أبو عمر المصري.. لو بتحب تشغل مخك قرب!
أحمد عز بيتسلل لمركب في عرض البحر ويشتبك مع مجموعة إرهابيين ويتوسل لست جميلة أنها تساعده علشان ينقذ أبنه اللي صدر ضده حكم بالإعدام! أنت مادخلتش على الريفيو بتاعنا من منتصفه. بل بالعكس.. هي دي البداية اللي قرر المخرج أحمد خالد موسى والكاتبة مريم نعوم أنها يصدمونا بيها من الحلقة الأولى لمسلسل أبو عمر المصري. وسابونا نحاول نلاقي إجابات منطقية ونرتب أحداث القصة لحد الحلقة الخامسة تقريبا!
النوع ده من الرهانات على ذكاء المشاهد بيكون صعب. رهان عامل زي لعبة الروليت الروسي.. ياتعيش والمشاهد يعجبه المسلسل ويتابعه للنهاية، وإلا تموت والمسلسل يتنسى وينصرف عنه المشاهد علشان يتفرج على أعمال تانية مش بتتطلب منه أي قدر من تشغيل الدماغ. خاصة أن المشاهدين في شهر رمضان بيكونوا عاوزين (يسلوا صيامهم). لكن أبو عمر المصري قدر يكسب الرهان مع صناعه والجمهور على حد سواء.
أبو عمر المصري هو واحد من أسماء عديدة بيظهر بيها الفنان أحمد عز بطل المسلسل. ملامح شخصيته رسمها الكاتب المخضرم (عز الدين شكري فشير) اللي له كتابات سياسية كتير بيتطرق فيها لعالم الجماعات القائمة على التطرف الديني ومحاولات الشباب أنهم يحققوا أهدافهم وأحلامهم وسط مجتمع طاحن وظروف إنسانية واجتماعية لا ترحم.
لكن الأسماء مش بتهم لما بنتابع رحلة المحامي الشاب حديث التخرج اللي عاوز يمارس مهنة المحاماة بشكل صحيح. لكنه بيصطدم بالطبقة الفاسدة في مصر في فترة التسعينات. الفترة اللي انتهت بالزلزال الشهير اللي فتح أبواب الجحيم على الفاسدين من خلال محاولة أحمد عز التصدي لهم من خلال شغل المحاماة ثم بنكتشف أن…. نعتقد أن كفاية كده علشان نحمسكم تشاهدوا المسلسل بنفسكم وتتابعوا الأحداث اللي بتستمر داخل وخارج مصر.
من نقاط قوة المسلسل وضعفها في نفس الوقت هي الإطار الزمني اللي بتدور فيه. المسلسل بيدور على 3 محاور أساسية. محور الماضي اللي بنفهم من خلاله ايه اللي بيحصل دلوقت. ومحور الحاضر اللي بنحاول نشوف من خلاله نتائج أفعال (أبو عمر) في الماضي، ومحور المستقبل اللي بنتابع من خلاله التطورات في الأحداث. التنقلات بين الثلاث محاور دي ممكن يكون مربك شوية للمشاهدين، خاصة في شهر رمضان زي ما وضحنا. لكن من ناحية تانية كل فريق عمل المسلسل اشتغل بمنتهى الحماس علشان يخلي الانتقال بين الثلاث محاور سلس وسهل ومفهوم.
أحمد عز بيقدم أداء فني قوي ومميز، بنشوف تعبيرات جيدة على وجهه ومناسبة للمواقف اللي بيمر بيها، وقدر يظهر كشخص عادي له انتصارات وانكسارات وأخطاء، على العكس من بعض الشخصيات اللي عملها في الماضي واللي كانت دايما بتظهر في مظهر الشخص الملاك أو البطل اللي مش بيعمل أي أخطاء.
أروى جودة في دور شيرين هي كمان بتقدم أداء كويس. حسينا ببعض التكرار في نمط أدائها في الحلقات السابقة لكننا بنراهن عليها بقوة علشان تقدم أداء مختلف في الحلقات القادمة مع التغيرات الكبيرة في القصة والسيناريو واللي نعتقد أنها ها تخدم دورها بشكل كبير.
المغربية الجميلة نادية كوندة هي مفاجأة السنة دي بالنسبة لنا! نادية في دور كنزة عاملة معادلة بين جمال الشكل الهادئ مع التمثيل الغير منفعل مع دراسة واعية لشخصيتها في المسلسل وقدرة على استغلال السيناريو والقصة لصالحها الى اقصى درجة. ونعتقد أن الدور هايكون نقطة انطلاق كبيرة لها في السينما والدراما المصرية. وافتكروا كلامنا ده!
فتحي عبد الوهاب اللي بيقدم واحد من أقوى أدواره على مستوى تاريخه الفني. لكن للأسف حسينا ببعض المبالغة في الأداء. يعني الشخصيات دي مش بنشوفها في الحقيقة ومش بتتكلم أو بتضحك كده في الحقيقة. أداء غير واقعي لكنه أداء مسرحي مميز بنرفع علشانه القبعة لفتحي عبد الوهاب اللي بيقدر يكون شيطان تمثيل أو ملاك حسب رغبته وارادته الشخصية!
وأخيرا محمد جمعة.. الشاب اللي كل جزء من ملامحه مصري جدا، واللي قدر يقدم في رمضان السنة دي بشكل عام أكتر من دور مميز على الرغم من اختلافهم عن بعض. محمد هايكون له مستقبل رائع وبرضوا افتكروا كلامنا.
أبو عمر المصري من أكثر مسلسلات رمضان 2018 المتعوب عليها واللي صناعها حبوا يبذلوا قصارى جهدهم علشان يطلعوا لنا عمل قوي ومميز. وأكيد هايلاقوا نتيجة مجهودهم في تقييمات الجمهور واقباله على المتابعة.
