الكهف: محاولة للخروج من كهف الأفلام العربية
قليل لما بنشوف محاولات جادة ومحترمة للخروج من الشكل التقليدي للأفلام العربية، الأمل على محاولات بعض السينمائيين القلائل أنهم يقدموا أعمال محترمة وجيدة أو على الأقل بتحاول تكون جيدة زي (الكهف).
القصة
الفيلم بيحكي عن مجموعة من الأشخاص بتعيش في أحد المناطق الشعبية، واللي بيدور بينهم من علاقات اجتماعية وأحلام وطموحات بتخلق في النهاية حالات من الصراع بين بعضهم. لكن السؤال اللي بيطرحه الفيلم: هل ممكن التوفيق بين الأحلام البسيطة للناس وبين قدرتهم على تحقيقها؟
فريق العمل
الفيلم من تأليف سامح سر الختم وأخراج أمير شوقي وبطولة ماجد المصري ومحمود عبد المغني ومي سليم وروجينا وايهاب فهمي ومحمد عادل
الأداء التمثيلي
لازم نرفع القبعة لكل الناس اللي قدمت أداء سينمائي قوي في (الكهف).. بداية من ماجد المصري اللي بيثبت في كل دور بيقوم بيه قدرته على تجسيد أي شخصية يعوز يقدمها، وقدرته على تجسيد الشخصيات بشكل واقعي بعيدا عن المبالغة وفي نفس الوقت بعيد عن السطحية.
محمد عادل هو كمان بيودع لقب وجه جديد وبيبدأ يثبت أقدامه من خلال مجموعة كبيرة من الاختيارات في الفترة الأخيرة. اختيارات محمد عادل مش بس بتثبت أنه ممثل جيد، لكن كمان فنان ذكي بيقدر يفكر كويس قبل ما يوافق على أي عمل يقوم بيه. محمد عادل هايكون له مستقبل ممتاز بدأ يرسم خطواته الأولى لها من دلوقت.
روجينا هي كمان بتثبت لنا قدرتها على الأداء القوي والمميز في مساحة مختلفة عن معظم الأدوار اللي أدتها مؤخرا وبنعتقد أنها تعاملت مع الفيلم كتحدي فني ونجحت فيه في النهاية.
السيناريو والحوار والأخراج
سيناريو الفيلم متشابك لكن سهل الفهم والمتابعة وغير ممل على الأطلاق، أما الحوار فكان مستمد من حياتنا اليومية بشكل كبير وده أكسبه بعد صادق ومميز مع الجمهور، وكان واضح في اجمالي تقييمنا للفيلم مدى المجهود الأخراجي اللي ظهر من خلال تفاصيل الفيلم الصغيرة.
الديكورات والموسيقى والأزياء
ديكورات الفيلم كان متعوب عليها جدا والموسيقى التصويرية الخاصة به كانت معمولة باتقان واحترافية، حركة الكاميرا كانت مميزة وقدمت لنا كادرات ممتازة وفيها كتير من الرمزية، وكان واضح فيها (الصنعة) المميزة من فريق العمل بالكامل.
الخلاصة
الكهف فيلم عربي محترم في فترة أصبح من الصعب فيها نقابل فيلم عربي قوي وجيد وصالح للمشاهدة.
علشان تبقى عارف:
أسم الفيلم كان (القمر من قريب) ثم تم تعديله الى (الكهف)
