب أكتر من العادية علشان نهتم بالفيلم ده. من أهم أسباب الإهتمام هي بطل الفيلم رامي مالك. الأمريكي من أصول مصرية، وبطل مسلسل Mr. Robot اللي أثار ضجة كبيرة ونجاح مستمر في فترة عرضه.
Bohemian Rhapsody بيحكي عن قصة المطرب العالمي فريدي مركيوري (يؤدي الدور رامي مالك) واللي كان عضو في فرقة Queen الفنية الغنائية. والأحداث الأهم في حياة الفرقة على الصعيد الشخصي والمهني. واللي قادت في النهاية لحفل موسيقي أسطوري سنة 1985
بشكل عام لو المشاهد مش من محبي الأفلام الموسيقية. أو أفلام السيرة الذاتية. أو الأفلام اللي بتحكي عن الفرق الغنائية وتاريخها. مشاهدة الفيلم هاتكون مملة جدا. لكن المشاهدين المهتمين بالموسيقى العالمية هايعجبهم الفيلم جدا.
المميز في سيناريو الفيلم إنه ما ركزش على المحطات الموسيقية والحفلات فقط. لكن غاص في أعماق الحياة الإنسانية والنفسية للأبطال وكشف كتير من الأسرار والمعلومات عن كل شخصية من الشخصيات اللي بنشوفها على الشاشة.
على الرغم من أن انطباعنا بعد مشاهدة Mr. robot عن رامي مالك انه مش بيعرف يأدي غير شخصية الشاب عديم المشاعر. لكنه أثبت لنا انه فنان بيشتغل على نفسه وقادر على تقمص أي شخصية بيقوم بيها. ونتوقع له مستقبل مبهر في الفترة القادمة خاصة بعد تقديم نفسه كفنان متعدد المواهب.
مخرج الفيلم براين سنجر مخرج من العيار الثقيل. ويكفي انه أخرج فيلم Valkyrie سنة 2008 و Jack the Giant Slayerفي 2013 و فيلمين من سلسلة أفلام X-Men ومن الواضح أنه أتبع في إخراجه للفيلم مدرسة بتجمع بين تقديم المعلومة الخاصة بالسيرة الذاتية في إطار من الموسيقى والغناء وخلط الحقيقي بالغير حقيقي في خلطة هاتعجب كل محبي الأفلام اللي بتتناول السيرة الذاتية.
Bohemian Rhapsody فيلم قوي ومتميز. وياريت يكون بداية موفقة لنجم قادم هو رامي مالك.
