The Strangers: Prey at Night: الكفاح من أجل البقاء على قيد الحياة

كتير من أفلام الرعب بيعتمد على فكرة (ماذا لو) الشهيرة. وهو السؤال اللي بيطرحه المشاهد على نفسه من خلال مشاهدة الأفلام دي.. ماذا لو كنت مكان الأبطال؟ كنت هتصرف ازاي وهعمل ايه؟ وهو ده السؤال اللي بنشوفه من خلال أحداث The Strangers: Prey at Night

القصة

The Strangers: Prey at Night بيحكي عن أسرة بتجد نفسها في منطقة منعزلة عن أي تغطية لشبكات المحمول، ثم بتبدأ الأحداث في التعقد لما بيظهر 3 أشخاص ملثمين وواضح أنهم مرضى نفسيين وبيقرروا يواجهوا الأسرة ويضعوهم في كفاح من أجل البقاء على قيد الحياة.

فريق العمل

الفيلم من أخراج جوهانس روبرتس وتأليف بريان بيرتينو ومن بطولة كريستينا هندريكس و بالي ماديسون و مارتن هندرسون و لويس بولمان و إيما بيلومي

الأداء التمثيلي

الأداء التمثيلي للأبطال كان جيد، والمميز فيه أن كل واحد منهم كان فاهم أبعاد شخصيته والدور المطلوب منه أنه يقوم به بشكل جيد، وقدر كل واحد منهم يقوم بدوره في الأطار العمري له، الأمر اللي أدى في النهاية لظهور الفيلم في شكل جيد من ناحية الأداء التمثيلي.

السيناريو والحوار والأخراج

سيناريو الفيلم سريع وغير ممل، خاصة في النصف الثاني من الأحداث، واللي عوضنا عن بعض الملل اللي شعرنا به في الربع الأول من أحداث الفيلم، أما الأخراج فكان عارف بالضبط المطلوب منه وقدمه للمشاهدين، والمطلوب كان مجموعة من مشاهد وتيمات الرعب اللي معظمها كان غير جديد، لكنه مؤثر في محبي أفلام الرعب بشكل عام.

الديكورات والموسيقى والأزياء

ديكورات الفيلم والموسيقى التصويرية الخاصة به كانت قوية، وقدرت تخلق مع الإضاءة الخافتة في معظم مشاهد الفيلم جو عام من عدم الراحة عند المشاهدين، وكل ده هيأ لظهور مشاهد الرعب والفزع.

الخلاصة

The Strangers: Prey at Night مش أفضل فيلم رعب شوفناه على الأطلاق، لكن كان ناقصه بعض الأهتمام والبذخ الأنتاجي علشان يكون أفضل من النتيجة النهائية اللي شوفناها

علشان تبقى عارف:

تقييم الفيلم على موقع IMDB هو 5.7 من 10