ليلة هنا وسرور: دويتو سينمائي ناجح

الامثال بتقول من شابه اباه فما ظلم. والحقيقة ان عادل امام الفنان الكبير عمل اكتر من دويتو فني ناجح على مدار تاريخه الفني. يمكن اشهر دويتو له كان مع الفنانة الكبيرة يسرا واللي قدموا مع بعض مجموعة متواصلة من الأفلام الناجحة واللي شكلت علامات في تاريخهم الفني وفي تاريخ السينما المصرية بشكل عام.

والنهردة بنشوف التعاون الثاني بين محمد عادل امام وبين ياسمين صبري بعد فيلم جحيم في الهند. والمثير أن التعاون لم يقتصر على ان البطلين يعملوا مع بعض فيلم تاني. لكن المرة دي بنشوف ان فيلم ليلة هنا وسرور نفسه شبه فيلم جحيم في الهند. وبيحاول يقدم خلطة بين الاكشن والكوميديا والدراما في نفس الوقت علشان يرضي كل الأطراف وخاصة مشاهدين الفيلم في فترة العيد.

ليلة هنا وسرور بيحكي عن سرور النصاب المحترف (محمد امام) والمنتحل لشخصية رجل اعمال، وفي نفس الوقت بيقع في حب هنا او ياسمين صبري وبيقدر يوهمها انه بيشتغل لحساب المخابرات علشان يبرر لها محاولته سرقة تمثال اثري مهم وغالي.

بنعيب على الأداء التمثيلي لمحمد امام انه لسه متأثر بوالده في حاجات كتير. بداية من حركة الجسد وحركة ملامح الوجه واللزمات المعروفة لعادل امام، أما ياسمين صبري فقدمت أداء جيد ومتناسب مع الدور اللي بتقوم به وبيشارك ياسمين وامام في الفيلم فاروق الفيشاوي و محمد ثروت و بيومي فؤاد ومحمد عبد الرحمن أما الفيلم فمن اخراج  حسين المنباوي وتأليف كريم يوسف و مصطفى صقر

المميز في الفيلم قدرة محمد عادل امام على تطوير جسمه ولياقته علشان يأدي مشاهد الحركة الصعبة، كمان سيناريو الفيلم قدم تنويع بين الاكشن والكوميديا والرومانسية، لكن بنعيب على الفيلم ان الكوميديا الموجودة فيه كانت معتمدة على الايفيهات باكتر من اعتمادها على المواقف الكوميدية نفسها.

ديكورات الفيلم كانت جيدة وواضح فيها البذخ الإنتاجي وكمان الموسيقى التصويرية كانت قوية ومعبرة عن التغيرات اللي بتحصل في الاحداث طوال الوقت، وبشكل عام الفيلم يعتبر من الأفلام القوية في فترة العيد.

ليلة هنا وسرور مش افضل أفلام العيد. لكنه فيلم جيد يستحق المشاهدة والتشجيع.

علشان تبقى عارف:

محمد امام هو ابن الفنان الشهير عادل امام ويعتبروا جميعا مع بعض في فريق فني متكامل بيجمع بين التمثيل والإخراج